ଯୋଡ଼ା, ୧୦।୫(ଡି.ଏନ.ଏ.)-କରୋନା ମହାମାରୀରୁ ରକ୍ଷା ପାଇବା ପାଇଁ ସମଗ୍ର ଦେଶରେ ଲକଡାଉନ୍ ଘୋଷଣା କରାଯାଇଛି। ଏହି କାରଣରୁ ସମଗ୍ର ଦେଶରେ ସ୍କୁଲ୍ ଗୁଡିକ ବନ୍ଦ ରହିଛି। ଶିକ୍ଷା ବିଭାଗ ପକ୍ଷରୁ ସ୍କୁଲ୍ର ଛାତ୍ରୀଛାତ୍ରଙ୍କୁ ଘରେ ରହି ମୋବାଇଲ ଫୋନ ଦ୍ୱାରା ଅନଲାଇନ୍ କ୍ଲାସରେ ପଢିବାର ସୁବିଧା କରାଯାଇଛି। ମାତ୍ର ବିଭିନ୍ନ ସରକାରୀ ସ୍କୁଲରେ ପାଠ ପଢୁଥିବା କେତେକ ଗରିବ ଶ୍ରେଣୀର ଛାତ୍ରୀଛାତ୍ରଙ୍କ ପାଖରେ ଆଣ୍ଡ୍ରଏଡ ମୋବାଇଲ ନ ଥିବାରୁ ସେମାନେ ଏହି ସୁବିଧାରୁ ବଞ୍ଚିତ ହେଉଛନ୍ତି। ଏହି ଗରିବ ଶ୍ରେଣୀର ଛାତ୍ରୀଛାତ୍ରମାନଙ୍କ ପାଖରେ ଲକଡାଉନ୍ ସମୟରେ ପାଠ୍ୟ ଉପକରଣ ମଧ୍ୟ ନାହିଁ। ଫଳରେ ସେମାନେ ନିୟମିତ ପାଠ ପଢାରେ ହଇରାଣ ହେଉଛନ୍ତି। ଏହାକୁ ଦୃଷ୍ଟିରେ ରଖି ଶନିବାର ପୂର୍ବାହ୍ନରେ ଯୋଡା ଆରଏସ୍ଏସ୍ ଶାଖା ପକ୍ଷରୁ କୁନ୍ଦୁରୁନାଲା ଅଞ୍ଚଳରେ ରହୁଥିବା ସ୍କୁଲ୍ ଛାତ୍ରୀଛାତ୍ରମାନଙ୍କୁ ଖାତା, କଲମ, ପେନସିଲ୍, ରବର ଆଦି ପାଠ୍ୟ ଉପକରଣ ବଣ୍ଟାଯାଇଛି। ଆଗାମୀ ଦିନରେ ସାମାଜିକ ଦୂରତାପାଳନ କରାଯାଇ ଯୋଡା ସହରର ବିଭିନ୍ନ ଓ୍ବାର୍ଡରେ ରହୁଥିବା ଗରିବ ଛାତ୍ରୀଛାତ୍ରଙ୍କ ଘରକୁ ଘର ଯାଇ ପାଠ୍ୟ ଉପକରଣ ଦିଆଯିବ ବୋଲି ଯୋଡା ଆରଏସଏସ ଶାଖାର ସଦସ୍ୟ ପିଣ୍ଟୁ ସିଂ କହିଛନ୍ତି। ଏହି ଉପକରଣ ବିତରଣ ସମୟରେ ଯୋଡା ଆରଏସଏସ ଶାଖାର ସଦସ୍ୟ ଆନନ୍ଦ ବାରିକ, ରାକେଶ ଶର୍ମା, ଚନ୍ଦନ ଗୁପ୍ତା ଏବଂ ଶିକ୍ଷୟିତ୍ରୀ ପଦ୍ମିନୀ ବାରିକ ପ୍ରମୁଖ ଉପସ୍ଥିତ ଥିଲେ ା
