ବାସୁଦେବପୁର, ୩୦।୯ (ଡି.ଏନ.ଏ.) – ଭଦ୍ରକ ଜିଲା ବାସୁଦେବପୁର ଥାନା ଅଧୀନ ଖରିଦା ବିନାୟକପୁର ଗ୍ରାମର ଅଗଣୀ ମଳିକ ନାମକ ଜଣେ ମତ୍ସ୍ୟଜୀବୀଙ୍କୁ ପାରାଦୀପରେ ଜଣେ ଲଞ୍ଚ ଡ୍ରାଇଭର ନିଆଁ ଚେଙ୍କ ଦେଇଥିବା ଅଭିଯୋଗ ହୋଇଛି।
ଏଥିରେ ଅଗଣୀ ଗୁରୁତର ହୋଇଛନ୍ତି। ଉକ୍ତ ଲଞ୍ଚ ଡ୍ରାଇଭରଙ୍କ ଘର ବାସୁଦେବପୁର ବ୍ଲକ ଗୁଆଗଡ଼ିଆ ଗ୍ରାମରେ। ଅଗଣୀ ଶନିବାର ଘରେ ପହଞ୍ଚିବା ପରେ ଏହି ଘଟଣା ପଦାକୁ ଆସିଛି। ଲଞ୍ଚ ଡ୍ରାଇଭରଙ୍କ ବିରୋଧରେ କାର୍ଯ୍ୟାନୁଷ୍ଠାନ ସହିତ ଘଟଣାର ତଦନ୍ତ ଦାବି କରିଛନ୍ତି ଆହତ ଅଗଣୀ ଓ ତାଙ୍କ ପରିବାର। ଅଗଣୀଙ୍କ ଦେହର ବିଭିନ୍ନ ଅଂଶରେ ନିଅଁା ଚେଙ୍କର ସଦ୍ୟଦାଗରୁ ଘା ସୃଷ୍ଟି ହୋଇଛି। ଏପରିକି ତାଙ୍କ ମଳଦ୍ୱାରରେ ରଡ୍ ପୂରାଯାଇଥିବା ଓ ଯୌନାଙ୍ଗରେ ମଧ୍ୟ ଚେଙ୍କ ଦିଆଯାଇଥିବା ସେ ପ୍ରକାଶ କରିଛନ୍ତି। ବାସୁଦେବପୁର ଡାକ୍ତରଖାନାରେ ତାଙ୍କର ଚିକିତ୍ସା କରାଯାଇଛି।
ଅଗଣୀଙ୍କ କହିବା ଅନୁଯାୟୀ, ୩ ମାସ ତଳେ ସେ ଗୁଆଗଡିଆ ଗ୍ରାମର ଜଣେ ଯୁବକଙ୍କ ସହିତ ମତ୍ସ୍ୟଜୀବୀ ଭାବେ କାମ କରିବାକୁ ପାରାଦୀପକୁ ଯାଇଥିଲେ। ଅନ୍ୟ ୬ ସହଯୋଗୀଙ୍କ ସହିତ ସେ ସମୁଦ୍ରକୁ ମାଛ ଧରିବାକୁ ନିୟମିତ ଯାଉଥିଲେ। କାମ ବାବଦକୁ ଟଙ୍କା ମାଗିବାରୁ ତାଙ୍କୁ ଶାରୀରିକ ଓ ମାନସିକ ନିର୍ଯାତନା ଦିଆଯାଇଥିଲା। ସେହି ଯୁବକ ତଥା ଲଞ୍ଚ ଡ୍ରାଇଭର ଗ୍ୟାସ୍ରେ ସ୍କୃ ଡ୍ରାଇଭରକୁ ତତାଇ ତାଙ୍କୁ ଚେଙ୍କ ଦେଇଥିଲେ। ଏ ସମ୍ପର୍କରେ ବୋଟ୍ ମାଲିକ ଜାଣିବା ପରେ ତାଙ୍କୁ ଓ ସେହି ଯୁବକଙ୍କୁ ଘରକୁ ପଠାଇ ଦେଇଥିଲେ। ସମ୍ପୃକ୍ତ ଯୁବକଙ୍କୁ ଅଗଣୀଙ୍କ ପରିବାର ଲୋକ ନିର୍ଯାତନା ସମ୍ପର୍କରେ ପଚାରିବାରୁ ସେ ଓ ତାଙ୍କ ସହଯୋଗୀମାନେ ଗାଳିଗୁଲଜ କରିଛନ୍ତି। ଏ ସମ୍ପର୍କରେ ଆହତ ଅଗଣୀଙ୍କ ପରିବାର ପକ୍ଷରୁ ବାସୁଦେବପୁର ଥାନାରେ ଜଣାଯାଇଥିଲେ ମଧ୍ୟ ପାରାଦୀପରେ ଘଟଣା ଘଟିଥିବାରୁ ପୋଲିସ ଦୂରେଇ ରହୁଥିବା କୁହାଯାଉଛି।
