ନୂଆଦିଲ୍ଲୀ,୧୪।୬: ଅଷ୍ଟ୍ରେଲିଆ ବିପକ୍ଷ ବିଶ୍ୱକପ୍ ମ୍ୟାଚ୍ରେ ଶତକୀୟ ଇନିଂସବେଳେ ଶିଖର ଧାଓ୍ବନଙ୍କ ବାମହାତ ବୁଢ଼ା ଆଙ୍ଗୁଠିରେ ଆଘାତ ଲାଗିଥିଲା। ଏହି ସମସ୍ୟା ଦୂର ହେଲା ପରେ ଧାଓ୍ବନ ସଫଳତାର ସହ କ୍ରିକେଟକୁ ଫେରିବେ। ହେଲେ ବାମହାତୀ ଓପନରଙ୍କ ଫିଲ୍ଡିଂରେ ସମସ୍ୟା ଦେଖାଯିବ ବୋଲି ଅନୁଭବ କରୁଛନ୍ତି ଫିଲ୍ଡିଂ କୋଚ୍ ଆର. ଶ୍ରୀଧର। ଧାଓ୍ବନଙ୍କ ଲାଗି ସ୍ଲିପ ଅଞ୍ଚଳରେ ଫିଲ୍ଡିଂ କରିବା ଏକ ଚ୍ୟାଲେଞ୍ଜ ହେବ। ବଲ ଥ୍ରୋ କରିବାରେ ତାଙ୍କୁ କୌଣସି ଅସୁବିଧା ହେବନାହିଁ। ମାତ୍ର ଫିଲ୍ଡିଂ ଓ କ୍ୟାଚ୍ ଧରିବାରେ ଧାଓ୍ବନଙ୍କୁ କିଛି ସମସ୍ୟାର ସମ୍ମୁଖୀନ ହେବାକୁ ପଡ଼ିପାରେ। ଇନିଂସର ପ୍ରାରମ୍ଭିକ ପର୍ଯ୍ୟାୟରେ ସେ ସ୍ଲିପ ଅଞ୍ଚଳରେ ଫିଲ୍ଡିଂ କରନ୍ତି। ଏଥିନେଇ ଆମେ ତାଙ୍କୁ ପ୍ରଥମେ ହାଲୁକା ବଲରେ ଅଭ୍ୟାସ କରାଇବୁ। ପରେ କ୍ରିକେଟ ବଲ ବ୍ୟବହାର କରିବୁ। ମାତ୍ର ଏହା ତାଙ୍କ ପାଇଁ ବଡ଼ ଚ୍ୟାଲେଞ୍ଜ ହେବ। ତାଙ୍କ ଫିଲ୍ଡିଂ ସମସ୍ୟା ଓ ବ୍ୟାଟିଂବେଳେ ବାମ ହାତକୁ ମଧ୍ୟ ନଜର ରଖିବ ଲାଗି ଆମକୁ ୧୦ ରୁ ୧୨ ଦିନ ଲାଗିବ ବୋଲି ଫିଲ୍ଡିଂ କୋଚ୍ କହିଛନ୍ତି।
