ଢାକା, ୧୧।୨ (ପି.ଟି.)- ବାଂଲାଦେଶକୁ ୧୯ ବର୍ଷରୁ କମ୍ ଆଇସିସି ବିଶ୍ୱକପ୍ ଜିତାଇବାରେ ଅଧିନାୟକ ଆକବର ଅଲି ଗୁରୁତ୍ୱପୂର୍ଣ୍ଣ ଭୂମିକା ନିଭାଇଥିଲେ। ଭାରତ ପକ୍ଷରୁ ଧାର୍ଯ୍ୟ ୧୭୮ ରନର ଟାର୍ଗେଟ୍କୁ ପିଛା କରି ବାଂଲାଦେଶ ଏକଦା ୮୫ ରନରେ ୫ ଉଇକେଟ୍ ହରାଇ ବ୍ୟାଟିଂ ବିପର୍ଯ୍ୟୟର ସମ୍ମୁଖୀନ ହୋଇଥିଲା। ତେବେ ଆକବରଙ୍କ ଅପରାଜିତ ୪୩ ରନର ଇନିଂସ ଭାରତ ହାତରୁ ମ୍ୟାଚ୍ ଛଡ଼ାଇ ଆଣିଥିଲା। ବାଂଲାଦେଶକୁ କୌଣସି ବର୍ଗରେ ପ୍ରଥମ ଆଇସିସି ଟ୍ରଫି ଜିତିବାରେ ନାୟକ ସାଜିଥିବା ୧୮ ବର୍ଷୀୟ ଆକବରଙ୍କ ପଛରେ ସଦ୍ୟ ରହିଥିବା ଏକ ଦୁଃଖଦଭରା ଘଟଣା ଏବେ ସାମ୍ନାକୁ ଆସିଛି। ବିଶ୍ୱକପ୍ ମଝିରେ ଆକବରଙ୍କ ବଡ଼ ଭଉଣଙ୍କ ବିୟୋଗ ଘଟିଥିଲା। ଜାନୁୟାରୀ ୨୨ରେ ଜାଆଁଳା ସନ୍ତାନ ପ୍ରସବ କରିବା ଅବସରରେ ତାଙ୍କ ଭଉଣୀ ୨୨ ବର୍ଷୀୟା ଖାଡିଜା ଖାତୁନଙ୍କ ମୃତ୍ୟୁ ହୋଇଥିଲା ବୋଲି ବାଂଲାଦେଶ ଏକ ଦୈନିକ ଖବରକାଗଜରେ ସୋମବାର ରିପୋର୍ଟ ପ୍ରକାଶ ପାଇଛି। ତେବେ ଏହି ଘଟଣା ସମ୍ପର୍କରେ ଆକବରଙ୍କୁ ତାଙ୍କ ପରିବାର ପକ୍ଷରୁ କୌଣସି ସୂଚନା ଦିଆଯାଇ ନ ଥିଲା। ତେବେ ଆକବର ତାଙ୍କର ଜଣେ ଭାଇଙ୍କ ଜରିଆରେ ପରେ ଏ ବିଷୟରେ ଜାଣିପାରିଥିଲେ। ‘ଆକବର ତାଙ୍କ ଭଉଣୀଙ୍କ ସହିତ ବହୁତ ଘନିଷ୍ଠ ଥିଲେ। ଆମେ ଏ ବିଷୟରେ ପ୍ରଥମେ ତାଙ୍କୁ ଜଣାଇବାକୁ ଚାହୁଁ ନ ଥିଲୁ’ ବୋଲି ଆକବରଙ୍କ ବାପା ଏହି ଖବରକାଗଜକୁ ସାକ୍ଷାତ୍କାର ଅବସରରେ କହିଛନ୍ତି।
