ତାଳଚେର,୧୭ା୬(ନି.ପ୍ର.) : ଅନୁଗୋଳ କଣିହାଁ ବ୍ଲକ ହଳଦିଆ କଟା ଥିବା ପାଉଁଶ ଇଟା ଫ୍ୟାକ୍ଟ୍ରିରେ ବିଦ୍ୟୁତ ଆଘାତରେ ମାଲିକଙ୍କ ସମେତ ୨ ଜଣଙ୍କର ଜୀବନ ଯାଇଛି। ମାଲିକ ଅନନ୍ତ ସାହୁ(୪୦) ଏବଂ ରୋଷେଇ କରୁଥିବା ଯୁବତୀ ମଞ୍ଜରୀ ମୁଣ୍ଡା (୩୦) । ରଜ ଉପଲକ୍ଷେ ସମସ୍ତ ଶ୍ରମିକ ଘରକୁ ଯାଇଥିବାବେଳେ କେବଳ ମଞ୍ଜରୀ କାରଖାନାରେ ଥିଲେ। ସବୁଦିନ ପରି ଅନନ୍ତ ନିଜ ଘରେ ଖାଇ ସାରିବା ପରେ କୁକୁର ପାଇଁ ଖାଦ୍ୟ ଆଣି କାରଖାନାକୁ ରବିବାର ରାତିରେ ଆସିଥିଲେ। କୁକୁରକୁ ବାନ୍ଧିବା ପାଇଁ ଗାତ ଖୋଳୁଥିବାବେଳେ ଅନନ୍ତଙ୍କ ଲୁହା ଶାବଳ ବିଦ୍ୟୁତତାର ସଂସ୍ପର୍ଶରେ ଆସିିଥିଲା। ବିଦ୍ୟୁତ ଆଘାତରେ ଛଟପଟ ହେଉଥିବା ଦେଖି ମଞ୍ଜରୀ ମାଲିକଙ୍କୁ ରକ୍ଷା କରିବାକୁ ଯାଇ ସେ ମଧ୍ୟ ବିଦ୍ୟୁତର ଶିକାର ହୋଇଥିଲେ। ଉଭୟଙ୍କର ଘଟଣାସ୍ଥଳରେ ମୃତ୍ୟୁ ଘଟିଥିଲା। କାରଖାନାରେ ଆଉ କେହି ନ ଥିବାରୁ ଘଟଣା ଜଣା ପଡ଼ିନଥିଲା। ସୋମବାର ସକାଳୁ ଖବର ପାଇ ତାଙ୍କ ପରିବାର ଓ ଗୋଡ଼ିବନ୍ଧ ଫାଣ୍ଡି ଅଧିକାରୀ ସେଠାରେ ପହଞ୍ଚିଛନ୍ତି। ମାଟି ତଳେ ପୋତି ବିଦ୍ୟୁତତାର ନିଆ ଯାଇଥିଲା। ମାଟି ଖୋଳିବାବେଳେ ବିଦ୍ୟୁତ ତାର କଟିଯାଇଥିବା ପୋଲିସ ଅନୁମାନ କରୁଛି। ପୋଲିସ ଏନେଇ ଦୁଇଟି ଅପମୃତ୍ୟୁ ମାମଲା ରୁଜୁ କରି ତଦନ୍ତ ଚଳାଇଛି।
