ପାଲେରମୋ, ୧୧ା୮(ଏପି)-ଫ୍ରାନ୍ସର ଫିଓନା ଫେରୋ ପାଲ୍ରମୋ ଲେଡିଜ୍ ଓପନ୍ ଟେନିସ୍ ଚାମ୍ପିୟନ ହୋଇଛନ୍ତି। ସେ ଫାଇନାଲରେ ଚତୁର୍ଥ ସିଡ୍ ଇସ୍ତୋନିଆର ଆନେଟ୍ କୋଣ୍ଟାଭିଟ୍କୁ ପରାସ୍ତ କରି ବିପର୍ଯ୍ୟୟ ସୃଷ୍ଟି କରିଥିଲେ। ୫ ମାସ ମଧ୍ୟରେ ଏହା ତାଙ୍କର ପ୍ରଥମ ଟୁର୍ ଲେଭଲ ଟେନିସ ଟାଇଟଲ। ଫାଇନାଲ ପ୍ରବେଶ ପଥରେ ସେ ମାତ୍ର ଗୋଟିଏ ସେଟ୍ରେ ପରାଜିତ ହୋଇଥିଲେ। ବିଶ୍ୱର ୫୩ ର଼୍ୟାଙ୍କିଙ୍ଗପ୍ରାପ୍ତ ଫେରୋ ରବିବାର ଟାଇଟଲ ମୁକାବିଲାକୁ ୬-୨, ୭-୫ ସେଟ୍ରେ ଜିତିଥିଲେ। ୨୩ବର୍ଷୀୟା ଖେଳାଳିଙ୍କ ଏହାର ହେଉଛି ଦ୍ୱିତୀୟ ଡବ୍ଲ୍ୟୁଟିଏ ଟାଇଟଲ। ଅନ୍ୟପକ୍ଷରେ କୋଣ୍ଟାଭିଟ୍ଙ୍କର ୬ଟି ଫାଇନାଲ ମଧ୍ୟରୁ ଏହା ଥିଲା ୫ମ ପରାଜୟ। କରୋନା ଭାଇରସ ଯୋଗୁ ଗତ ମାର୍ଚ୍ଚ ମାସରୁ ସମଗ୍ର ବିଶ୍ୱରେ କ୍ରୀଡ଼ା ପ୍ରତିଯୋଗିତା ସସ୍ପେଣ୍ଡ ରଖାଯିବା ପରେ ଏହା ଥିଲା ପ୍ରଥମ ଅଫିସିଆଲ ଟେନିସ ଇଭେଣ୍ଟ। ଟୁର୍ନାମେଣ୍ଟରେ ସ୍ବାସ୍ଥ୍ୟ ପ୍ରୋଟୋକଲ୍କୁ କଡ଼ାକଡ଼ି ଭାବେ ଲାଗୁ କରାଯାଇଥିଲା। ଅଳ୍ପ ସଂଖ୍ୟକ ବଲ୍ବୟ ଓ ସୀମିତ ସଂଖ୍ୟକ ଖେଳପ୍ରେମୀଙ୍କ ଉପସ୍ଥିତିରେ ମ୍ୟାଚ ଖେଳାଯାଇଥିଲା। ମ୍ୟାଚ୍ ପରେ ପ୍ରତିଦ୍ୱନ୍ଦ୍ୱୀ ଖେଳାଳିଙ୍କ ମଧ୍ୟରେ କରମର୍ଦ୍ଦନ ହୋଇ ନ ଥିଲା। ଟୁର୍ନାମେଣ୍ଟର ଖେଳାଳି ଓ ଅଫିସିଆଲଙ୍କ ପ୍ରତି ୪ ଦିନରେ ଥରେ ଲେଖାଏଁ କୋଭିଡ୍-୧୯ ଟେଷ୍ଟ ହୋଇଥିଲା। ଜଣେ ଖେଳାଳିଙ୍କର ପଜିଟିଭ ଆସିବାରୁ ସେ ପ୍ରତିଯୋଗିତାରୁ ଓହରିଯାଇଥିଲେ।
