ନୁଆଦିଲ୍ଲୀ: ସୋସିଆଲ ମିଡିଆ ଏବେ ବେଶ୍ ଲୋକପ୍ରିୟତା ହାସଲ କରିଛି। ଦୂରଦୂରାନ୍ତରେ ରହୁଥିବା ଲୋକଙ୍କ ସହ ଯୋଗାଯୋଗରେ ରହିବାର ଏହା ମୁଖ୍ୟ ମାଧ୍ୟମ ପାଲଟିଥିବା ବେଳେ ଦେଶବିଦେଶର ଟିକିନିଖି ଖବର ମଧ୍ୟ ଏହା ମାଧ୍ୟମରେ ସମସ୍ତଙ୍କ ନିକଟରେ ଖୁବ୍ ସହଜରେ ପହଞ୍ଚତ୍ପାରୁଛି। ଇନ୍ଷ୍ଟାଗ୍ରାମ୍, ଫେସ୍ବୁକ୍ ଓ ଟୁଇଟର ଭଳି ସୋସିଆଲ ସାଇଟ୍ ଏବେ ଅଧିକରୁ ଅଧିକ ବ୍ୟବହାର ହେଉଛି। ଏବେ ସୋସିଆଲ ସାଇଟ୍ ଟୁଇଟରରେ ଜଣେ ୟୁଜର ଶେୟାର କରିଥିବା ପୁରାତନ ମନ୍ଦିରର କିଛି ଫଟୋ ଖୁବ୍ ଭାଇରାଲ ହୋଇଛି। ଫଟୋ ଶେୟାର କରିଥିବା ୟୁଜର ଜଣକ ଫଟୋ ସମ୍ପର୍କିତ କିଛି ଆଶ୍ଚର୍ଯ୍ୟ କଲା ଭଳି ତଥ୍ୟ ଉଲ୍ଲେଖ କରିଛନ୍ତି, ଯାହାକୁ ନେଇ ସୋସିଆଲ ମିଡିଆରେ ଖୁବ୍ ଚର୍ଚ୍ଚା ଚାଲିଛି। ସେଥିରେ ଟୁଇଟର ୟୁଜର ଭି ଗୋପାଲନ୍ ଲେଖିଛନ୍ତି, ଆଜିକାଲି ଯେଉଁ ନୂଆ ଫ୍ୟାଶନ ଟ୍ରେଣ୍ଡ ଚାଲିଛି, ପ୍ରାଚୀନ ଭାରତର ଲୋକେ ମଧ୍ୟ ସମାନ ଧରଣର ଫ୍ୟାଶନ ଆପଣାଉଥିଲେ। ଏବଂ ସେବେକାର ଲୋକେ ଫ୍ୟାଶନକୁ ନେଇ ବହୁତ ଆଗରେ ଥିଲେ। ସେ ତାମିଲନାଡୁସ୍ଥିତ ୯୦୦ବର୍ଷ ପୁରୁଣା ମନ୍ଦିରର ଚତୁଃପାର୍ଶ୍ୱରେ ଥିବା କେତେକ ମୂର୍ତ୍ତିର ଫଟୋ ଶେୟାର କରି ଲେଖିଛନ୍ତି ଯେ, ପ୍ରାଚୀନ କାଳରେ ଲୋକମାନେ ବ୍ୟବହାର କରୁଥିବା ଚପଲ ଭଳି ଅବିକଳ ଚପଲ ଏବେକାର ଏକ କମ୍ପାନୀ ପ୍ରସ୍ତୁତ କରୁଛି। ଏଥିସହ ସେ ୮୦୭ ବର୍ଷ ପୁରାତନ ଏକ ମୂର୍ତ୍ତିର ଫଟୋ ଶେୟାର କରିଛନ୍ତି, ଯେଉଁଥିରେ ମୂର୍ତ୍ତିରେ ଥିବା ମହିଳା ଜଣକ ହିଲ୍ ଚପଲ ପିନ୍ଧିଥିବା ଦେଖାଯାଉଛି। ଏହାକୁ ନେଇ ଟୁଇଟରରେ ବେଶ୍ ଚର୍ଚ୍ଚା ହେଉଛି। ଏବେକାର ଲୋକଙ୍କ ତୁଳନାରେ ପ୍ରାଚୀନ ଭାରତୀୟଙ୍କ ଫ୍ୟାଶନ ସେନ୍ସ ବହୁ ଊର୍ଦ୍ଧ୍ୱରେ ଥିବା କେତେଜଣ କହୁଥିବା ବେଳେ ଆଉ କେତେଜଣ ସେତେବେଳର ଲୋକେ ଫ୍ୟାଶନକୁ ନେଇ କେତେ ଆଗରେ ଥିଲେ ବୋଲି କମେଣ୍ଟ କରିଛନ୍ତି।
