ମୁମ୍ବାଇ: ବେଶ୍ କିଛି ଦଶନ୍ଧି ଧରି ବଲିଉଡ୍ ଓ କୋଟି କୋଟି ଦର୍ଶକଙ୍କ ହୃଦୟରେ ରାଜ କରି ଆସୁଛନ୍ତି ବଲିଉଡ୍ ବାଦଶାହ ଶାହରୁଖ ଖାନ। ଶାହରୁଖ କେବଳ ପରଦାରେ ଜଣେ ସଫଳ ଅଭିନେତା ନୁହଁନ୍ତି ବରଂ ନିଜ ପର୍ସନାଲ ଲାଇଫରେ ଜଣେ ସଫଳ ସ୍ବାମୀ ମଧ୍ୟ। ଶୁକ୍ରବାର ଶାହରୁଖ ଓ ସ୍ତ୍ରୀ ଗୌରୀ ଖାନ ନିଜର ୨୮ତମ ବିବାହ ବାର୍ଷିକୀ ପାଳନ କରିଛନ୍ତି। ଏହି ଅବସରରେ ଶାହରୁଖ ରୋମାଣ୍ଟିକ ଅନ୍ଦାଜରେ ଗୌରୀଙ୍କ ପାଇଁ ଇନ୍ଷ୍ଟାଗ୍ରାମରେ ଏକ ଫଟୋ ଶେୟାର କରିଛନ୍ତି। ଏହି ଫଟୋରେ ଗୌରୀ ଓ ଶାହରୁଖ ଏକାସାଙ୍ଗରେ ନଜର ଆସୁଛନ୍ତି। ଫଟୋ ଶେୟାର କରିବା ସହ ବାଦଶାହ କ୍ୟାପଶନରେ ଲେଖିଛନ୍ତି, ଏଭଳି ଲାଗୁଛି ଯେପରି କାଲିର କଥା, ଏହାରି ଭିତରେ ୩ ଦଶନ୍ଧି ବିତିଗଲାଣି ଏବଂ ୩ଟି ସନ୍ତାନ ଆମ ଜୀବନକୁ ଆହୁରି ରଙ୍ଗୀନ କରିସାରିଛନ୍ତି। ମୁଁ ଯେତିକି ବି ପରୀ କାହାଣୀ ଶୁଣିଛି, ତା ଅପେକ୍ଷା ଯେତିକି ସୁନ୍ଦର ହେବା କଥା ମୋତେ ତା’ଠାରୁ ଅଧିକ ସୁନ୍ଦର ସ୍ତ୍ରୀ ମିଳିଛି। ବିବାହ ବାର୍ଷିକୀରେ ଶାହରୁଖଙ୍କ ଏହି ପୋଷ୍ଟ ଏବେ ସୋସିଆଲ ମିଡିଆରେ ଭାଇରାଲ ହେବାରେ ଲାଗିଛି। ଏଥିସହ ଦୁଇଜଣଙ୍କୁ ବଲିଉଡ୍ ଷ୍ଟାର ଓ ପ୍ରଶଂସକମାନେ ଶୁଭେଚ୍ଛା ଜଣାଇଛନ୍ତି। ତେବେ ଗୌରୀ ଖାନ ମଧ୍ୟ ଏକ ସଫଳ ମହିଳା। ପରଦା ପଛରେ ଥାଇ ଶାହରୁଖଙ୍କୁ ସବୁ ସମୟରେ ସପୋର୍ଟ କରୁଥିଲେ ଗୌରୀ। ସେ ଶାହରୁଖଙ୍କ ବହୁ ହିଟ୍ ଫିଲ୍ମକୁ ପ୍ରଯୋଜନା କରିଛନ୍ତି। ୨୦୦୪ରେ ଫିଲ୍ମ ‘ମେଁ ହୁଁ ନା’ ଜରିଆରେ ପ୍ରଯୋଜକ ଭାବେ ବଲିଉଡ୍ରେ ସେ ପାଦ ରଖିଥିଲେ। ଏହାପରେ ଗୌରୀ ‘ଓମ୍ ଶାନ୍ତି ଓମ୍’ ଓ ‘ହାପି ନ୍ୟୁ ଇୟର’ ଭଳି ବଡ଼ ବଡ଼ ଫିଲ୍ମକୁ ପ୍ରଯୋଜନା କରିସାରିଛନ୍ତି।
