ଝୁମ୍ପୁରା, ୧୭।୨(ଡି.ଏନ.ଏ.)-ଝୁମ୍ପୁରା ବସଷ୍ଟାଣ୍ଡ ପ୍ରବେଶ ଦ୍ୱାର ପାଖରେ ହିଁ ରହିଛି ବିପଦସଙ୍କୁଳ ବିଦ୍ୟୁତ ଖୁଣ୍ଟ। ଖୁଣ୍ଟ ଉପରେ ଝୁଲି ରହିଛି ୧୧କେଭି ଉଚ୍ଚ ଶକ୍ତି ସମ୍ପନ୍ନ ବିଦ୍ୟୁତ ତାର। ବସଷ୍ଟାଣ୍ଡ ପ୍ରବେଶ ପଥରେ ଥିବା ଏହି ଲୁହା ଖୁଣ୍ଟଟି ଗାଡି ଧକ୍କାରେ ହିଁ ବଙ୍କାଟଙ୍କା ହୋଇ ଛୋଟ ହୋଇଯାଇଛି। ଏହାଦ୍ୱାରା ୧୧କେଭି ତାର ମଧ୍ୟ କମ୍ ଉଚ୍ଚତାରେ ରହିଛି। ସବୁ ସମୟରେ ଦୁର୍ଘଟଣାର ସମ୍ଭାବନା। ପ୍ରତ୍ୟହ ବସଷ୍ଟାଣ୍ଡ ଭିତରକୁ ବହୁ ଛୋଟବଡ ଯାତ୍ରୀବାହୀ ଗାଡ଼ିର ଯାତାୟାତ ରହିଛି। ଯାତ୍ରୀବାହୀ ବସର ଉପର ହୁଡ ବିଦ୍ୟୁତ ତାର ସହ ଛୁଇଁବା ଅବସ୍ଥାରେ ଆସି ଯାଉଛି। ଯେ କୌଣସି ସମୟରେ ମଧ୍ୟ ବଡ ଦୁର୍ଘଟଣା ହେବାର ସମ୍ଭାବନା ରହିଛି। ଏ ନେଇ ବଜାରବାସୀଙ୍କ ପକ୍ଷରୁ ନେସ୍କୋର ଦୃଷ୍ଟି ଆକର୍ଷଣ କରାଯିବା ସହିତ ଖୁଣ୍ଟ ବଦଳାଯାଇ ବିଦ୍ୟୁତ ତାରଗୁଡିକୁ ଉଚ୍ଚା କରାଯିବାକୁ ଦାବି ହୋଇଛି। ହେଲେ ନେସ୍କୋ କର୍ତ୍ତୃପକ୍ଷ ସବୁ ସମୟରେ କେବଳ ପ୍ରତିଶ୍ରୁତିରେ କାମ ଚଳାଇ ନେଉଛନ୍ତି। ଖୁଣ୍ଟ ବଦଳାଯିବା ପ୍ରସଙ୍ଗ ନେଇ ପଚାରିବାରୁ ଝୁମ୍ପୁରା ନେସ୍କୋ ସେକଶନର ଯନ୍ତ୍ରୀ ଲମ୍ବୋଦର ବାରିକ ଏବଂ ଚମ୍ପୁଆସ୍ଥିତ ନେସ୍କୋର ସହକାରୀ ଯନ୍ତ୍ରୀ ଆର.ଏନ. ପାତ୍ର କହିଲେ ଯେ, ତୁରନ୍ତ ଏହାର ସମାଧାନ କରାଯିବ।
