ବନ୍ତଳା,୬ା୧୧(ଡି.ଏନ.ଏ.)-ଅନୁଗୋଳ ବ୍ଲକ ବନ୍ତଳା ଗୋଷ୍ଠୀ ସାସ୍ଥ୍ୟକେନ୍ଦ୍ର ଅଧୀନରେ ଥିବା ପୋକତୁଙ୍ଗା ଡମସାହିରେ ୨ ଦିନ ହେଲା ଝାଡ଼ାବାନ୍ତି ବ୍ୟାପୁଛି। ଇତିମଧ୍ୟରେ ୨୨ ଆକ୍ରାନ୍ତଙ୍କୁ ସ୍ଥାନୀୟ ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ର ଓ ଜିଲା ମୁଖ୍ୟ ଚିକିତ୍ସାଳୟରେ ଭର୍ତ୍ତି କରାଯାଇଛି। ଗ୍ରାମଦେବତୀଙ୍କ କୋପରୁ ଏପରି ହେଉଥିବା ବିଶ୍ୱାସ କରି କେତେଜଣ ଆକ୍ରାନ୍ତ ପୂଜାର୍ଚ୍ଚନା, ଝଡ଼ାଫୁଙ୍କା ସହ ଅଧିଆ ପଡ଼ୁଥିବା ବେଳେ ଗଁାରେ ଏକ ଡାକ୍ତରୀ ଟିମ୍ ରହି ସେମାନଙ୍କ ଚିକିତ୍ସା କରିବାକୁ ସାଧାରଣରେ ଦାବି ହେଉଛି।
ପ୍ରକାଶ ଯେ, ସୋମବାର ସକାଳୁ ଗଁାରେ ଝାଡ଼ାବାନ୍ତିରେ ଜଣେ ପରେ ଜଣେ ଆକ୍ରାନ୍ତ ହୋଇଥିଲେ। ମଙ୍ଗଳବାର ସୁଦ୍ଧା ସାହିର ତନ୍ମୟ ବେହେରା, ରୂପାଲି ବେହେରା, ନରେଶ ନାଏକ, ପଞ୍ଚୁ ବେହେରା, ମାନସ ବେହେରା, ଅମିତା ବେହେରା, ମରୁଆ ବେହେରା, ରଜତ ବେହେରା, ଅମିତା ବେହେରା, ଜାହ୍ନବୀ ବେହେରା, ପବିତ୍ର ବେହେରା, ରାଜ ବେହେରା, ସୁଜାତା ବେହେରା, ଦକ୍ଷଶ୍ରୀ ବେହେରା, ଶିଳ୍ପା ବେହେରା, ଦଣ୍ଡ ବେହେରା, ବିମଳା ବେହେରା, ହାଡ଼ିବନ୍ଧୁ ବେହେରା, ସୁରେଇ ବେହେରା, ପୁନି ବେହେରା, ଗଗନ ବେହେରା, ସଙ୍ଗୀତା ବେହେରା ପ୍ରମୁଖ ୨୨ ଆକ୍ରାନ୍ତଙ୍କୁ ବନ୍ତଳା ଓ ଜିଲା ମୁଖ୍ୟ ଚିକିତ୍ସାଳୟରେ ଭର୍ତ୍ତି କରାଯାଇଛି। ଏଥିସହିତ ଲକ୍ଷ୍ମୀ ବେହେରା, ଜତି ବେହେରା, କୁନ୍ଦନ ବେହେରା, ଶୈଳେନ୍ଦ୍ରୀ ବେହେରା, ପମି ବେହେରା, ଶୁଭଲକ୍ଷ୍ମୀ ବେହେରା ପ୍ରମୁଖ ଆକ୍ରାନ୍ତ ହୋଇ ଘରେ ରହିଛନ୍ତି। କେତେଜଣ ଗ୍ରାମଦେବତୀଙ୍କ କୋପ ଶାନ୍ତ ପାଇଁ ପୂଜାର୍ଚ୍ଚନା, ଝଡ଼ାଫୁଙ୍କା ସହ ଅଧିଆ ପଡ଼ିଛନ୍ତି। ଖବରପାଇ ସୋମବାର ରାତିରେ ବନ୍ତଳା ସ୍ବାସ୍ଥ୍ୟକେନ୍ଦ୍ର ଅଧିକାରୀ ଡା. ଘନଶ୍ୟାମ ବେହେରା ପହଞ୍ଚି ଆକ୍ରାନ୍ତମାନଙ୍କୁ ସ୍ବାସ୍ଥ୍ୟକେନ୍ଦ୍ର ଯିବା ପାଇଁ ପରାମର୍ଶ ଦେଇଥିଲେ। ମଙ୍ଗଳବାର ସକାଳେ ଡା. ଦୀପକ ସାହୁ, ଆକାଶ ଦେହୁରୀ, ଏଏନଏମ୍ ସଂଯୁକ୍ତା ସାହୁ, ଫାର୍ମାସିଷ୍ଟ ହରିସ ପାଳ, ଆଶାକର୍ମୀ ଅସକରା ସାହୁ ପ୍ରମୁଖ ଗଁାରେ ପହଞ୍ଚି ଜଳଉତ୍ସ, ଡ୍ରେନ୍ ଆଦିରେ ବ୍ଲିଚିଂ ପକାଇବା ସହିତ ମେଡିକାଲ ଯିବାକୁ ଲୋକମାନଙ୍କୁ ସଚେତନ କରିଥିଲେ। ତେବେ ଗଁାରେ ସ୍ବତନ୍ତ୍ର ଡାକ୍ତରୀ ଟିମ୍ ରହି ଆକ୍ରାନ୍ତଙ୍କ ଚିକିତ୍ସା କରିବା ପାଇଁ ଗ୍ରାମବାସୀ ଦାବି କରିଛନ୍ତି। ଅଳ୍ପ ଜାଗାରେ ୩୦୦ରୁ ଅଧିକ ପରିବାର ରହିବା, ଡ୍ରେନର ଦୁର୍ଗନ୍ଧ, ଖୋଲାରେ ମଳତ୍ୟାଗ ଓ ଅପରିଷ୍କାର ଜଳଉତ୍ସ ଯୋଗୁ ଝାଡ଼ାବାନ୍ତି ବ୍ୟାପୁଥିବା ସ୍ବାସ୍ଥ୍ୟକେନ୍ଦ୍ର ପକ୍ଷରୁ କୁହାଯାଇଛି। ଏ ବିଷୟରେ ବନ୍ତଳା ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ର ଅଧିକାରୀ ଘନଶ୍ୟାମ ବେହେରା କୁହନ୍ତି, ଖବରପାଇ ଉକ୍ତ ଗଁାକୁ ଯାଇଥିଲୁ। ଆକ୍ରାନ୍ତମାନଙ୍କୁ ବନ୍ତଳା ଡାକ୍ତରଖାନାରେ ରଖାଯାଇ ଚିକିତ୍ସା କରାଯାଉଛି। ଅତି ଗୁରୁତରଙ୍କୁ ଜିଲା ମୁଖ୍ୟ ଚିକିତ୍ସାଳୟକୁ ସ୍ଥାନାନ୍ତର କରାଯାଇଛି।
