ତେନ୍ତୁଳିଖୁଣ୍ଟି,୧।୫(ଡି.ଏନ.ଏ.): ନବରଙ୍ଗପୁର ଜିଲା ତେନ୍ତୁଳିଖୁଣ୍ଟି ବ୍ଲକ ପରଜାବାରଙ୍ଗପଦର ଗ୍ରାମପଞ୍ଚାୟତ ଖାତିଗୁଡାଠାରେ ଜଳଯୋଗାଣ ପ୍ରକଳ୍ପ ରହିଛି। କିନ୍ତୁ ଏହା ଲୋକଙ୍କ ଆବଶ୍ୟକତା ପୂରଣ କରି ପାରୁ ନାହିଁ। ପ୍ରକଳ୍ପ ଥାଇ ମଧ୍ୟ ବହୁ ସାହିବାସିନ୍ଦା ପାନୀୟ ଜଳରୁ ବଞ୍ଚିତ ହେଉଛନ୍ତି। ଏହି ପ୍ରକଳ୍ପ ଦ୍ୱାରା ଖାତିଗୁଡାର ପାଇକ, ଗଉଡ, କୁମ୍ଭାର, ହରିଜନ, ଆଦିବାସୀ ଓ ଖ୍ରୀଷ୍ଟିଆନ ସାହି ସମେତ ଝାଲିଆଗୁଡା ମାର୍କେଟର ମାଉସୀମା ମନ୍ଦିର ପର୍ଯ୍ୟନ୍ତ ପାଣି ଯୋଗାଇବା ପାଇଁ ଷ୍ଟାଣ୍ଡ ପଏଣ୍ଟ ନିର୍ମାଣ କରାଯାଇଛି। ତେବେ ପ୍ରକଳ୍ପ ଆରମ୍ଭ ହେବାର କିଛି ଦିନ ପର୍ଯ୍ୟନ୍ତ ଝାଲିଆଗୁଡା ମାର୍କେଟର ପୋଲିସ ଷ୍ଟେଶନ ପର୍ଯ୍ୟନ୍ତ ପାଣି ଯୋଗାଣ ହୋଇଥିଲା । କିନ୍ତୁ ଗତ ୨ ବର୍ଷ ହେଲା ଏହି ପ୍ରକଳ୍ପ ଦ୍ୱାରା ଝାଲିଆଗୁଡା ମାର୍କେଟକୁ ଜଳଯୋଗାଣ କରାଯାଉନି । ଖାତିଗୁଡା ଗ୍ରାମର ସବୁସାହିକୁ ମଧ୍ୟ ପାଣି ଆସୁ ନଥିବାରୁ ଲୋକମାନେ ଅସନ୍ତୋଷ ପ୍ରକାଶ କରିଛନ୍ତି । ଜଳଯୋଗାଣ ପ୍ରକଳ୍ପର ଦୁଇଟି ଯାକ ବୋରଓ୍ବେଲରେ ମୋଟର ଫିଟିଂ କରି ଓଭରହେଡ ଟାଙ୍କିରେ ଜଳ ରଖାଯାଇ ଯୋଗାଣ କଲେ ଲକ୍ଷ୍ୟ ପୂରଣ ହୋଇପାରନ୍ତା । କିନ୍ତୁ ଜଳଯୋଗାଣ ପ୍ରକଳ୍ପର ଓଭରହେଡ ଟାଙ୍କି ନିର୍ମାଣ ଦିନଠାରୁ ଦିନଟିଏ ମଧ୍ୟ ବ୍ୟବହାର କରାଯାଇନାହିଁ । ଝାଲିଆଗୁଡା ମାର୍କେଟରେ ରହୁଥିବା ୧୩୦ ପରିବାର ପାଣି ପାଇଁ ଦୁଇଟି ନଳକୂପ ଏବଂ ଦୁଇଟି କୁଅ ଉପରେ ନିର୍ଭର କରୁଛନ୍ତି । ଝାଲିଆଗୁଡା ମାର୍କେଟ ଅଞ୍ଚଳକୁ ଜଳଯୋଗାଣ କରିବା ପାଇଁ ସରପଞ୍ଚ ବିଜୟ ଝୋଡିଆ କନିଷ୍ଠ ଯନ୍ତ୍ରୀ ଶିବରାମ ଦୀକ୍ଷିତଙ୍କୁ ଜଣାଇଥିଲେ ମଧ୍ୟ କିଛି ସୁଫଳ ମିଳି ନାହିଁ। ତୁରନ୍ତ ସମସ୍ୟାର ସମାଧାନ କରା ନଗଲେ ଜଳଯୋଗାଣ ପ୍ରକଳ୍ପରେ ତାଲା ପକାଯିବା ସହ ଆନ୍ଦୋଳନାତ୍ମକ ପଦକ୍ଷେପ ନିଆଯିବ ବୋଲି ଚେତାବନୀ ଦିଆଯାଇଛି।
