ବରଗଡ଼ ଅଫିସ,୨୦।୧୦: ବରଗଡ଼ ବନଖଣ୍ଡ ବିଭାଗ ଆକ୍ରୋଶମୂଳକଭାବେ ଜିଲାର ନୃସିଂହନାଥ ବନାଞ୍ଚଳରେ କାର୍ଯ୍ୟରତ ପାରା ବନ କର୍ମଚାରୀଙ୍କ ବିରୋଧରେ କାର୍ଯ୍ୟାନୁଷ୍ଠାନ ନେବା ଘଟଣାକୁ ନେଇ ପ୍ରତିବାଦର ସ୍ବର ତେଜିବାରେ ଲାଗିଛି। ବନ ବିଭାଗର ଏଭଳି କାର୍ଯ୍ୟାନୁଷ୍ଠାନର ସମ୍ମୁଖୀନ ହୋଇଥିବା ଝାରବନ୍ଧ ବ୍ଲକ ଘୁଚାପାଲି ଗ୍ରାମର ଅନିରୁଦ୍ଧ ସେଠ୍ ସପରିବାର ବରଗଡ଼ ବନଖଣ୍ଡ ଅଧିକାରୀଙ୍କ କାର୍ଯ୍ୟାଳୟ ସମ୍ମୁଖରେ ଶନିବାର ପୂର୍ବାହ୍ନରୁ ରବିବାର ପର୍ଯ୍ୟନ୍ତ ଅନଶନରେ ବସିଛନ୍ତି। ଅନିରୁଦ୍ଧଙ୍କ ସମେତ ସ୍ତ୍ରୀ ସସ୍ମିତା, ଝିଅ ବବ୍ଲି, ପୁଅ ବବଲୁ ଏବଂ ଅନ୍ୟ ୩ଜଣ ବନ ପାରା କର୍ମଚାରୀ ପ୍ରଦୀପ ସାହୁ, ପରେଶ ଦାଶ ଓ ଅବିନାଶ ପଟ୍ଟନାୟକ ସାମିଲ ଅଛନ୍ତି। ନୃସିଂହନାଥରେ ଗଛଟାକୁ ନେଇ ଫଟୋ ସୋସିଆଲ ମିଡ଼ିଆରେ ଭାଇରାଲ ହେବା ସହିତ ବିଭିନ୍ନ ଗଣମାଧ୍ୟମରେ ଖବର ପ୍ରକାଶ ପାଇଥିଲା। ତେବେ ସେହି ଫଟୋ ସେମାନେ ଉତ୍ତୋଳନ କରି ଗଣମାଧ୍ୟମକୁ ଦେଇଥିବା କହି ବନ ବିଭାଗ ସେମାନଙ୍କୁ ଗତ ଅଗଷ୍ଟ ମାସରୁ ନିଲମ୍ବିତ କରି ଆକ୍ରୋଶମୂଳକ କାର୍ଯ୍ୟାନୁଷ୍ଠାନ ନେଇଥିବା ଅନିରୁଦ୍ଧ ଅଭିଯୋଗ କରିଛନ୍ତି। ଏହି ଘଟଣାରେ ୪ଜଣଙ୍କୁ ନିଲମ୍ବନ କରାଯାଇ ଥିବାବେଳେ ୩ଜଣଙ୍କ ଉପରୁ ନିଲମ୍ବନ ଆଦେଶ ପ୍ରତ୍ୟାହାର କରାଯାଇଛି।
ଅନ୍ୟପକ୍ଷରେ ଅନିରୁଦ୍ଧଙ୍କ ଉପରୁ ନିଲମ୍ବନ ଆଦେଶ ହଟାଯାଇ ନାହିଁ। ଫଳରେ ବନ ବିଭାଗର ଏଭଳି ଆକ୍ରୋଶମୂଳକ କାର୍ଯ୍ୟାନୁଷ୍ଠାନର ପ୍ରତିବାଦରେ ଅନିରୁଦ୍ଧଙ୍କ ସପରିବାର ଅନଶନକୁ ଓହ୍ଲାଇଛନ୍ତି। ବାପାଙ୍କୁ ଚାକିରି ନ ମିଳିବା ପର୍ଯ୍ୟନ୍ତ ସେମାନେ ଅନ୍ନ ଛୁଇବେ ନାହିଁ ବୋଲି ପଞ୍ଚମ ଶ୍ରେଣୀରେ ପଢୁଥିବା ଅନିରୁଦ୍ଧଙ୍କ ଝିଅ ବବ୍ଲି ଏବଂ ଅଷ୍ଟମ ପଢୁଥିବା ପୁଅ ବବ୍ଲୁ କହିଛନ୍ତି। ତେବେ ଏଠାରୁ ପ୍ରାୟ ୧୫୦ କି. ମି ଦୂରରୁ ଆସି ଜିଲା ସଦର ମହକୁମାରେ ରହିଥିବା ବନଖଣ୍ଡ ଅଧିକାରୀଙ୍କ ଅଫିସ ସମ୍ମୁଖରେ ଏହି ଅନଶନ ଚାଲିଥିଲେ ସୁଦ୍ଧା ଜିଲା ଶିଶୁ ମଙ୍ଗଳ ସମିତି କର୍ମକର୍ତ୍ତାଙ୍କ ବ୍ୟତୀତ ଅନ୍ୟ କୌଣସି ଅଧିକାରୀ ଆଲୋଚନା ପାଇଁ ପହଞ୍ଚିନାହାନ୍ତି। ଦୀର୍ଘ ୨୪ ଘଣ୍ଟା ଧରି ଚାଲିଥିବା ଅନଶନରେ ୨ଶିଶୁ ମଧ୍ୟ ଭୋକ ଉପାସରେ ରହିବା ଘଟଣା ଏଠାରେ ଆଲୋଚନାର ବିଷୟ ହୋଇଛି। ଆମ ଆଦ୍ମୀ ପାର୍ଟିର ଭବାନୀ ପ୍ରସାଦ ସାହୁ, ଅମିତାଭ ପାତ୍ର ପ୍ରମୁଖ ଅନଶନସ୍ଥଳରେ ପହଞ୍ଚି ଅନଶନକାରୀଙ୍କୁ ଭେଟିଥିଲେ। ଜିଲା ପ୍ରଶାସନ ଅନଶନକାରୀଙ୍କ ଦାବି ପୂରଣ ସହିତ ସେମାନଙ୍କ ଅନଶନ ଭାଙ୍ଗିବା ଦିଗରେ ପଦକ୍ଷେପ ନେବା ପାଇଁ ଆମ ଆଦମୀ ପାର୍ଟିର ଏହି ପ୍ରତିନିଧିମାନେ ଦାବି କରିଛନ୍ତି।
