ଅନୁଗୋଳ ଅଫିସ, ୧୦।୫ – ରାଜ୍ୟ ଜେଲ ବିଭାଗ ନିର୍ଦ୍ଦେଶକ ସନ୍ତୋଷ ଉପାଧ୍ୟାୟ ସମସ୍ତ ଜେଲ୍ ପାଇଁ ଜାରି କରିଥିବା କଟକଣା ଅନୁଗୋଳରେ ପାଳନ କରାଯାଉ ନ ଥିବା ଅଭିଯୋଗ ହୋଇଥିଲା। ଏ ନେଇ ‘ଧରିତ୍ରୀ’ରେ ଶୁକ୍ରବାର ଖବର ପ୍ରକାଶ ପରେ ଅନୁଗୋଳ ଜେଲ୍ କର୍ତ୍ତୃପକ୍ଷ ଚେତିଛନ୍ତି। ଏଣିକି କଏଦୀ କିମ୍ବା ବିଚାରାଧୀନ ବନ୍ଦୀଙ୍କ ସହ ସାକ୍ଷାତ କରିବାକୁ ଯାଉଥିବା ସମ୍ପର୍କୀୟମାନେ କଟକଣା ଅନୁଯାୟୀ କେବଳ ଭିଡିଓ କନଫରେନ୍ସିଂ ଜରିଆରେ ଦେଖାକରି ପାରିବେ। ଏଥିପାଇଁ ଜେଲ୍ରେ କ୍ୟାମେରା ଲଗାଯିବା ପାଇଁ ତାର ଟଣା ଯାଉଥିବା ବେଳେ ପରିସରକୁ ବାହାର ଲୋକ ଯେପରି ପଶି ନ ପାରିବେ ସେଥିପାଇଁ ଫାଟକ ବନ୍ଦ କରାଯାଇଛି। ତେବେ ନିର୍ଦ୍ଦେଶ ପାଳନ ନ ହେବା ଅଭିଯୋଗର ଅନୁଧ୍ୟାନ କରାଯିବ ବୋଲି ରାଜ୍ୟ ଜେଲ ବିଭାଗ ନିର୍ଦ୍ଦେଶକ ସନ୍ତୋଷ ଉପାଧ୍ୟାୟ ସୂଚନା ଦେଇଛନ୍ତି। ଅନୁଗୋଳ କରାଗାର ସୁପରିଣ୍ଟେଣ୍ଡେଣ୍ଟ ସୁଚିତ୍ର ଦାସ କହିଛନ୍ତି, ଶୁଖିଲା ଖାଦ୍ୟ ଭିତରକୁ ନ ଛାଡ଼ିବା ପାଇଁ ନିର୍ଦ୍ଦେଶ ହୋଇନାହିଁ। ତେଣୁ ରନ୍ଧା ଖାଦ୍ୟ ନୁହେଁ କେବଳ ଶୁଖିଲା ଖାଦ୍ୟ ଛଡ଼ାଯାଉଥିବା ସେ କହିଛନ୍ତି। ତେବେ ଭିଡିଓ କନ୍ଫରେନ୍ସିଂ ଜରିଆରେ ସାକ୍ଷାତ ପାଇଁ ମାସେ ତଳୁ ନିର୍ଦ୍ଦେଶ ଆସିଥିଲେ ମଧ୍ୟ କାହିଁକି ବ୍ୟବସ୍ଥା କରା ନ ଯାଇ ପୂର୍ବପରି ସାକ୍ଷାତ ପାଇଁ ସମ୍ପର୍କୀୟଙ୍କୁ ସିଧାସଳଖ ଛଡ଼ାଯାଉଥିଲା ବୋଲି ସହରବାସୀ ପ୍ରଶ୍ନ କରିଛନ୍ତି।
