ବଡ଼ବିଲ, ୨୭ା୪(ସ୍ବ.ପ୍ର.)-ବାଇକ୍ ଚୋରି ଘଟଣାରେ କେନ୍ଦୁଝର ଜିଲା ବଡ଼ବିଲ ପୋଲିସ ଆଉ ଜଣେ ଅଭିଯୁକ୍ତଙ୍କୁ ରବିବାର ସୟାବାଲି ଅଞ୍ଚଳରୁ ଗିରଫ କରିଛି। ଗିରଫ ଅଭିଯୁକ୍ତ ହେଲେ ସୟାବାଲି ଗ୍ରାମର ଅଜ୍ଜୁ ଖାନ ଓରଫ ଏମଡି ସଦା।
ବଡ଼ବିଲ ଥାନା ଅନ୍ତର୍ଗତ ଠାକୁରାଣୀରୁ ଅର୍ଜୁନ ମହାନ୍ତଙ୍କଠାରୁ ଦୁର୍ବୃତ୍ତମାନେ ବାଇକ୍ ଲୁଟିନେଇଥିଲେ। ଏନେଇ ବଡ଼ବିଲ ପୋଲିସ ଥାନାରେ ଏକ ମାମଲା(ନଂ. ୩୨/୨୦) ରୁଜୁ କରିଥିଲା। ଏହି ଘଟଣାର ତଦନ୍ତ କରି ଗତ କିଛି ଦିନ ତଳେ ପୋଲିସ ଲୁଟ୍ ହୋଇଥିବା ବାଇକ ଉଦ୍ଧାର କରିବା ସହ ସମ୍ପୃକ୍ତ ୨ଜଣଙ୍କୁ ଗିରଫ କରିଥିଲା। ରବିବାର ଏହି ଘଟଣାରେ ସମ୍ପୃକ୍ତ ସଦାଙ୍କୁ ଗିରଫ କରି କୋର୍ଟଚାଲାଣ କରିଥିବା ଥାନା ଆଇଆଇସି ସୁଶାନ୍ତ ଦାଶ ସୂଚନା ଦେଇଛନ୍ତି।
