ଜୁନାଗଡ଼,୩୦।୪(ଡି.ଏନ୍.ଏ.)-କଳାହାଣ୍ଡି ଜିଲା ଜୁନାଗଡ଼ ବ୍ଲକ ମାଲିଗୁଡା ପଞ୍ଚାୟତ ବୋଦେଲ ଗ୍ରାମରେ ନିର୍ମାଣଧୀନ ପୋଲ, ଗାଡ଼ୱାଲ ନିର୍ମାଣ କାମ ନିମ୍ନମାନରେ ହେଉଥିବା ଗ୍ରାମବାସୀ ଅଭିଯୋଗ କରିଛନ୍ତି। ବୋଦେଲ-ବଣିଜରାକୁ ସଂଯୋଗ କରିବା ପାଇଁ ନିକଟସ୍ଥ ନାଳ(ସର) ଉପରେ ଜୁନାଗଡ଼ ଗ୍ରାମ୍ୟଉନ୍ନୟନ ବିଭାଗ ଉପବିଭାଜନ ଜରିଆରେ ପୋଲ,ରାସ୍ତା ଓ ଗାଡୱାଲ ନିର୍ମାଣ କରାଯାଉଛି। ଏଥିପାଇଁ ପ୍ରାୟ ୧ କୋଟିରୁ ଊର୍ଦ୍ଧ୍ୱ ଟଙ୍କା ବ୍ୟୟ ବରାଦ କରାଯାଇଛି। ଟେଣ୍ଡର ପାଇଥିବା ଠିକାଦାର ଆଉ ଜଣେ ଠିକାଦାରଙ୍କୁ ସେହି କାମ ଦେଇଛନ୍ତି। ପୋଲ ନିର୍ମାଣ ପାଇଁ ବେଡ କଂକ୍ରିଟରେ ଠିକ ଭାବେ ମେଟାଲ, ସିମେଣ୍ଟ ଓ ବାଲି ମିଶ୍ରଣ ହୋଇ ନ ଥିବା ଗ୍ରାମବାସୀ ଅଭିଯୋଗ କରିଛନ୍ତି। ସେହିପରି ଗାଡ଼ୱାଲ କାମ ମଧ୍ୟ ନିମ୍ନମାନର ହୋଇଛି। ଫଳରେ ଗାଡୱାଲର ତଳ ଭାଗରେ ଥିବା ସିମେଣ୍ଟ ଧସି ପଡିଥିବା ଦେଖିବାକୁ ମିଳିଛି। ଏଥିଯୋଗୁ ପୋଲ ଓ ଗାଡୱାଲର ସ୍ଥାୟିତ୍ୱକୁ ନେଇ ପ୍ରଶ୍ନବାଚୀ ସୃଷ୍ଟି ହୋଇଛି। କାମ ଚାଲିଥିବା ବେଳେ ବିଭାଗୀୟ ଅଧିକାରୀ ଉପସ୍ଥିତ ରହୁ ନ ଥିବାରୁ ନିମ୍ନମାନର କାମ ହେଉଥିବା ଅଭିଯୋଗ ହୋଇଛି। ଯେ କୌଣସି ସରକାରୀ ଉନ୍ନୟନ କାମ ଆରମ୍ଭ ପୂର୍ବରୁ ସୂଚନା ଫଳକ ଲଗାଯିବାର ନିୟମ ଥିଲେ ମଧ୍ୟ ସେଥିରେ ବ୍ୟତିକ୍ରମ ଦେଖିବାକୁ ମିଳିଛି।
ଏ ନେଇ ବିଭାଗୀୟ ଯନ୍ତ୍ରୀ ଭଗବାନ ଗୌଡଙ୍କୁ ପଚାରିବାରୁ ଖାଲି ଗାଡୱାଲ କାମ ଖରାପ ହୋଇଛି ବୋଲି ଶୁଣୁଛି। ଯଦି ଖରାପ ହୋଇଛି ତାକୁ ଭଙ୍ଗାଯାଇ ନୂତନ କରାଯିବ । ସୂଚନାଫଳକ ଠିକାଦାର ତିଆରି କରିଛନ୍ତି, କିନ୍ତୁ ଲଗେଇ ନାହାନ୍ତି। ଆଜି ଲଗାଯିବ ବୋଲି ସେ କହିଥିଲେ। ଭବାନୀପାଟଣା ଗ୍ରାମ୍ୟ ଉନ୍ନୟନ ବିଭାଗର ନିର୍ବାହୀ ଯନ୍ତ୍ରୀ କାଳିପଦ ମହାକୁଡଙ୍କୁ ଏ ସଂକ୍ରାନ୍ତରେ ପଚାରିବାରୁ ଅଭିଯୋଗର ତଦନ୍ତ ହେ।ଯଦି ଅଭିଯୋଗ ସତ ହୋଇଥାଏ ଆଇନ ଅନୁଯାୟୀ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ ବୋଲି ସେ କହିଛନ୍ତି।
