ପୁରୀ ଅଫିସ,୨୯।୫: ବାତ୍ୟା ‘ଫନୀ’ ପ୍ରଭାବରେ ପୁରୀ ସହରର ବିଶେଷ କ୍ଷତି ଘଟିଛି । ଶତାଧିକ ବିଦ୍ୟୁତ୍ ଖୁଣ୍ଟ ଉପୁଡି ପଡିଛି। ପ୍ରଶାସନ ପକ୍ଷରୁ ଯୁଦ୍ଧକାଳୀନଭିତ୍ତିରେ ବିଦ୍ୟୁତ୍ ସଜାଡିବା ଆରମ୍ଭ କରିଛି। ବାତ୍ୟାକୁ ୨୫ ଦିନ ବିତିଥିଲେ ମଧ୍ୟ ପୁରୀ ସହରର ଅର୍ଦ୍ଧାଧିକ ଅଞ୍ଚଳ ଅନ୍ଧାରରେ ରହିଛ। ବୁଧବାର ସକାଳ ୮ଟାରେ ଗୋପୀନାଥପୁର ବାସିନ୍ଦା ଅଠରନଳା ଛକରେ ଟାୟାରଜାଳି ରାସ୍ତାରୋକୋ କରିଥିଲେ। ଫଳରେ ପୁରୀ-ଭୁବନେଶ୍ବର ଯାତାୟାତ ଠପ୍ ହୋଇଯାଇଥିଲା । ଅଠରନଳାରୁ ଚାରିନଳା ଛକ ପର୍ଯ୍ୟନ୍ତ ବାଇକ, ଘରୋଇ ବସ ଅଟକି ରହିଥିଲା। ଖବରପାଇ ସଦର ପୋଲିସ ପହଞ୍ଚି ଆନ୍ଦୋଳନକାରୀଙ୍କୁ ବୁଝାଶୁଝା କରିବା ପରେ ଦେଢ଼ ଘଣ୍ଟା ପରେ ରାସ୍ତାରୋକୋ ହଟିଥିଲା।
ସ୍ଥାନୀୟ ବାସିନ୍ଦାଙ୍କ କହିବା କଥା, ୨୫ ଦିନ ହେଲା ଗୋପୀନାଥପୁର ପଞ୍ଚାୟତର ଏକାଧିକ ଗ୍ରାମ ଅନ୍ଧାରରେ ରହିଛି। ଭାଙ୍ଗି ପଡିଥିବା ବିଦ୍ୟୁତ୍ ଖୁଣ୍ଟ ସମ୍ପ୍ରସାରଣ କରାଯାଇ ନାହିଁ । ଅନ୍ୟପଟେ ବିଦ୍ୟୁତ୍ ସଂଯୋଗ କାର୍ଯ୍ୟ ମନ୍ଥର ଗତିରେ ଚାଲିଛି। ବାରମ୍ବାର ଅଭିଯୋଗ ସତ୍ତ୍ବେ ସେସୁ ପକ୍ଷରୁ କୌଣସି ପଦକ୍ଷେପ ଗ୍ରହଣ କରାଯାଉ ନ ଥିବା ଗ୍ରାମବାସୀ କହିଛନ୍ତି। ପ୍ରଥମେ ୨୦, ପରେ୨୩, ତା’ ପରେ ୨୫ ପରେ ୨୭ ତାରିଖରେ ବିଦ୍ୟୁତ୍ ଚାର୍ଜ କରାଯିବ ବୋଲି ପ୍ରତିଶ୍ରୁତି ଦେଇଥିଲେ। ୪୮ ଘଣ୍ଟା ବିତିଲାଣି। ତଥାପି ସେସୁ ପକ୍ଷରୁ କୌଣସି ପଦକ୍ଷେପ ଗ୍ରହଣ କରାଗଲା ନାହିଁ । ବୁଧବାର ସନ୍ଧ୍ୟା ସୁଦ୍ଧା ଲାଇନ ଚାର୍ଜ କରା ନ ଗଲେ ପୁଣି ରାଜରାସ୍ତାକୁ ଓହ୍ଲାଇବେ ବୋଲି ଗ୍ରାମବାସୀ ଚେତାବନୀ ଦେଇଛନ୍ତି। ସେସୁ ନିର୍ବାହୀଯନ୍ତ୍ରୀ ଶିବ ପ୍ରସାଦ ସ୍ବାଇଁ କୁହନ୍ତି ଯୁଦ୍ଧକାଳୀନଭିତ୍ତିରେ ବିଦ୍ୟୁତ୍ ସଜାଡିବା କାର୍ଯ୍ୟ ଜାରିରହିଛି। ଯଥାଶୀଘ୍ର ବିଦ୍ୟୁତ୍ ସଂଯୋଗ ଦିଆଯିବ ବୋଲି ସେ କହିଛନ୍ତି ।
