ମୁମ୍ବାଇ,୧୩।୭-ଅନ୍ତର୍ଜାତୀୟ କ୍ରିକେଟର ପରିଚାଳନା ସଂସ୍ଥା ଆଇସିସି ଏକ ବଡ଼ ବିବାଦର ସମ୍ମୁଖୀନ ହୋଇଛି। ଅନ୍ତର୍ଜାତୀୟ କ୍ରିକେଟ ପରିଷଦ ଦୁବାଇର ଅଜୟ ସେଠୀଙ୍କ ଚ୍ୟାନେଲ ୨କୁ ଚଳିତ ବିଶ୍ୱକପ୍ର ରେଡିଓ ବିବରଣୀ ଅଧିକାର ପ୍ରଦାନ କରିଥିଲା। ଚେକ୍ ବାଉନ୍ସ ହେବା ଓ ଭାଷ୍ୟକାରଙ୍କୁ ଦେୟ ନ ମିଳିବାରୁ ରେଡିଓ ବିବରଣୀ ବର୍ତ୍ତମାନ ବନ୍ଦ ହୋଇସାରିଛି। ଭାଷ୍ୟକାରମାନେ ଏବେ ଦେୟ ଅପେକ୍ଷାରେ ରହିଛନ୍ତି। ଏହି ବିବାଦ ଲାଗି କିଏ ଦାୟୀ ଏପର୍ଯ୍ୟନ୍ତ ଜଣାପଡ଼ି ନାହିଁ। ହେଲେ ଆଇସିସିର କ୍ଷତି ହେବା ସ୍ପଷ୍ଟ ହୋଇଛି। ପୂର୍ବତନ ଓ୍ବେଷ୍ଟଇଣ୍ଡିଜ୍ କ୍ରିକେଟର କାର୍ଲ ହୁପର ଓ ରିକାର୍ଡୋ ପାଓ୍ବେଲଙ୍କୁ ବିବରଣୀ ପ୍ରଦାନକାରୀ କମ୍ପାନୀ ଦ୍ୱାରା ନିଯୁକ୍ତ କରାଯାଇଥିଲା। ପ୍ରାପ୍ୟ ମିଳି ନ ଥିବାରୁ ସେମାନେ ଆଇନର ସହାୟତା ନେଇଛନ୍ତି। ପୂର୍ବତନ ଭାରତୀୟ କ୍ରିକେଟର ଦୀପଦାସ ଗୁପ୍ତା, ମହମ୍ମଦ କୈଫ, ଅତୁଲ ଓ୍ବାସାନ, ସୟଦ କିର୍ମାନି ଓ ଭାଷ୍ୟକାର ଚାରୁ ଶର୍ମା ଆଇନର ଦ୍ୱାରସ୍ଥ ହେବା ନେଇ ଚିନ୍ତା କରୁଛନ୍ତି। ସେମାନେ ମୋ ଫୋନ୍ ଓ ଇ-ମେଲ୍ର ଜବାବ ଦେଉନାହାନ୍ତି। ମୋ ଭଳି ପ୍ରାପ୍ୟ ପାଇ ନ ଥିବା ଆହୁରି ଅଛନ୍ତି। ସେମାନେ କହି ନ ପାରନ୍ତି। କାରଣ ପ୍ରାପ୍ୟ ଶୀଘ୍ର କିମ୍ବା ବିଳମ୍ବରେ ମିଳିବା ଅପେକ୍ଷାରେ ରହିଛନ୍ତି ବୋଲି ଭାଷ୍ୟକାର ଚାରୁ କହିଛନ୍ତି। ଉକ୍ତ ରେଡିଓ ଚ୍ୟାନେଲକୁ ଆଇସିସି ଇଭେଣ୍ଟର ବିବରଣୀ ପ୍ରଚାର କରିବାର ଅଧିକାର ୨୦୨୩ ପର୍ଯ୍ୟନ୍ତ ଦିଆଯାଇଛି। କିନ୍ତୁ ଅଧିକାର ଲାଗି ଦୁବାଇ ଫାର୍ମା କମ୍ପାନୀ ପକ୍ଷରୁ ପ୍ରଦାନ କରାଯାଇଥିବା ଚେକ୍ ବାଉନ୍ସ ହୋଇଯାଇଛି। ରେଡିଓ ବିବରଣୀ ଅଧିକାର ପାଇଁ କୌଣସି ଟେଣ୍ଡର ଦିଆଯାଇ ନ ଥିଲା। କୌଣସି ଅଭିଜ୍ଞତା ନ ଥିବା ଚ୍ୟାନେଲ ୨ ଏକ ଭାରତୀୟ କମ୍ପାନୀକୁ ଲିଜ୍ରେ ବିବରଣୀ ପ୍ରଦାନ କରିବା ପାଇଁ ଲିଜ୍ ଦେଇଛି। କେବଳ ଭାରତରେ ନୁହେଁ କାରିବିଅନ, ଅଷ୍ଟ୍ରେଲିଆ, ନ୍ୟୁଜିଲାଣ୍ଡ ସମେତ ବିଶ୍ୱର ବହୁ ରେଡିଓ ଷ୍ଟେଶନକୁ ଲିଜ୍ରେ ବିବରଣୀ ପ୍ରଦାନ କରିବାର ଅଧିକାର ଦିଆଯାଇଛି।
