ଲଣ୍ଡନ/ମେଲବୋର୍ନ, ୧୬ା୭ (ପି.ଟି.)-ରବିବାର ଲଡର୍ସଠାରେ ଅନୁଷ୍ଠିତ ଆଇସିସି ବିଶ୍ୱକପ୍ ଫାଇନାଲରେ ଅମ୍ପାୟରିଂରେ ଏକ ତ୍ରୁଟି ରହିଥିବା ପୂର୍ବତନ ଅନ୍ତର୍ଜାତୀୟ ଅମ୍ପାୟର ସିମନ ଟଫେଲ ଏବଂ କେ. ହରିହରନ ପ୍ରକାଶ କରିଛନ୍ତି। ଏକ ଓଭର ଥ୍ରୋ ପାଇଁ ମ୍ୟାଚ ଅଫିସିଆଲମାନେ ଇଂଲଣ୍ଡକୁ ୫ ରନ ପରିବର୍ତ୍ତେ ୬ ରନ ଦେଇଥିଲେ। ଏହି ମ୍ୟାଚରେ ଇଂଲଣ୍ଡ ନିର୍ଦ୍ଧାରିତ ୫୦ ଓଭରରେ ୨୪୨ ରନ ଚେଜ୍ କରୁଥିବାବେଳେ ଶ୍ରୀଲଙ୍କାର କୁମାର ଧର୍ମସେନା ଏବଂ ଦକ୍ଷିଣ ଆଫ୍ରିକାର ମାରିଅସ୍ ଇରାସମସ୍ ଫିଲ୍ଡ ଅମ୍ପାୟର ଦାୟିତ୍ୱ ତୁଲାଉଥିଲେ। ମ୍ୟାଚ୍ର ଫାଇନାଲ ଓଭରରେ ନ୍ୟୁଜିଲାଣ୍ଡ ଫିଲ୍ଡର ମାର୍ଟିନ ଗୁପ୍ଟିଲଙ୍କ ଏକ ଥ୍ରୋ ଷ୍ଟୋକ୍ସଙ୍କ ବ୍ୟାଟ୍ରେ ବାଜି ବାଉଣ୍ଡରୀ ଆଡକୁ ଚାଲିଯାଇଥିଲା। ଇଂଲଣ୍ଡକୁ ୬ ରନ ମିଳିଯିବାରୁ ମ୍ୟାଚ ଟାଇ ହୋଇଯାଇଥିଲା ଏବଂ ସୁପର ଓଭର ପର୍ଯ୍ୟାୟକୁ ଚାଲିଯାଇଥିଲା। ଅମ୍ପାୟର ଭୁଲ ବଶତଃ ଇଂଲଣ୍ଡକୁ ୫ ପରିବର୍ତ୍ତେ ୬ ରନ ଦେଇଥିଲେ। ପରିସ୍ଥିତିକୁ ଦେଖିଲେ ଏହା ସ୍ପଷ୍ଟ ବାରିହୋଇଯାଉଛି ବୋଲି ୫ଥର ଆଇସିସି ଅମ୍ପାୟର ଅଫ୍୍ ଦି ଇୟର ବିବେଚିତ ଟଫେଲ ଏକ ସାକ୍ଷାତ୍କାରରେ କହିଛନ୍ତି। ଭାରତୀୟ ଅମ୍ପାୟର କେ. ହରିହରନ ମଧ୍ୟ ତାଙ୍କ ପ୍ରତିକ୍ରିୟା ପ୍ରକାଶ କରିଛନ୍ତି। ସେ କହିଛନ୍ତି କୁମାର ଧର୍ମସେନାଙ୍କ ତ୍ରୁଟି ଯୋଗୁ ନ୍ୟୁଜିଲାଣ୍ଡ ବିଶ୍ୱକପ୍ରୁ ବଞ୍ଚତ୍ତ ହେଲା ବୋଲି କୁହାଯାଇପାରେ। ଆଇସିସି ଏହି ପ୍ରସଙ୍ଗ ଉପରେ କୌଣସି ମନ୍ତବ୍ୟ ଦେବାକୁ ମନା କରିଦେଇଛି। ଏହାର ଜଣେ ମୁଖପାତ୍ର କହିଛନ୍ତି, ଖେଳ ବେଳେ ଅମ୍ପାୟର ନିୟମାନୁସାରେ ନିଷ୍ପତ୍ତି ନେଇଥାନ୍ତି। ନୀତି ଅନୁସାରେ ଆମେ ସେମାନଙ୍କ ନିଷ୍ପତ୍ତି ଉପରେ କୌଣସି ଟିପ୍ପଣୀ ଦେବା ଉଚିତ ହେବ ନାହିଁ।
