କେନ୍ଦୁଝର,୧୨।୧୨(ସ୍ବ.ପ୍ର.): କେନ୍ଦୁଝର ଜିଲା ସଦର ବ୍ଲକ ଅନ୍ତର୍ଗତ ରାଇସୁଆଁ ପ୍ରାଥମିକ ସ୍ବାସ୍ଥ୍ୟକେନ୍ଦ୍ରର ଫାର୍ମାସିଷ୍ଟଙ୍କ ବଦଳିକୁ ନେଇ ଅସନ୍ତୋଷ ବଢୁଛି। ଏନେଇ ସ୍ଥାନୀୟ ଲୋକେ ଗୁରୁବାର ସିଡିଏମଓଙ୍କ ପାଖକୁ ଯାଇ ଦାବିପତ୍ର ପ୍ରଦାନ କରିଛନ୍ତି। ଉକ୍ତ ଡାକ୍ତରଖାନା ଉପରେ ରାଇସୁଆଁ ଓ ଗୋପୀନାଥପୁର ପଞ୍ଚାୟତର ଲୋକେ ନିର୍ଭର କରିଥା’ନ୍ତି। ଦୀର୍ଘବର୍ଷ ହେଲା ଡାକ୍ତର ଅଭାବ ଥିବାରୁ ଫାର୍ମାସିଷ୍ଟ ପ୍ରଦୀପ ଚନ୍ଦ୍ର ମହାନ୍ତି ସ୍ଥାନୀୟ ଲୋକଙ୍କୁ ସ୍ବାସ୍ଥ୍ୟସେବା ଯୋଗାଇ ଆସୁଛନ୍ତି। ସେ ଥିବାରୁ ଉକ୍ତ ଅଞ୍ଚଳର ଲୋକମାନେ କେନ୍ଦୁଝରକୁ ଚିକିତ୍ସା ପାଇଁ ଆସିବାକୁ ପଡୁ ନ ଥିଲା। ଏଣୁ ତାଙ୍କ ବଦଳି ବାତିଲ କରିବାକୁ ସ୍ଥାନୀୟ ଜୟନୁଲ ଆବେଦିନ ଓ ଅନ୍ୟମାନେ ସିଡିଏମଓଙ୍କୁ ଭେଟି ନିବେଦନ କରିଛନ୍ତି।
