ଭୁବନେଶ୍ୱର,୧୨।୨(ବ୍ୟୁରୋ):ଅତ୍ୟାବଶ୍ୟକ ସାମଗ୍ରୀ ପିଆଜର ଦର ବୃଦ୍ଧି ଦୁଇ ତିନି ମାସ ଧରି ସାଧାରଣ ଖାଉଟିଙ୍କୁ ହନ୍ତସନ୍ତ କରିବା ପରେ ଏବେ ବଜାରରେ ମୂଲ୍ୟ ହ୍ରାସ ପାଇବାରେ ଲାଗିଛି। ପିଆଜ କିଲୋ ହୋଲସେଲ ବଜାରରେ ୨୫ ଟଙ୍କା ଥିବାବେଳେ ଖୁଚୁରା ବଜାରରେ ୩୦ ଟଙ୍କାରେ ମିିଳୁଛି। ଆଗାମୀ ଦିନରେ ଏହାର ଦର ଆହୁରି କମିବା ସମ୍ଭାବନା ରହିଛି। ପିଆଜ ଦର କମୁଥିବାରୁ ରାଜ୍ୟ ସରକାର ଏ ନେଇ ଆଉ ମୁଣ୍ଡ ଖେଳାଉ ନାହାନ୍ତି। ପିଆଜ ଦର ଆକାଶ ଛୁଆଁ ଥିବାବେଳେ କେନ୍ଦ୍ର କିମ୍ବା ରାଜ୍ୟ ସରକାର ଲୋକଙ୍କୁ କମ୍ଦରରେ ଯୋଗାଇ ପାରିଲେ ନାହିଁ। ଚଢ଼ାଦରରେ ଅଢେଇଶ ଅଧା କିଲୋରେ ଲୋକମାନେ କାମ ଚଳାଇଲେ। କେନ୍ଦ୍ର ସରକାର ଦରକୁ ନିୟନ୍ତ୍ରଣ କରିବା ପାଇଁ ଇଜିପ୍ଟ ଓ ଅନ୍ୟାନ୍ୟ ଦେଶରୁ ପିଆଜ ଆମଦାନି କଲେ। ହଜାର ହଜାର ଟନ ପିଆଜ ବମ୍ବେ ଉପକୂଳରେ ଆସି ପହଞ୍ଚିଲା। ସେତେବେଳକୁ ବହୁ ବିଳମ୍ବ ହୋଇଗଲା। ବଜାରରେ ପିଆଜର ଭାଉ କମିବା ବେଳକୁ ସରକାରୀ ପିଆଜ ବନ୍ଦରରେ ପହଞ୍ଚିଲା। ତେବେ ଏହି ପିଆଜକୁ ନେଇ କେନ୍ଦ୍ର ସରକାର ଅଡୁଆରେ ପଡିଛନ୍ତି। ପିଆଜ ନେବା ପାଇଁ ରାଜ୍ୟଗୁଡ଼ିକୁ କେନ୍ଦ୍ର ସରକାର ଯେତେ ଚିଠି ଲେଖିଲେ ମଧ୍ୟ କେହି ଶୁଣୁ ନାହାନ୍ତି। ଓଡ଼ିଶାକୁ କେନ୍ଦ୍ର ଖାଉଟି କଲ୍ୟାଣ ମନ୍ତ୍ରଣାଳୟ ପକ୍ଷରୁ ପିଆଜ ନେବାକୁ ଅନୁରୋଧ କରାଯାଇଛି। ଧଳା ପିଆଜ କିଲୋ ୧୦ ଟଙ୍କା ଏବଂ ନାଲି ପିଆଜ କିଲୋ ୨୧ ଟଙ୍କାରେ ନେବାକୁ ରାଜ୍ୟ ସରକାରଙ୍କୁ ଚିଠି ମାଧ୍ୟମରେ ଜଣାଇ ଦିଆଯାଇଛି। ଦର କମୁଥିବାରୁ ପିଆଜ ଆଣିବାକୁ ରାଜ୍ୟ ସରକାର ଅମଙ୍ଗ ହେଉଛନ୍ତି। ଅନ୍ୟ ପକ୍ଷରେ ବିଦେଶୀ ପିଆଜର ଆକାର ବହୁତ ବଡ଼ ହୋଇଥିବାବେଳେ ଏହାର ସ୍ବାଦ ନ ଥିବା କାରଣରୁ ଲୋକମାନେ କିଣିବାକୁ ଆଗ୍ରହ ଦେଖାଉ ନାହାନ୍ତି। ଦର ବୃଦ୍ଧି ବେଳେ କେତେକ ବ୍ୟବସାୟୀ ବିଦେଶୀ ପିଆଜ ଆଣିଥିଲେ ମଧ୍ୟ ତାଙ୍କଠାରୁ କେହି କିଣି ନ ଥିଲେ। ପିଆଜ ଶୀଘ୍ର ନଷ୍ଟ ହେଉଥିବା ଦ୍ରବ୍ୟ ହୋଇଥିବାରୁ ରାଜ୍ୟ ସରକାର ସେଗୁଡ଼ିକୁ କିଣି ଘାଟାରେ ପଡ଼ିବାକୁ ଚାହୁଁ ନାହାନ୍ତି। ଆଳୁ ପିଆଜ କିଣିବାକୁ ପ୍ରାଇସ ଷ୍ଟାବିଲାଇଜେଶନ ଫଣ୍ଡ(ପିଏସ୍ଏଫ)ରେ ୧୦୦ କୋଟି ଟଙ୍କା ଥିଲେ ମଧ୍ୟ ଯୋଗାଣ ବିଭାଗ କିଣିବାକୁ ମନା କରି ଦେଇଛି। ନାଫେଡ ନିକଟରେ ଆଗତୁରା ଟଙ୍କା ଜମା କରି ବମ୍ବେରୁ ପିଆଜ ନିଜ ଖର୍ଚ୍ଚରେ ଆଣି ମାର୍କେଟରେ ଲୋକଙ୍କୁ ଯୋଗାଇବା ଆଦୌ ସମ୍ଭବ ନୁହେଁ ବୋଲି ଯୋଗାଣ ବିଭାଗର ଜଣେ ବରିଷ୍ଠ ଅଧିକାରୀ କହିଛନ୍ତି। କେନ୍ଦ୍ର ସରକାରଙ୍କୁ ଏନେଇ ଜଣାଇ ଦିଆଯାଇଛି ବୋଲି ସେ କହିଛନ୍ତି।
