ଓ୍ବାଶିଂଟନ୍: ଆମେରିକାର ନ୍ୟୁଜର୍ସିରେ ରହୁଥିବା କପଲ ନିକ୍ ଅଷ୍ଟ ଏବଂ ଜୋନ ନେ ଦୁହେଁ ଦୁହିଁଙ୍କୁ ଡେଟ୍ ସମୟରେ ବିବାହକୁ ଖାସ୍ କରିବା ନେଇ ଶପଥ କରିଥିଲେ। ଯେଉଁଥିପାଇଁ ବିବାହ ପୋଷାକରେ ୨୩ ଦେଶ ବୁଲି ଆସିଛନ୍ତି। ୨୦୧୬ରେ ଏହି ଯୋଡ଼ିଙ୍କର ନିର୍ବନ୍ଧ ହୋଇଥିବା ବେଳେ ୨୦୧୭ ଡିସେମ୍ବରରେ ବିବାହ ବନ୍ଧନରେ ବାନ୍ଧି ହୋଇଥିଲେ। ଏହା ପରେ ୨୦୧୮ ଜାନୁୟାରୀରେ ହନିମୁନ୍ ପାଇଁ ସମସ୍ତ ପ୍ରସ୍ତୁତି ଆରମ୍ଭ କରିଥିଲେ। ବିବାହକୁ ଖାସ୍ କରିବା ପାଇଁ ସେହି ପୋଷାକରେ ୨୩ଟି ଦେଶ ବୁଲିବା ପାଇଁ ବାହାରିଥିଲେ। ତାଙ୍କର ଏହି ଯାତ୍ରା ପ୍ରଥମେ ଥାଇଲାଣ୍ଡ୍ରୁ ଆରମ୍ଭ ହୋଇଥିଲା। ୧୦ ମାସ ମଧ୍ୟରେ ଦମ୍ପତି ମାଉଣ୍ଟ ଏଭରେଷ୍ଟ, ଚାଇନା, ଦୁବାଇ, ଇଟାଲି, ଫ୍ରାନ୍ସ, ତୁର୍କୀ, ଇଣ୍ଡୋନେସିଆ, ଗ୍ରୀସ୍, ନ୍ୟୁଜିଲାଣ୍ଡ୍, ଅଷ୍ଟ୍ରେଲିଆ, ଅଷ୍ଟ୍ରିୟା, ସର୍ବିୟା, ଦକ୍ଷିଣଆଫ୍ରିକା, ଇସ୍ରାଇଲ, ସିଙ୍ଗାପୁର, ମିଶର, ଶ୍ରୀଲଙ୍କା, ସୁଇଜରଲାଣ୍ଡ୍, ଭାରତ ଆଦି ଦେଶ ବୁଲିଥିଲେ। ଏହି ନବଦମ୍ପତି ଭାରତ ଆସିଥିବା ସମୟରେ ଭାରତର ସଂସ୍କୃତି, ପରମ୍ପରାକୁ ଅନୁକରଣ କରିଥିଲେ। କନ୍ୟା ଜୋ ନେ ଗାଉନ୍ ପିନ୍ଧିବା ସହିତ ମୁଣ୍ଡରେ ଓଢ଼ଣା ପକାଇଥିଲେ। ମଥାରେ ଟିକିଲି ମଧ୍ୟ ଲଗାଇଥିଲେ। ନବଦମ୍ପତିଙ୍କ କହିବା ଅନୁସାରେ, ବିବାହ ପୋଷାକ ଥରେ ପିନ୍ଧିବାକୁ ପଡ଼େ। ତେଣୁ ଏମିତି କିଛି କରିବାକୁ ଚାହୁଁଥିଲେ ଯାହା ସ୍ମରଣୀୟ ହୋଇରହିବ। ଦୁନିଆ ବହୁତ ବଡ଼। ଏଥିଲାଗି ବିବାହ ପୋଷାକରେ ସାରା ଦେଶ ବୁଲିବାକୁ ଇଚ୍ଛା ରଖିଥିଲେ। ନବଦମ୍ପତିଙ୍କ ଇଚ୍ଛା ପୂରଣ ହୋଇଥିବାରୁ ଖୁସି ବ୍ୟକ୍ତ କରିଛନ୍ତି।
