Posted inଖେଳ

ପ୍ରଥମ ଶ୍ରେଣୀ କ୍ରିକେଟର୍‌ଙ୍କ ଆର୍ଥିକ ସ୍ଥିତିକୁ ଗୁରୁତ୍ୱ ଦେବି: ଗାଙ୍ଗୁଲି

ମୁମ୍ବାଇ, ୧୫।୧୦ (ପି.ଟି.)- ପୂର୍ବତନ ଅଧିନାୟକ ସୌରଭ ଗାଙ୍ଗୁଲି ବିଶ୍ୱର ସବୁଠାରୁ ବିତ୍ତଶାଳୀ କ୍ରିକେଟ୍‌ ବୋର୍ଡ ଭାରତୀୟ କ୍ରିକେଟ୍‌ କଣ୍ଟ୍ରୋଲ ବୋର୍ଡ (ବିସିସିଆଇ)ର ନୂତନ ସଭାପତି ଭାବେ ପଦ ମଣ୍ଡନ କରିବା ଏକ ପ୍ରକାର ନିଶ୍ଚିତ ହୋଇଯାଇଛି। ଏକ ଗୁରୁତ୍ୱପୂର୍ଣ୍ଣ ସମୟରେ ଏଭଳି ମର୍ଯ୍ୟାଦାଜନକ ପଦ ଅଳଙ୍କରଣ କରିବାକୁ ଯାଉଥିବା ଗାଙ୍ଗୁଲି ପ୍ରଥମଶ୍ରେଣୀ କ୍ରିକେଟର୍‌ଙ୍କ ଆର୍ଥିକସ୍ଥିତିରେ ସୁଧାର ଆଣିବା ଉପରେ ପ୍ରାଥମିକତା ଦେବେ ବୋଲି କହିଛନ୍ତି। ଏଥିସହ ସେ ଭାରତୀୟ କ୍ରିକେଟ୍‌ ବୋର୍ଡର ଛବି ସୁଧାରିବାକୁ ଲକ୍ଷ୍ୟ ରଖିଛନ୍ତି। ମାନ୍ୟବର ସୁପ୍ରିମକୋର୍ଟଙ୍କ ଦ୍ୱାରା ନିଯୁକ୍ତ ପ୍ରଶାସକ ସମିତି (ସିଓଏ) ଦ୍ୱାରା ୨୦୧୭ରେ ଅନୁରାଗ ଠାକୁର ପ୍ରତ୍ୟାହୃତ ହେବାର ଦୀର୍ଘ ୩୩ ମାସ ପରେ ବିସିସିଆଇର ପ୍ରଥମ ସଭାପତି ଭାବେ ଗାଙ୍ଗୁଲି ପଦ ଅଳଙ୍କୃତ କରିବାକୁ ଯାଉଛନ୍ତି। ମାତ୍ର ୯ ମାସ ପାଇଁ ବିସିସିଆଇର ସଭାପତି ପଦରେ ରହିବାକୁ ଯାଉଥିବା ଗାଙ୍ଗୁଲି ‘କିଛି ଭଲ’ କରିବା ପାଇଁ ଏହାକୁ ଏକ ସୁବର୍ଣ୍ଣ ସୁଯୋଗ ବୋଲି କହିଛନ୍ତି। ‘କୁଲିଂ ଅଫ୍‌ ପିରିୟଡ୍‌’ ପାଇଁ ଆସନ୍ତା ଜୁଲାଇରେ ଗାଙ୍ଗୁଲିଙ୍କ କାର୍ଯ୍ୟକାଳ ସମାପ୍ତ ହେବ। ଏକମାତ୍ର ବ୍ୟକ୍ତି ଭାବେ ସୌରଭ ବିସିସିଆଇ ସଭାପତି ପଦ ପାଇଁ ନାମାଙ୍କନ ପତ୍ର ଦାଖଲ କରିଛନ୍ତି।
ସବୁଠାରୁ ମର୍ଯ୍ୟାଦାଜନକ ପଦ ଗ୍ରହଣ କରିବାକୁ ଯାଉଥିବା ଗାଙ୍ଗୁଲି କହିଛନ୍ତି,‘ ଏହା ଏକ ଚମତ୍କାର ଅନୁଭବ ଯେ ମୁଁ ଦେଶ ପାଇଁ ଖେଳିଲି ଏବଂ ଦେଶର ନେତୃତ୍ୱ ନେବାର ମଧ୍ୟ ସୁଯୋଗ ପାଇଲି। ଏଥିସହ ଏଭଳି ଏକ ସମୟରେ ବିସିସିଆଇର ଦାୟିତ୍ୱ ଗ୍ରହଣ କରିବାକୁ ଯାଉଛି ଯେଉଁ ସମୟରେ ଏହାର ଛବି ଗତ ୩ ବର୍ଷ ହେଲା ଖରାପ ରହିଛି। ଏହା ମୋ ପାଇଁ ଏକ ସୁବର୍ଣ୍ଣ ସୁଯୋଗ ଯେ, ମୋତେ କିଛି ଭଲ କରିବାକୁ ମିଳିଛି’। ଆଗାମୀ କିଛି ମାସ ମଧ୍ୟରେ ଆମେ ସବୁକିଛି ଠିକ୍‌ କରିପାରିବୁ ଏବଂ ଭାରତୀୟ କ୍ରିକେଟ୍‌କୁ ପୁଣିଥରେ ପୂର୍ବସ୍ଥିତିକୁ ଆଣିପାରିବୁ। ଆପେକ୍ସ କାଉନସିଲ୍‌ର ସଦସ୍ୟ ଥିବା ମୋର ୮ ଜଣିଆ ସାଥୀ ଏକାଠି ମିଶି କାମ କରିବା ସହ ବିସିସିଆଇର ପୂର୍ବ ଗୌରବକୁ ଫେରାଇ ଆଣିବାକୁ ଚେଷ୍ଟା କରିବୁ’ ବୋଲି ଭାରତ ପକ୍ଷରୁ ୧୧୩ ଟେଷ୍ଟ ଓ ୩୧୧ ଦିନିକିଆ ମ୍ୟାଚ୍‌ରେ ପ୍ରତିନିଧିତ୍ୱ କରିଥିବା ଗାଙ୍ଗୁଲି ଏକ ସାକ୍ଷାତକାର ଅବସରରେ କହିଛନ୍ତି। ସେହିଭଳି ପ୍ରଥମ ଶ୍ରେଣୀ କ୍ରିକେଟର୍‌ଙ୍କୁ ସବୁଠାରୁ ଅଧିକ ଗୁରୁତ୍ୱ ଦେବାକୁ ସମସ୍ତଙ୍କ ସହିତ ଆଲୋଚନା କରିବି। ଗତ ୩ ବର୍ଷ ହେଲା ସିଓଏକୁ ଏନେଇ ଅନୁରୋଧ କରିଆସିଛି। କିନ୍ତୁ ସେମାନେ ଏହା ଶୁଣି ନାହାନ୍ତି। ପ୍ରଥମ ଶ୍ରେଣୀ କ୍ରିକେଟର୍‌ଙ୍କ ଆର୍ଥିକସ୍ଥିତିରେ ସୁଧାର ଆଣିବା ମୋର ପ୍ରଥମ ଲକ୍ଷ୍ୟ ହେବ’ ବୋଲି ଅନ୍ତର୍ଜାତୀୟ କ୍ରିକେଟ୍‌ରେ ୧୮ ହଜାରରୁ ଊର୍ଦ୍ଧ୍ୱ ରନ ସଂଗ୍ରହ କରିଥିବା ଗାଙ୍ଗୁଲି ଏହି ଅବସରରେ ଉଲ୍ଲେଖ କରିଛନ୍ତି।
ଚ୍ୟାଲେଞ୍ଜ ରହିବ:
ନିର୍ଦ୍ୱନ୍ଦ୍ୱରେ ବିସିସିଆଇ ସଭାପତି ଭାବେ ନିର୍ବାଚିତ ଭାବେ ନିର୍ବାଚିତ ହେବାକୁ ଯାଉଥିବାରୁ ତାଙ୍କ ସମ୍ମୁଖରେ ବଡ଼ ଚ୍ୟାଲେଞ୍ଜ ରହିବ ବୋଲି ଗାଙ୍ଗୁଲି ସ୍ବୀକାର କରିଛନ୍ତି। ‘ତୁମେ ନିର୍ଦ୍ୱନ୍ଦ୍ୱରେ ନିର୍ବାଚିତ ହୁଅ କିମ୍ବା ନ ହୁଅ ଯେହେତୁ ଏହା ବିଶ୍ୱର ସବୁଠାରୁ ଧନୀଶାଳୀ କ୍ରିକେଟ୍‌ ବୋର୍ଡ ତେଣୁ ଏକ ଦାୟିତ୍ୱ ରହିବ। ଆର୍ଥିକ ରୂପେ ଭାରତ କ୍ରିକେଟ୍‌ର ପାଓ୍ବାର ହାଉସ୍‌। ତେଣୁ ନିଶ୍ଚିତ ଭାବେ ଚ୍ୟାଲେଞ୍ଜ ରହିବ।
ପ୍ରଚାର କରିବେନି:
ଶନିବାର ଗାଙ୍ଗୁଲି ଗୃହମନ୍ତ୍ରୀ ଅମିତ୍‌ ଶାହଙ୍କୁ ଭେଟିଥିଲେ। ତେଣୁ ପଶ୍ଚିମବଙ୍ଗରେ ହେବାକୁ ଥିବା ଆଗାମୀ ନିର୍ବାଚନରେ ସେ ଭାଜପା ପାଇଁ ପ୍ରଚାର କରିବେ କି ବୋଲି ଖବରଦାତାମାନେ ପ୍ରଶ୍ନ କରିବାରୁ ଗାଙ୍ଗୁଲି ଏହାକୁ ଅଗ୍ରାହ୍ୟ କରିଦେଇଛନ୍ତି। ‘ମୋତେ ଏନେଇ କେହି କିଛି କହିନାହାନ୍ତି। କୌଣସି ରାଜନେତାଙ୍କ ସହ ମୋର ଯୋଗାଯୋଗ ନାହିଁ’ ବୋଲି ୪୭ ବର୍ଷୀୟ ଗାଙ୍ଗୁଲି କହିଛନ୍ତି।
ଡାଲମିଆ ମୋ ପିତୃତୁଲ୍ୟ:
ବିସିସିଆଇର ପୂର୍ବତନ ସଭାପତି ଜଗମୋହନ ଡାଲମିୟାଙ୍କୁ ସ୍ମରଣ କରି ଗାଙ୍ଗୁଲି ଭାବବିହ୍ବଳ ହୋଇଯାଇଥିଲେ। ‘କଦାପି ବିଶ୍ୱାସ କରିପାରୁନି କି ମୁଁ ଏହି ପଦରେ କାମ କରିବାର ସୁଯୋଗ ପାଇବି। ସେ ମୋର ପିତୃତୁଲ୍ୟ ଥିଲେ। ଏନ୍‌. ଶ୍ରୀନିବାସନ, ଅନୁରାଗ ଠାକୁରଙ୍କ ପରି ବିସିସିଆଇର କେତେଜଣ ଶ୍ରେଷ୍ଠ ସଭାପତି ରହିଥିଲେ।


Enter your email to get our daily news in your inbox.

All Right Reserved By Dharitri.Com

Posted inଖେଳ View All

ଚୌକା, ଛକା ବର୍ଷା କଲେ ଏହି କ୍ରିକେଟର୍‌: ଧୋନୀ, କୋହଲିଙ୍କୁ ପଛରେ ପକାଇଲେ

ସୌରାଷ୍ଟ୍ର୍ୟ,୧୧।୩: ବିଜୟ ହଜାରେ ଟ୍ରଫିରେ ସୌରାଷ୍ଟ୍ର ବିପକ୍ଷରେ ମୁମ୍ବାଇ ଅଧିନାୟକ ପୃଥ୍ବୀ ଶ’ ଚମତ୍କାର ଇନିଂସ ଖେଳିଛନ୍ତି। ସେ ମାତ୍ର ୧୨୩ ବଲରୁ ୧୮୫ ରନର...

ଦଶନ୍ଧିର ଓ୍ବିସ୍‌ଡେନ ଟି୨୦ ଦଳରେ କୋହଲି, ବୁମ୍‌ରା

ଲଣ୍ଡନ, ୩୦।୧୨(ପି.ଟି.)- ଭାରତୀୟ ଅଧିନାୟକ ବିରାଟ କୋହଲି ଓ ଦ୍ରୁତ ବୋଲର ଯଶପ୍ରୀତ ବୁମ୍‌ରା ଦଶନ୍ଧିର ଓ୍ବିସ୍‌ଡେନ ଟି୨୦ ଦଳରେ ସ୍ଥାନ ପାଇଛନ୍ତି। ତେବେ ମହେନ୍ଦ୍ର...

ଆଦାନୀ ଓ୍ବିଲ୍‌ମର ବିଜ୍ଞାପନରୁ ବାଦ୍‌ ପଡିଲେ ଗାଙ୍ଗୁଲି

ନୂଆଦିଲ୍ଲୀ,୬।୧: ପୂର୍ବତନ ଅଧିନାୟକ ତଥା ଭାରତୀୟ କ୍ରିକେଟ କଣ୍ଟ୍ରୋଲ ବୋର୍ଡ (ବିସିସିଆଇ) ସଭାପତି ସୌରଭ ଗାଙ୍ଗୁଲି ମୃଦୁ ହୃଦ୍‌ଘାତର ଶିକାର ହେବାର ୩ ଦିନ ପରେ...

ପାକିସ୍ତାନ ଦଳରେ ଯୁବ ବ୍ୟାଟ୍ସମ୍ୟାନ ଶାଫିକ୍‌

କରାଚୀ, ୨୦ା୧୦ (ପି.ଟି.)- ଆସନ୍ତା ମାସରେ ଜିମ୍ବାଓ୍ବେ ବିପକ୍ଷରେ ଖେଳାଯିବାକୁ ଥିବା ଅନ୍ତର୍ଜାତୀୟ ଦିନିକିଆ ଏବଂ ଟି୨୦ ସିରିଜ ପାଇଁ ପାକିସ୍ତାନ ୨୨ ଜଣିଆ ସମ୍ଭାବ୍ୟ...

ଅପ୍‌ଗ୍ରେଡ୍‌ ହେବ ୮ ଖେଲୋ ଇଣ୍ଡିଆ ସ୍ପୋଟର୍‌ସ ସେଣ୍ଟର ଅଫ୍‌ ଏକ୍ସିଲେନ୍ସି

ନୂଆଦିଲ୍ଲୀ,୧୭।୯(ପି.ଟି.): ଦେଶରେ ୮ଟି ଖେଲୋ ଇଣ୍ଡିଆ ଷ୍ଟେଟ୍‌ ସେଣ୍ଟର ଅଫ୍‌ ଏକ୍ସିଲେନ୍ସି (କେଆଇଏସ୍‌ସିଇ)କୁ ଅପ୍‌ଗ୍ରେଡ୍‌ କରାଯିବ। ଏ ନେଇ କେନ୍ଦ୍ର କ୍ରୀଡ଼ା ମନ୍ତ୍ରଣାଳୟ ଗୁରୁତ୍ୱପୂର୍ଣ୍ଣ ନିଷ୍ପତ୍ତି...

ସିନ୍‌ଙ୍କ ଚମତ୍କାର କାରନାମା: ମାତ୍ର ୩୬ ରନ୍‌ରେ ନେଲେ ୧୦ ଉଇକେଟ

କେପ୍‌ଟାଉନ୍‌,୨୧।୧୧: ଭାରତର ମହାନ ସ୍ପିନର୍‌ ଅନିଲ କୁମ୍ବଲେ ଟେଷ୍ଟ ମ୍ୟାଚ୍‌ର ଗୋଟିଏ ଇନିଂସରେ ୧୦ ଉଇକେଟ ନେଇଥିବା ସ୍ମୃତି ଆଜିବି ସମସ୍ତଙ୍କ ହୃଦୟରେ ସତେଜ ରହିଛି।...

ବ୍ରୋଞ୍ଜ ସହ ଶୁଟର୍‌ ଦୀପକଙ୍କୁ ଅଲିମ୍ପିକ ଯୋଗ୍ୟତା

ଦୋହା, ୫।୧୧ (ପି.ଟି.)- ଏଠାରେ ଚାଲିଥିବା ୧୪ତମ ଏସିଆନ ଚାମ୍ପିୟନଶିପ୍‌ ଶୁଟିଂ ପ୍ରତିଯୋଗିତାର ପୁରୁଷ ୧୦ ମିଟର ଏୟାର ରାଇଫଲ ଇଭେଣ୍ଟରେ ଭାରତର ଦୀପକ କୁମାର...

ଇଂଲଣ୍ଡ ଖେଳାଳି ଆଇପିଏଲ୍‌ର ବାକି ମ୍ୟାଚ୍‌ରେ ସାମିଲ ନ ହୋଇପାରନ୍ତି

ଲଣ୍ଡନ,୧୨।୫(ପି.ଟି.): ଇଣ୍ଡିଆନ ପ୍ରିମିୟର ଲିଗ୍‌ (ଆଇପିଏଲ) ଅନିର୍ଦ୍ଦିଷ୍ଟ କାଳ ପାଇଁ ସସ୍‌ପେଣ୍ଡ ହୋଇଛି। ତେବେ ଆଇପିଏଲ୍‌ର ବାକି ମ୍ୟାଚ୍‌ଗୁଡିକ ପୁଣିଥରେ ଆୟୋଜନ ହେଲେ ଇଂଲଣ୍ଡ ଖେଳାଳିମାନେ...

Advertisement
Archives

Model This Week