ଭଞ୍ଜନଗର,୩୧/୧୨(ବାବୁଲା ପ୍ରଧାନ)- ଗଞ୍ଜାମ ଜିଲା ଭଞ୍ଜନଗର ନିୟନ୍ତ୍ରିତ ବଜାର କମିଟି ସମ୍ମିଳନୀ ହଲ୍ରେ ବୁଧବାର “Protect Today, Secure Tomorrow” ଶୀର୍ଷକ ଅଧୀନରେ ଏକ ପରିବେଶ ଆଇନ୍ ସଚେତନତା ଶିବିର ଅନୁଷ୍ଠିତ ହୋଇଯାଇଛି । ତାଲୁକ ଆଇନ୍ ସେବା କମିଟି, ଭଞ୍ଜନଗର ତରଫରୁ ଜାତୀୟ ଆଇନ୍ ସେବା ପ୍ରାଧିକରଣ (NALSA)ଙ୍କ ଦିଗନିର୍ଦ୍ଦେଶ ଅନୁଯାୟୀ ଏହି ଶିବିର ହୋଇଥିଲା । ମୁଖ୍ୟ ଅତିଥି ଭାବେ ଭଞ୍ଜନଗର ଅତିରିକ୍ତ ଜିଲା ଓ ଦୌରାଜଜ୍ ତଥା ଅଧ୍ୟକ୍ଷ, ତାଲୁକ ଆଇନ୍ ସେବା କମିଟି ସେଖ୍ ମହମ୍ମଦ କଏସ ଯୋଗଦେଇ ପରିବେଶ ସୁରକ୍ଷା ସହ ଆଇନଗତ ସଚେତନତାର ଆବଶ୍ୟକତା ଉପରେ ଆଲୋକପାତ କରିଥିଲେ।
ସେ କହିଥିଲେ ଯେ ସ୍ୱସ୍ଥ ପରିବେଶ ମାନବ ଜୀବନର ମୌଳିକ ଅଧିକାର ଓ ପରିବେଶ ସୁରକ୍ଷା ପାଇଁ ଆଇନଗତ ଜ୍ଞାନ ନିହାତି ଆବଶ୍ୟକ । ଏସ୍ଡିପିଓ ଡ. ଦୀପକ କୁମାର ମିଶ୍ର, ସହାୟକ କଲେକ୍ଟର ରାମଚନ୍ଦ୍ର ମହାପାତ୍ର ଓ ଆର
ଏମ୍ ସି ଭଞ୍ଜନଗର ସମ୍ପାଦକ ସୁମନ୍ତ କୁମାର ସାହୁ ଉପସ୍ଥିତ ରହି ପରିବେଶ ପ୍ରଦୂଷଣ, ସ୍ୱାସ୍ଥ୍ୟ ସମସ୍ୟା ଓ ସାଧାରଣ ଲୋକଙ୍କ ଆଇନଗତ ସୁରକ୍ଷା ସମ୍ପର୍କରେ ମତାମତ ରଖିଥିଲେ।
କାର୍ଯ୍ୟକ୍ରମରେ ଆଇନ୍ ସେବା କମିଟି ସଦସ୍ୟ ଡ. ପୂର୍ଣ୍ଣଚନ୍ଦ୍ର ତ୍ରିପାଠୀ ଓ ଅଳକା ମଞ୍ଜରି ପଟ୍ଟନାୟକ ମଧ୍ୟ ଯୋଗଦେଇ ପରିବେଶ ସମ୍ପର୍କିତ ଆଇନ, ଅଭିଯୋଗ ନିରାକରଣ ବ୍ୟବସ୍ଥା ଓ ସାଧାରଣ ଲୋକ କିପରି ଆଇନ୍ ସେବାର ସହାୟତା ନେଇପାରିବେ ସେ ସମ୍ପର୍କରେ ସଚେତନ କରାଇଥିଲେ । ଏହି ଶିବିରରେ ବିଭିନ୍ନ ବର୍ଗର ସାଧାରଣ ଲୋକ, ମହିଳା, କାର୍ଯ୍ୟରତ ଶ୍ରମିକ ଓ ସ୍ଥାନୀୟ ପ୍ରତିନିଧିମାନେ ଉପସ୍ଥିତ ରହି ପରିବେଶ ସୁରକ୍ଷା ଓ ଆଇନଗତ ଅଧିକାର ସମ୍ପର୍କରେ ଗୁରୁତ୍ୱପୂର୍ଣ୍ଣ ଜ୍ଞାନ ଲାଭ କରିଥିଲେ ।
