ଢେଙ୍କାନାଳ ଅଫିସ,୨୬ା୧୨ – ପ୍ରାକୃତିକ ସୌନ୍ଦର୍ଯ୍ୟରେ ଭରା ଢେଙ୍କାନାଳର ପର୍ଯ୍ୟଟନସ୍ଥଳୀ ସବୁଜିମାମୟ ସପ୍ତଶଯ୍ୟାରେ ବୁଧବାର ବଡ଼ଦିନ ଅବସରରେ ବଣଭୋଜି ବେଶ୍ ଜମିଥିଲା। ଚଳିତବର୍ଷ ବହୁ ସଂଖ୍ୟକ ପର୍ଯ୍ୟଟକ ସପ୍ତଶଯ୍ୟାରେ ଭିଡ଼ ଜମାଇଥିଲେ। ବଣଭୋଜି ସାଙ୍ଗକୁ ସେମାନଙ୍କ ନାଚ, ଗୀତରେ ସପ୍ତଶଯ୍ୟାର ପରିବେଶ ଉତ୍ସବମୁଖର ହୋଇପଡିଥିଲା।
ଚଳିତବର୍ଷ ପର୍ଯ୍ୟଟକଙ୍କ ଭିଡକୁ ନଜରରେ ରଖି ସପ୍ତଶଯ୍ୟା ପଞ୍ଚାୟତ ପକ୍ଷରୁ ବଣଭୋଜି ସ୍ଥଳକୁ ଅଧିକ ସଫାସୁତରା କରାଯିବା ସହ ବହୁ ପିଣ୍ଡି ନିର୍ମାଣ କରାଯାଇଥିଲା। ସେହିପରି ଯାତ୍ରୀମାନଙ୍କ ପାଇଁ ଉଦ୍ଦିଷ୍ଟ ବିଶ୍ରାମସ୍ଥଳ କାର୍ଯ୍ୟକ୍ଷମ ହୋଇଥିଲା। ସ୍ବତନ୍ତ୍ର ଭାବେ ପାର୍କିଂ ବ୍ୟବସ୍ଥା କରାଯାଇଥିଲା। ଫଳରେ ଅଧିକ ସଂଖ୍ୟାରେ ପର୍ଯ୍ୟଟକ ଆସିଥିଲେ ବି ବଣଭୋଜି ନିମନ୍ତେ କୌଣସି ଅସୁବିଧାର ସମ୍ମୁଖୀନ ହୋଇ ନ ଥିଲେ। ଚଳିତବର୍ଷ ଢେଙ୍କାନାଳ ଓ ଅନୁଗୋଳର ବିଭିନ୍ନ ଅଞ୍ଚଳ ସମେତ ବାରିପଦା, ବାଲେଶ୍ୱର, ଭଦ୍ରକ, କେନ୍ଦୁଝର, ଯାଜପୁର, କଟକ, ଖୋର୍ଦ୍ଧା, ବରଗଡ, ସମ୍ବଲପୁର, ବ୍ରହ୍ମପୁର ସହ ପଶ୍ଚିମବଙ୍ଗରୁ ବସ୍ ଏବଂ ଅନ୍ୟ ଗାଡ଼ି ଯୋଗେ ପର୍ଯ୍ୟଟକମାନେ ସପ୍ତଶଯ୍ୟା ଆସିଥିଲେ। ସେହିପରି ବିଭିନ୍ନ ସ୍କୁଲ, କଲେଜ ଛାତ୍ରୀଛାତ୍ର ମଧ୍ୟ ବଣଭୋଜିର ମଜା ନେଉଥିବା ଦେଖାଯାଇଥିଲା। ବଣଭୋଜି କରିବା ସହିତ ଯାତ୍ରୀମାନେ ପାହାଡ ଖୋଲରେ ଥିବା ଶ୍ରୀରଘୁନାଥ ଜୀଉଙ୍କୁ ଦର୍ଶନ କରିଥିଲେ। ସପ୍ତଶଯ୍ୟା ସରପଞ୍ଚ ଜେଶସ୍ ସାହୁ ନିଜେ ଉପସ୍ଥିତ ରହି ଶାନ୍ତିଶୃଙ୍ଖଳା ରକ୍ଷାରେ ସହଯୋଗ କରିଥିଲେ। ପର୍ଯ୍ୟଟକଙ୍କ ଭିଡକୁ ନଜରରେ ରଖି ସଶସ୍ତ୍ର ପୋଲିସ ମଧ୍ୟ ମୁତୟନ କରାଯାଇଥିଲା। ସରପଞ୍ଚ କୁହନ୍ତି ଯେ, ସୋଲାର ବ୍ୟବସ୍ଥା ମାଧ୍ୟମରେ ବିଦ୍ୟୁତ୍ ଯୋଗାଣ ହେଉଛି। କିନ୍ତୁ ଘନ ଜଙ୍ଗଲ ଯୋଗୁ ସୂର୍ଯ୍ୟଙ୍କ କିରଣ ନ ପଡିଲେ ସୋଲାର ବ୍ୟବସ୍ଥା କାମ କରୁନାହିଁ। ତେଣୁ ସ୍ଥାୟୀ ବିଦ୍ୟୁତ୍ ବ୍ୟବସ୍ଥା ସହ ପାନୀୟ ଜଳ ସମସ୍ୟାର ସମାଧାନ କରାଗଲେ ପର୍ଯ୍ୟଟକଙ୍କ ପାଇଁ କୌଣସି ଅସୁବିଧା ରୁହନ୍ତା ନାହିଁ। ବଡଦିନରେ ପ୍ରାୟ ୧୦ ହଜାର ଲୋକଙ୍କ ସମାଗମ ହୋଇଥିବାରୁ ଆସନ୍ତା ରବିବାର ଏବଂ ନୂଆବର୍ଷ ଦିନ ଆହୁରି ଅଧିକ ପର୍ଯ୍ୟଟକଙ୍କ ଭିଡ ହେବାର ସମ୍ଭାବନା ରହିଛି ବୋଲି ସରପଞ୍ଚ ପ୍ରକାଶ କରିଛନ୍ତି।
