ବନ୍ତଳା,୭।୮ (ଡି.ଏନ.ଏ.):ଅନୁଗୋଳ ଜିଲା ବନ୍ତଳା ଥାନା ପୋକତୁଙ୍ଗା ସେବା ସମବାୟ ବ୍ୟାଙ୍କରୁ ସୋମବାର ରାତିରେ ଲୁଟ୍ ହୋଇଛି। ଦୁର୍ବୃତ୍ତମାନେ ବ୍ୟାଙ୍କ ଗ୍ରୀଲ ତାଡି ଭିତରେ ପଶିବା ସହ ଆଇରନ ଚେଷ୍ଟ ଉଠାଇ ନେଇଛନ୍ତି। ଏଥିସହିତ ୩ଟି ଗଡରେଜ ତାଡି ଦେଇଛନ୍ତି। ଏ ନେଇ ସେବା ସମବାୟ ବ୍ୟାଙ୍କ ସମ୍ପାଦକ ସୁଜିତ କୁମାର ପ୍ରଧାନ, ସଭାପତି ଫକୀର ପ୍ରଧାନ ଥାନାରେ ଲିଖିତ ଅଭିଯୋଗ କରିଛନ୍ତି। ଅନ୍ୟପକ୍ଷରେ ଉକ୍ତ ଆଇରନ ଚେଷ୍ଟ ମାଟିଆସାହି ପଞ୍ଚାୟତ କାର୍ଯ୍ୟାଳୟ ପଛ ସୋରିଷ ପାଳ ଜଙ୍ଗଲରେ ପଡିଥିବା ଖବର ପାଇ ପୋଲିସ ତାହାକୁ ଜବତ କରିଛି। ଆଇରନ ଚେଷ୍ଟ ଖୋଲି ନ ପାରି ଦୁର୍ବୃତ୍ତମାନେ ତାହାକୁ ଫିଙ୍ଗି ଦେଇଥିବା ଜଣାପଡ଼ିଛି। ଘଟଣାସ୍ଥଳରେ ଢେଙ୍କାନାଳ ସାଇଣ୍ଟିଫିକ ଟିମ୍ ଆସିଷ୍ଟାଣ୍ଟ ଡାଇରେକ୍ଟର ଶ୍ୟାମାମଣି ସାହୁ, ତପନ କୁମାର ପ୍ରଧାନ, ଫିଙ୍ଗର ଏକ୍ସପର୍ଟ ସନ୍ତୋଷ ଆଚାର୍ଯ୍ୟ, ଲାବରେଟୋରି ଆସିଷ୍ଟାଣ୍ଟ ଦେବ ବାରିକ, ଅନୁଗୋଳ ଡଗ୍ ସ୍କ୍ବାଡ୍ ଇନଚାର୍ଜ ଶଶି ଭୂଷଣ ପରିଡା, ଜଗନ୍ନାଥ ବେହେରା, ଏୟୁସିସି ବ୍ୟାଙ୍କ ସୁପରଭାଇଜର ବିପିନି ବିହାରୀ ସାହୁ ପ୍ରମୁଖ ପହଞ୍ଚି ତଦନ୍ତ ଚଳାଇଛନ୍ତି।
ଘଟଣାରୁ ଜଣାପଡ଼ିଛି, ଏହି ବ୍ୟାଙ୍କ ଉପରେ ପୋକତୁଙ୍ଗା, ଧୋକୁଟା, ନନ୍ଦପୁର ଆଦି ୩ ପଞ୍ଚାୟତର ୭ ହଜାରରୁ ଊଦ୍ଧର୍ବ ଚାଷୀ ନିର୍ଭର କରିଥାନ୍ତି। ଗତ ଜୁନ ୩୦ରେ ଖାଲଙ୍ଗା ସେବା ସମବାୟ ବ୍ୟାଙ୍କର ଗ୍ରୀଲ, କବାଟ ତାଡି ଆଇରନ ଚେଷ୍ଟ ଲୁଟ୍ ହୋଇଥିବାବେଳେ ସମାନ ଶୈଳୀରେ ଏଠାରୁ ଲୁଟ୍ ହୋଇଛି।
