ରାଉରକେଲା ଅଫିସ,୨୦-୯:ରାଉରକେଲା ପୋଲିସ ସୀମାନ୍ତରେ ଆତଙ୍କ ଚଳାଇଥିବା ଆଉ ଜଣେ ପିଏଲ୍ଏଫ୍ଆଇ (ପିପୁଲ ଲିବରେଶନ ଫ୍ରଣ୍ଟ ଅଫ୍ ଇଣ୍ଡିଆ) ଏରିଆ କମାଣ୍ଡରଙ୍କୁ ଗିରଫ କରିଛି। ତାଙ୍କ ନଁା ସୁଦାମ ସିଂ(୩୪)। ତାଙ୍କ ନିକଟରୁ ଏକ ଦେଶୀ ପିସ୍ତଲ ସହ ଗୁଳି ଜବତ କରାଯାଇଛି। ସେ ଝାଡ଼ଖଣ୍ଡ ସିମଡେଗା ଅଞ୍ଚଳ ବାନୋ ଥାନା ଅନ୍ତର୍ଗତ ବଡାଇକ ଟୋଲା ବାସିନ୍ଦା ବୋଲି ଗୁରୁବାର ଆୟୋଜିତ ଖବରଦାତା ସମ୍ମିଳନୀରେ ପୋଲିସ କହିଛି। ସୁଦାମ ପିଏଲ୍ଏଫ୍ଆଇ ଲିଡର ଦୀନେଶ ଗୋପଙ୍କ ନିର୍ଦ୍ଦେଶରେ କାମ କରୁଥିଲେ। ଗତ ୨୦୦୭ରୁ ସେ ଝାଡ଼ଖଣ୍ଡର ବାନୋ ସମେତ ଓଡିଶା ସୀମା ହାତିବାରୀ ଓ ବିଶ୍ରା ଅଞ୍ଚଳରେ ସକ୍ରିୟ ରହିଥିଲେ। ଜଣେ ପେସାଦାର ଅପରାଧୀ ଭାବେ ସେ ଏକାଧିକ ହତ୍ୟା, ଲୁଣ୍ଠନ ଓ ବଟି ଆଦାୟ ଘଟଣାରେ ସମ୍ପୃକ୍ତ ରହିଥିଲେ। ତାଙ୍କ ଆତଙ୍କରେ ବାନୋ ଓ ଏହାର ନିକଟବର୍ତ୍ତୀ ବାସିନ୍ଦା ସର୍ବଦା ଭୟଭୀତ ରହୁଥିଲେ। ରାଜନେତାଙ୍କୁ ଟାର୍ଗେଟ କରିବା ତାଙ୍କର ଅଭ୍ୟାସରେ ପରିଣତ ହୋଇଥିଲା। ବନ୍ଧୁକ ଦେଖାଇ ନିରୀହ ବ୍ୟବସାୟୀଙ୍କଠାରୁ ମୋଟା ଅଙ୍କର ଅର୍ଥ ଆଦାୟ କରୁଥିବା ସୁଦାମଙ୍କ ନଁାରେ ଭୟରେ କେହି ଅଭିଯୋଗ କରୁ ନ ଥିଲେ। ତାଙ୍କ ନାମରେ ବିଭିନ୍ନ ଥାନାରେ ୧୫ରୁ ଊର୍ଦ୍ଧ୍ୱ ମାମଲା ରହିଛି। ଏଥିରେ ୭ଟି କେବଳ ହତ୍ୟାକାଣ୍ଡ ସମ୍ପର୍କିତ ବୋଲି ଜଣାଯାଇଛି। ବାନୋ ପୋଲିସ ଷ୍ଟେଶନରେ ୬ଟି ମାମଲା ରହିଥିବାବେଳେ ଜଲଡେଗା ଥାନାରେ ଗୋଟିଏ ପଞ୍ଜୀକରଣ କରାଯାଇଛି। ଗୋଟିଏ ମାମଲା ବିଶ୍ରା ଥାନାରେ ରହିଛି। ଅନ୍ୟ ୫ଟି ମାମଲା ଝାଡ଼ଖଣ୍ଡରେ ଥିବା ପୋଲିସ ସୂଚନା ଦେଇଛି। ଗତ ୨୦୧୭ରେ ମିଟକୁନ୍ଦୁରୀ (ବିଶ୍ରା) ଅଞ୍ଚଳରେ ହତ୍ୟା ଉଦ୍ୟମ ସହ ହାତୀବାରି କୋ ଅପରେଟିଭ ବ୍ୟାଙ୍କ ଲୁଟ୍ ଭଳି ସଙ୍ଗିନ ମାମଲାରେ ସୁଦାମ ସମ୍ପୃକ୍ତ ଥିବା ଜଣାଯାଇଛି। ଗତ ୨୬।୧୨। ୨୦୧୭ ବିଶ୍ରା ଥାନା ମାମଲା ନଂ ୪୮ ଆଧାରରେ ତାଙ୍କୁ ୧୨। ୬। ୨୦୧୭ରେ ପୋଲିସ ଗିରଫ କରିଥିଲା। ସୁପାରି ନେଇ ଜଣେ ବ୍ୟବସାୟୀଙ୍କୁ ହତ୍ୟା କରିବାକୁ ସୁଦାମ ଷଡଯନ୍ତ୍ର କରିଥିଲେ। ଏହି ଘଟଣାରେ ତାଙ୍କର ଅନ୍ୟ ଦୁଇ ଜଣ ସହଯୋଗୀ ରହିଥିବା ଜଣାଯାଇଛି।
