ପାରାଦୀପ, ୫ା୧୧(ସ୍ବ.ପ୍ର.): କଳିଙ୍ଗ ବାଲିଯାତ୍ରାକୁ ନେଇ ଭାଜପା-ବିଜେଡି ଖବରଦାତା ସମ୍ମିଳନୀ କରିଥିଲେ। ଏଥିରେ ପରସ୍ପରର ଦୋଷ ଲଦାଲଦି ହୋଇଥିଲେ। ଭାଜପା ନେତା ବିଭୁପ୍ରସାଦ ତରାଇ, ସମ୍ପଦ ସ୍ବାଇଁ ସୂଚନା ଦେଇ କହିଥିଲେ, ବାଲିଯାତ୍ରା ପାଇଁ ଶିଳ୍ପ ସଂସ୍ଥା ଓ କିଛି ବଦାନ୍ୟ ବ୍ୟକ୍ତି ଅର୍ଥ ଦେଉଛନ୍ତି। ମାତ୍ର ସେହି ଅର୍ଥକୁ ପ୍ରଶାସନିକ ଅଧିକାରୀ ଓ ବିଜେଡି ନେତା ହରିଲୁଟ୍ କରୁଛନ୍ତି। ଏହିଭଳି ଅନେକ ଦୁର୍ନୀତି ଚାଲିଛି। ଭାଜପା ଏହି ଦୁର୍ନୀତି ବିରୋଧରେ ଗଣତାନ୍ତ୍ରିକ ଆନ୍ଦୋଳନ ଚଳାଇଥିବାବେଳେ ବିଜେଡି ନେତା ଭୟଭୀତ ହୋଇପଡ଼ିଛନ୍ତି। ସେମାନେ ଏବେ ପୋଲିସ ଓ ପ୍ରଶାସନକୁ ହାତବାରିଶି କରି ଭଣ୍ଡୁର କରିବା ପାଇଁ ଅପଚେଷ୍ଟା ଚଳାଇଛନ୍ତି। ମାତ୍ର ଦଳ ପୂର୍ବବତ୍ ଧାରଣା ବଳବତ୍ତର ରଖିବ। ଦରକାର ହେଲେ ପୌରାଞ୍ଚଳର ୧୯ଟି ଯାକ ଓ୍ବାର୍ଡରେ ପଥପ୍ରାନ୍ତ ସଭାକରି ସମସ୍ତଙ୍କ ମୁଖା ଖୋଲିଦେବ।
ବିଜେଡି ନଗର ସଭାପତି ସୁମନ୍ତ କୁମାର ବିଶ୍ୱାଳ ଓ ସମ୍ପାଦକ ତଥା ପୌରାଧ୍ୟକ୍ଷ ବସନ୍ତ ବିଶ୍ୱାଳ କହିଛନ୍ତି, ପୌରପାଳିକା ସାଧାରଣ ଜନତାଙ୍କ ପାଇଁ ଅନେକ ଜନହିତକର କାର୍ଯ୍ୟ କରିଛି। ଏପରି ପ୍ରଗତିରେ ଈର୍ଶାନ୍ବିତ ହୋଇ ଭାଜପାର ଠିକାଦାରରୁ ନେତା ହୋଇଥିବା ନେତା ବୀତସ୍ଫୃହ ହୋଇଛନ୍ତି। କଳିଙ୍ଗ ବାଲିଯାତ୍ରାର ଏକ ଛୋଟ ଘଟଣାକୁ ନେଇ ଡ୍ରାମା ଚଳାଇଛନ୍ତି। ବାଲିଯାତ୍ରା ଜିଲା ପ୍ରଶାସନର କାର୍ଯ୍ୟ। ପୌରପାଳିକା କେବଳ ସହାୟତା କରିଥାଏ। ଏଥିରେ ୧୨୦ଜଣ ସଦସ୍ୟ ଅଛନ୍ତି। ଯେଉଁଥିରେ ଧାରଣା ଦେଇଥିବା ନେତା ସମ୍ପଦକଙ୍କ ପିତା ନିର୍ମଳ ସ୍ବାଇଁ ଓ ପୂର୍ବତନ ଏମ୍ପି ବିଭୂପ୍ରସାଦ ତରାଇ ଅଛନ୍ତି। ଆଗାମୀ ଦିନରେ ପୌର ନିର୍ବାଚନ ଥିବାରୁ କଳିଙ୍ଗ ବାଲିଯାତ୍ରା ଭଳି ସାଂସ୍କୃତିକ ଅନୁଷ୍ଠାନକୁ ଏହା ଭିତରେ ଯୋଡ଼ୁଛନ୍ତି। ଏପରି ହୀନ ଉଦ୍ୟମ କରି ବାଲିଯାତ୍ରାକୁ ସେମାନେ ବନ୍ଦ କରିବାକୁ ଯେଉଁ ଅପଚେଷ୍ଟା ଚଳାଇଛନ୍ତି ସେଥିରେ ବିଫଳ ହେବେ ବୋଲି କହିଛନ୍ତି। ଅପରପକ୍ଷେ ରାତି ୮ଟାରେ ପାରାଦୀପରେ ୫ରୁ ଊର୍ଦ୍ଧ୍ୱ ସ୍ବେଚ୍ଛାସେବୀ ସଂଗଠନ ପାନ୍ଥନିବାସଠାରେ ଏକ ଖବରଦାତା ସମ୍ମିଳନୀ କରି ବିଜେଡିକୁ ସମର୍ଥନ ଜଣାଇଥିବା ସୂଚନା ମଳିଛି।
