ଚେଷ୍ଟର-ଲି-ଷ୍ଟ୍ରିଟ୍, ୫।୭ (ପି.ଟି.)- ନ୍ୟୁଜିଲାଣ୍ଡ ଉଇକେଟ୍କିପର ବ୍ୟାଟ୍ସମ୍ୟାନ ଟମ୍ ଲଥାମ କହିଛନ୍ତି ୧୯୯୨ ବିଶ୍ୱକପ୍ରେ ତାଙ୍କ ବାପା ରଡ୍ ଲଥାମ ଯାହା ହାସଲ କରିଥିଲେ ଚଳିତ ସଂସ୍କରଣରେ ସେ ଏହାଠାରୁ ଆଗକୁ ଯିବାକୁ ଲକ୍ଷ୍ୟ ରଖିଛନ୍ତି। ୧୯୯୨ ବିଶ୍ୱକପ୍ରେ ନ୍ୟୁଜିଲାଣ୍ଡ ଦଳ ସେମିଫାଇନାଲରେ ପ୍ରବେଶ କରିଥିବାବେଳେ ପାକିସ୍ତାନ ନିକଟରୁ ପରାସ୍ତ ହୋଇ ବିଦାୟ ନେଇଥିଲା। ନ୍ୟୁଜିଲାଣ୍ଡ ପକ୍ଷରୁ ୪ ଟେଷ୍ଟ ଓ ୩୩ ଦିନିକିଆ ମ୍ୟାଚ୍ ଖେଳିଥିବା ରଡ୍ ୧୯୯୨ ବିଶ୍ୱକପ୍ରେ କିଓ୍ବି ଦଳର ସଦସ୍ୟ ରହିଥିଲେ। ‘ସେହି ବିଶ୍ୱକପ୍ ସମ୍ପର୍କରେ ବାପାଙ୍କ ସହିତ ବହୁଥର ଆଲୋଚନା କରିଛି। ୧୯୯୨ ପରି କ୍ରିକେଟ ମହାକୁମ୍ଭର ଚଳିତ ଦ୍ୱାଦଶ ସଂସ୍କରଣ ମଧ୍ୟ ସମାନ ଫର୍ମାଟ୍ର। ଆଶାକରୁଛି ସେମାନେ ଯାହା ହାସଲ କରିଥିଲେ ଆମେ ନିଶ୍ଚୟ ଆଗକୁ ଯିବୁ’ ବୋଲି ଟମ୍ କହିଛନ୍ତି।
ଆଇସିସି ବିଶ୍ୱକପ୍ର ଏକ ଗୁରୁତ୍ୱପୂର୍ଣ୍ଣ ମୁକାବିଲାରେ ବୁଧବାର ନ୍ୟୁଜିଲାଣ୍ଡ ୧୧୯ ରନରେ ଆୟୋଜକ ଇଂଲଣ୍ଡ ନିକଟରୁ ପରାସ୍ତ ହୋଇଛି। ଏହି ମ୍ୟାଚ୍ରେ ଲଥାମ ଅର୍ଦ୍ଧଶତକୀୟ ଇନିଂସ ଖେଳିଥିଲେ ମଧ୍ୟ ଦଳକୁ ପରାଜୟରୁ ରକ୍ଷା କରିପାରି ନ ଥିଲେ। ଏହି ବିଜୟ ସହ ଅଷ୍ଟ୍ରେଲିଆ ଓ ଭାରତ ପରେ ୩ୟ ଦଳ ଭାବେ ଇଂଲଣ୍ଡ ସେମିଫାଇନାଲରେ ପ୍ରବେଶ କରିଛି। ଅପରପକ୍ଷରେ ନ୍ୟୁଜିଲାଣ୍ଡ ୧୧ ପଏଣ୍ଟ ସହ ୪ର୍ଥ ସ୍ଥାନରେ ରହିଛି। ଯଦି ପାକିସ୍ତାନ (୧୦ ପଏଣ୍ଟ) ଏହାର ଅନ୍ତିମ ମ୍ୟାଚ୍ରେ ଶୁକ୍ରବାର ବାଂଲାଦେଶକୁ ୩୧୬ ରନ୍ ବ୍ୟବଧାନରେ ପରାସ୍ତ କରେ ତେବେ ନ୍ୟୁଜିଲାଣ୍ଡକୁ ପଛରେ ପକାଇ ସେମିଫାଇନାଲରେ ପହଞ୍ଚତ୍ବ। କିନ୍ତୁ ପାକିସ୍ତାନ ପାଇଁ ଏହା ଏକ କଷ୍ଟସାଧ୍ୟ ଲକ୍ଷ୍ୟ ହୋଇଥିବାରୁ ନ୍ୟୁଜିଲାଣ୍ଡ ଅନ୍ତିମ-୪ରେ ସ୍ଥାନ ହାସଲ କରିବାର ଯଥେଷ୍ଟ ସମ୍ଭାବନା ସୃଷ୍ଟି ହୋଇଛି।
