ନୂଆଦିଲ୍ଲୀ,୩୦।୧: ନିର୍ଭୟା ମାମଲାରେ ୪ ଦୋଷୀଙ୍କୁ ଫାଶୀ ଦିଆଯିବା ପାଇଁ ଆଉ ବାକି ରହିଛି ଗୋଟିଏ ଦିନ। ଫେବୃୟାରୀ ୧ରେ ଫାଶୀଦଣ୍ଡ ଲାଗିଁ ମୃତ୍ୟୁ ଓ୍ବାରେଣ୍ଟ୍ ଜାରି ହୋଇଛି। ୧୯୮୮ ଦିଲ୍ଲୀ ଜେଲ୍ ମାନୁଆଲ୍ ଅନୁସାରେ ଗୋଟିଏ ଆପରାଧୀକ ମାମଲାରେ ଫାଶୀ ଏକାଧିକ ଦୋଷୀଙ୍କୁ ଦଣ୍ଡାଦେଶ ହେଲେ ସେମାନଙ୍କୁ ଏକା ସହିତ ଫାଶୀ ଦିଆଯିବ। ଜେଲ୍ ମାନୁଆଲ୍ ଆଧାରରେ ନିର୍ଭୟା ଦୋଷୀଙ୍କୁ ଏକାଠି ଫାଶୀ ଦିଆଯିବାର ପ୍ରସ୍ତୁତି ଶେଷ ହୋଇଛି। ତେବେ ୩ ଦୋଷୀଙ୍କ ପାଖରେ ଏବେ ବି ରହିଛି ଲାଇଫ୍ଲାଇନ୍। ଇତିମଧ୍ୟରେ ମୁକେଶ ସିଂଙ୍କ ଫାଶୀରୁ ରକ୍ଷା ପାଇବା ସମସ୍ତ ବିକଳ୍ପ ଶେଷ ହୋଇଥିବାବେଳେ ଗୁରୁବାର ଅକ୍ଷୟ ସିଂଙ୍କ କ୍ୟୁରେଟିଭ୍ ପିଟିଶନ୍ ସୁପ୍ରିମ୍କୋର୍ଟରେ ଖାରଜ ହୋଇଛି । ଅକ୍ଷୟଙ୍କ ରାଜକ୍ଷମା ବିଚାରାଧୀନ ରହିଛି। ଏବେ ପଓ୍ବନ ଗୁପ୍ତାଙ୍କ ପାଖରେ କ୍ୟୁରେଟିଭ୍ ପିଟିଶନ୍ ଦାଖଲ କରିବାର ସୁଯୋଗ ରହିଛି। ଦୋଷୀ ବିନୟ ଶର୍ମା ଏବଂ ଅକ୍ଷୟ ସିଂଙ୍କ ପାଖରେ ରାଜକ୍ଷମା ଏବଂ ଏହା ଖାରଜ ହେବା ପରେ ସୁପ୍ରିମ୍କୋର୍ଟରେ ଆବେଦନ କରିବା ଆଦି ୨ଟି ବିକଳ୍ପ ରହିଛି। ପଓ୍ବନଙ୍କ କ୍ୟୁରେଟିଭ୍ ପିଟିଶନ୍ ଖାରଜ ହେଲେ ସେ ଏହାପରେ ରାଷ୍ଟ୍ରପତିଙ୍କ ପାଖରେ ରାଜକ୍ଷମା ଲାଗି ଆବେଦନ କରିପାରିବେ। ସେହିଭଳି ରାଜକ୍ଷମା ଖାରଜ ହେଲେ ଏହା ବିରୋଧରେ ସେ ସୁପ୍ରିମ୍କୋର୍ଟରେ ମଧ୍ୟ ସେମାନେ ଆବେଦନ କରିପାରିବେ। ଫାଶୀ ଦିନ ପାଖେଇ ଆସୁଥିବାବେଳେ ଦୋଷୀଙ୍କ ପକ୍ଷରୁ ଗୋଟିଏ ପରେ ଗୋଟିଏ ଆଇନ ଖେଳ ଆରମ୍ଭ ହୋଇ ଚାଲିଛି।
