ଓ୍ବାଶିଂଟନ,୧୧।୫: ବିଶ୍ୱତାପନ ଯୋଗୁ ଜଳବାୟୁ ପରିବର୍ତ୍ତନ ହେବା ସହିତ ପୃଥିବୀର ବାୟୁମଣ୍ଡଳର ତାପମାତ୍ରା ବୃଦ୍ଧି ପାଇବାରେ ଲାଗିଛି। ଏହାଯୋଗୁ ଆସନ୍ତା ୮୦ ବର୍ଷ ମଧ୍ୟରେ ୨୧୦୦ ବେଳକୁ ବାୟୁମଣ୍ଡଳର ତାପମାତ୍ରା ୩.୫ ଡିଗ୍ରୀ ସେଲସିୟସ୍ ବଢ଼ିବାର ଆଶଙ୍କା ଦେଖାଦେଇଛି। ଏପରି ହେଲେ ମେରୁ ଅଞ୍ଚଳରେ ଥିବା ହିମଖଣ୍ଡ ତରଳିବା ପ୍ରକ୍ରିୟା ତ୍ୱରାନ୍ବିତ ହେବ। ଫଳରେ ସମୁଦ୍ରର ଜଳସ୍ତର ୧.୩ ମିଟର ପର୍ଯ୍ୟନ୍ତ ବୃଦ୍ଧି ପାଇବ। ସମୁଦ୍ରର ଜଳସ୍ତର ବଢ଼ିଲେ ବହୁ ଉପକୂଳ ଅଞ୍ଚଳ ସମୁଦ୍ରରେ ବୁଡ଼ିଯିବ। ଉପକୂଳ ଅଞ୍ଚଳ ସଙ୍କୁଚିତ ହେବାରୁ ୭୭ କୋଟିରୁ ଅଧିକ ଲୋକ ନିଜର ବାସସ୍ଥାନ ହରାଇବେ ବୋଲି ପରିବେଶ ବିଜ୍ଞାନୀ ସତର୍କ ସୂଚନା ଦେଇଛନ୍ତି। ଏନେଇ କ୍ଲାଇମେଟ୍ ଆଟମସ୍ପିୟରିକ୍ ସାଇନ୍ସ୍ ପତ୍ରିକାରେ ରିପୋର୍ଟ ପ୍ରକାଶ ପାଇଛି। ଏଭଳି ଧାରା ଜାରି ରହିଲେ ୨୩୦୦ ସୁଦ୍ଧା ସମୁଦ୍ର ଜଳସ୍ତର ୫.୬ ମିଟର ପର୍ଯ୍ୟନ୍ତ ବଢ଼ିଯିବ ବୋଲି ୧୦୦ରୁ ଅଧିକ ପରିବେଶ ବୈଜ୍ଞାନୀ ମତପୋଷଣ କରିଛନ୍ତି। ୨୧୦୦ ମଧ୍ୟରେ ସମୁଦ୍ର ଜଳସ୍ତର ୦.୬ରୁ ୧.୩ ମିଟର ପର୍ଯ୍ୟନ୍ତ ବଢ଼ିବାର ଆଶଙ୍କା ରହିଛି। ସେହିପରି ପରବର୍ତ୍ତୀ ୨୦୦ବର୍ଷ ମଧ୍ୟରେ ଏହା ୧.୭ରୁ ୫.୬ ମିଟର ବଢ଼ିବ ବୋଲି ଅନୁମାନ କରାଯାଉଛି। ୧୯୯୨ରୁ ୨୦୦୧୭ ମଧ୍ୟରେ ମେରୁ ଅଞ୍ଚଳରୁ ୬୪୦ ହଜାର କୋଟି ଟନ୍ ଓଜନର ହିମଖଣ୍ଡ ତରଳି ଥିବା ଗବେଷକ କହିଛନ୍ତି। ଏହାଯୋଗୁ ଗତ ୧୦ ବର୍ଷ ମଧ୍ୟରେ ସମୁଦ୍ର ଜଳସ୍ତର ପ୍ରତିବର୍ଷ ୪ ମିଲିମିଟର ବୃଦ୍ଧି ପାଇବାରେ ଲାଗିଛି। ଏଥି ଲାଗି ପୃଥିବୀ ଉପରେ ଆଗାମୀ ଦିନରେ ବଡ଼ ବିପଦ ମାଡ଼ି ଆସୁଥିବା ପରିବେଶ ବିଜ୍ଞାନୀ କହିଛନ୍ତି।
