ପୁରୀ ଅଫିସ, ୨୨ା୮: ପୁରୀ ଜିଲାପାଳଙ୍କ କାର୍ଯ୍ୟାଳୟ ସ୍ଥାନାନ୍ତର ନିଷ୍ପତ୍ତିକୁ ବିଭିନ୍ନ ମହଲରେ ବିରୋଧ କରାଯାଇଛି। ଏହି ନିଷ୍ପତ୍ତି କାର୍ଯ୍ୟକାରୀ ହେଲେ ସାଧାରଣ ଜନତା ଅସୁବିଧାର ସମ୍ମୁଖୀନ ହେବେ। ତେଣୁ ଯେଉଁଠି ଜିଲାପାଳଙ୍କ କାର୍ଯ୍ୟାଳୟ ରହିଛି ସେଠାରେ ରହୁ ବୋଲି ଦାବି ହୋଇଛି। ଏ ନେଇ ବୁଧବାର ପୁରୀ ଓକିଲ ସଂଘର ଏକ ଜରୁରୀ ବୈଠକ ଅନୁଷ୍ଠିତ ହୋଇଥିଲା। ଏଥିରେ କାର୍ଯ୍ୟାଳୟ ସ୍ଥାନାନ୍ତର ନିଷ୍ପତ୍ତିକୁ ବିରୋଧ କରାଯାଇଛି। ଆବଶ୍ୟକ ପଡ଼ିଲେ ସଂଘ ଆନ୍ଦୋଳନ ପାଇଁ ରାସ୍ତାକୁ ଓହ୍ଲାଇବ ବୋଲି ଚେତାବନୀ ଦିଆଯାଇଛି।
ବାର୍ ସଭାପତି ପ୍ରଶାନ୍ତ କୁମାର ମିଶ୍ର ଅଧ୍ୟକ୍ଷତା କରିଥିଲେ। ଉପସଭାପତି ଦେବେନ୍ଦ୍ରନାଥ ମିଶ୍ର, ସମ୍ପାଦକ ବିଭୂତି ଭୂଷଣ ତ୍ରିପାଠୀ, ଯୁଗ୍ମ ସମ୍ପାଦକ ସଂଗ୍ରାମ ଦାଶ, କାର୍ଯ୍ୟକାରୀ ସଦସ୍ୟ ଅଶୋକ ପାଣିଗ୍ରାହୀ, ଅନୁପ ପୃଷ୍ଟି, ଅସୀମ ବାନାର୍ଜୀ, ଚିତ୍ତରଞ୍ଜନ ବିଶ୍ୱାଳ, ରତିକାନ୍ତ ପ୍ରତିହାରୀ, ପୂର୍ବତନ ସଭାପତି ଆଦିତ୍ୟ ହୃଦୟ ମିଶ୍ର, ପୂର୍ବତନ ସାଧାରଣ ସମ୍ପାଦକ ସାରଦା ସାମଲ ପ୍ରମୁଖ ଯୋଗଦେଇ ଉକ୍ତ ନିଷ୍ପତ୍ତିକୁ ବିରୋଧ କରିଥିଲେ। ଜିଲାପାଳଙ୍କ କାର୍ଯ୍ୟାଳୟ ସ୍ଥାନାନ୍ତର ହେଲେ ସାଧାରଣ ଲୋକେ ହଇରାଣ ହେବେ। ବହୁ ଦୂରରୁ କୌଣସି କାମରେ ଆସୁଥିବା ଗରିବ, ଖଟିଖିଆ ଲୋକ ଅଧିକ ଖର୍ଚ୍ଚାନ୍ତ ହେବେ। ସୁରକ୍ଷା ନେଇ ମଧ୍ୟ ପ୍ରଶ୍ନବାଚୀ ରହିଛି ବୋଲି ଉପସ୍ଥାପନ କରିଥିଲେ। ବାର୍ ସମ୍ପାଦକ ତ୍ରିପାଠୀ କହିଛନ୍ତି, ଏ ସଂକ୍ରାନ୍ତରେ ଖୁବ୍ଶୀଘ୍ର ଜିଲାପାଳଙ୍କ ସହ ଆଲୋଚନା କରାଯିବ। ସମସ୍ତଙ୍କ ନିଷ୍ପତ୍ତି କ୍ରମେ ଆଗାମୀ ପନ୍ଥା ସ୍ଥିର ହେବ। ଆବଶ୍ୟକ ପଡ଼ିଲେ, ସାଧାରଣ ଜନତାଙ୍କ ସ୍ବାର୍ଥ ଲାଗି ଓକିଲମାନେ ରାସ୍ତାକୁ ଓହ୍ଲାଇବେ। ତେଣୁ ରାଜ୍ୟ ସରକାର ନିଜ ନିଷ୍ପତ୍ତିର ପୁନଃ ତଜର୍ର୍ମା କରନ୍ତୁ ବୋଲି ତ୍ରିପାଠୀ ପ୍ରକାଶ କରିଛନ୍ତି। ସେହିପରି ଆଇନଜୀବୀ ପୁଷ୍କର ମହାପାତ୍ର, ପ୍ରେମାନନ୍ଦ ମହାନ୍ତି, ଶ୍ୟାମ ସୁନ୍ଦର ହୋତା, ରମେଶ କୁମାର ସିଂହ୍ନା, ବିମଳେନ୍ଦୁ ଦାଶ, ଜ୍ୟୋତି ପ୍ରକାଶ ମିଶ୍ର, ଏମ୍.ଶିବ ପ୍ରସାଦ ରାଓ, ବିଶ୍ୱନାଥ ଜଗଦ୍ଦେବ, ଚିନ୍ମୟ ଦାଶ, ଶରତ ରାୟଗୁରୁ, ଅଶୋକ ଦାସ, ବିଶ୍ୱଜିତ ପ୍ରଧାନ ପ୍ରମୁଖ ଏଭଳି ନିଷ୍ପତ୍ତିର ପୁନର୍ବିଚାର କରାଯିବା ଉଚିତ ବୋଲି ଯୁକ୍ତି ବାଢିଥିଲେ।
ରାଜ୍ୟ ସରକାର ଅବଢା ଯୋଜନାରେ ପୁରୀ ସହରର ବିକାଶ ଉପରେ ଗୁରୁତ୍ୱାରୋପ କରିଛନ୍ତି। ଏଥିଲାଗି ୨୬୫ କୋଟି ଟଙ୍କା ମଞ୍ଜୁର ହୋଇଛି। ପ୍ରାୟ ୧୦ ଏକର ଜମିରେ ଲୋକସେବା ଭବନ ନିର୍ମାଣ ପ୍ରସ୍ତାବ ରହିଛି। ଏହି ଭବନରେ ଜିଲାସ୍ତରୀୟ ସମସ୍ତ କାର୍ଯ୍ୟାଳୟ ରହିବ। ଏଥିସହିତ ପୁରୁଣା ଜେଲ, ଦିଗବାରେଣୀ ଖୁଣ୍ଟି, ଯାତ୍ରିକା ନିକଟରେ ବହୁତଳବିଶିଷ୍ଟ ପାର୍କିଂସ୍ଥଳ ନିର୍ମାଣ କରାଯିବ। ପୌରସଂସ୍ଥା ମାର୍କେଟ କମ୍ପ୍ଲେକ୍ସ ଓ ମହୋଦଧି ମାର୍କେଟ ପୁନରୁଦ୍ଧାର ନିର୍ମାଣ ପ୍ରସ୍ତାବ ରହିଛି। ପ୍ରସ୍ତାବିତ ଲୋକସେବା ଭବନ ବଳିଆପଣ୍ଡା କିମ୍ବା ଶିପସରୁବାଲି ମୌଜାରେ ନିର୍ମାଣର ସମ୍ଭାବନା ରହିଛି। ଗୋଟିଏ କୋଠା ତଳେ ସମସ୍ତ କାର୍ଯ୍ୟାଳୟ ଓ ଅଫିସର ରହିଲେ ଲୋକଙ୍କୁ ତ୍ୱରିତ ନ୍ୟାୟ ମିଳିପାରିବ ବୋଲି ସରକାର ଆଶା ବାନ୍ଧିଛନ୍ତି।
