ଭୁବନେଶ୍ୱର,୨୨।୬: ସୋମବାର ତୈଳ ଦର ପେଟ୍ରୋଲ ଲିଟର ପିଛା ୩୩ ପଇସା ଏବଂ ଡିଜେଲ ୫୮ ପଇସା ବୃଦ୍ଧି ଫଳରେ ଓଡିଶାରେ ପେଟ୍ରୋଲ ଦର ୮୦ ପାର କରିଛି। ସୋମବାର ଓଡିଶାର ତେଲ ଦର ପେଟ୍ରୋଲ ଲିଟର ପିଛା ୮୦.୧୧ଟଙ୍କା ଏବଂ ଡିଜେଲ ଲିଟର ପିଛା ୭୭.୦୩ ଟଙ୍କାରେ ପହଞ୍ଚତ୍ଛି। କରୋନା ସଂକ୍ରମଣ କାରଣରୁ ଲୋକଙ୍କର ଆର୍ଥିକବସ୍ଥା ଭଲ ନାହିଁ। ଏହି ସମୟରେ କ୍ରମାଗତ ତେଲ ଦର ବୃଦ୍ଧି ସବୁ ବର୍ଗର ଲୋକଙ୍କ ଉପରେ ବୋଝ ଉପରେ ଲଳିତା ବିଡା ପରି ହୋଇଛି। ଚଳିତ ମାସ ଜୁନ ୭ ରୁ ଆଜି ପର୍ଯ୍ୟନ୍ତ(ସୋମବାର) ଦେଶର ତେଲ ଦର କ୍ରମାଗତ ଭାବରେ ବୃଦ୍ଧି ପାଇ ଚାଲିଛି। ଫଳରେ ଗତ ୧୬ଦିନ ମଧ୍ୟରେ ପେଟ୍ରୋଲ ଉପରେ ୮.୩୦ ଟଙ୍କା ଏବଂ ଡ଼ିଜେଲ ୯.୪୬ ଟଙ୍କା ବୃଦ୍ଧି ପାଇଛି।
ଦେଶର ପ୍ରମୁଖ ତୈଳ କମ୍ପାନୀଗୁଡିକର ସୂଚନା ଅନୁସାରେ ୨୨ତାରିଖ ପେଟ୍ରୋଲ ଲିଟର ପିଛା ୩୩ ପଇସା ଏବଂ ଡ଼ିଜେଲ ୫୮ପଇସା ବୃଦ୍ଧି ପାଇଛି। ଫଳରେ ସୋମବାର ଦିଲ୍ଲୀରେ ପେଟ୍ରୋଲ ଦର ୭୯.୨୩ ଟଙ୍କାରୁ ବୃଦ୍ଧି ପାଇ ୭୯.୫୬ ଟଙ୍କା ଏବଂ ଡିଜେଲ ଦର ୭୮.୨୬ ଟଙ୍କାରୁ ବୃଦ୍ଧି ପାଇଁ ୭୮.୮୪ ଟଙ୍କାରେ ପହଞ୍ଚତ୍ଛି। ଏହି ଦର ବୃଦ୍ଧି ଫଳରେ ଭୁବନେଶ୍ୱରରେ ମଧ୍ୟ ପେଟ୍ରୋଲ ଲିଟର ପିଛା ୮୦.୧୧ଟଙ୍କା ଓ ଡିଜେଲ ଲିଟର ପିଛା ୭୭.୦୩ ଟଙ୍କା ଛୁଇଁଥିବା ଭୁବନେଶ୍ୱରର ତୈଳ ଡିଲରମାନେ ସୂଚନା ଦେଇଛନ୍ତି। ଅର୍ନ୍ତଜାତୀୟ ତୈଳ ବଜାରରେ ବ୍ରେଣ୍ଟ ଅଶୋଧିତ ତେଲ ପାଇଁ ବ୍ୟାରେଲ ପିଛା ୪୨ଡଲାର ଦେବାକୁ ପଡୁଛି। ସେହିଭଳି ବର୍ତ୍ତମାନ ସମୟରେ ଇଣ୍ଟର ନ୍ୟାଶନାଲ ବେଞ୍ଚମାର୍କରେ ତେଲ ଦର ୯% ବୃଦ୍ଧି ପାଇଛିି। ଏହି ଦର ହ୍ରାସ ନ ହେବା ପର୍ଯ୍ୟନ୍ତ ତୈଳ ଦର ବୃଦ୍ଧି ଲାଗି ରହିବ ବୋଲି ରାଷ୍ଟ୍ରାୟତ୍ତ ତୈଳ କମ୍ପାନୀ ଗୁଡିକ ସୂଚନା ଦେଇଛନ୍ତି।
