ବାଲେଶ୍ୱର ଅଫିସ, ୬।୧୧-ବାଲେଶ୍ୱର ସଦର ବ୍ଲକ ବଡ଼ଖୁଆ ଗ୍ରାମରେ ପାନୀୟଜଳ ଦୂଷିତ ହୋଇପଡିଥିବା ନେଇ ଦୀର୍ଘଦିନ ହେଲା ଅଭିଯୋଗ ହୋଇଆସୁଛି। ବିଭାଗୀୟ ଅଧିକାରୀମାନେ ଏ ଦିଗରେ କୌଣସି ପଦକ୍ଷେପ ଗ୍ରହଣ କରୁନାହାନ୍ତି। ଏନେଇ ସାମାଜିକ ଅନୁଷ୍ଠାନ ‘ଆଚ୍ଛା’ ସହାୟତରେ ଅଞ୍ଚଳବାସୀ ମଙ୍ଗଳବାର ଅତିରିକ୍ତ ଜିଲାପାଳ ସମ୍ବିତ ନାୟକଙ୍କୁ ଭେଟି ଅଭିଯୋଗ କରିଛନ୍ତି। ୧୫ଦିନ ଭିତରେ ଦାବି ପ୍ରତି ଗୁରୁତ୍ୱ ଦିଆ ନ ଗଲେ ସ୍ଥାନୀୟ ଅଞ୍ଚଳରେ ଥିବା ଆବର୍ଜନା ଏକାଠି କରି ନିକଟସ୍ଥ ମଧୁସୂଦନ ସରକାରୀ ଉଚ୍ଚ ବିଦ୍ୟାଳୟ, ବଳାଙ୍ଗୀ ମହାବିଦ୍ୟାଳୟ ଓ ବାଲେଶ୍ୱର ପୌର କାର୍ଯ୍ୟାଳୟ ସମ୍ମୁଖରେ ଧାରଣା ଦିଆଯିବ ବୋଲି ଅଞ୍ଚଳବାସୀ ଚେତାବନୀ ଦେଇଛନ୍ତି।
ଗତ ଜୁଲାଇ ୨୨ତାରିଖରେ ସଦର ବ୍ଲକ ଅଫିସ୍ରେ ହୋଇଥିବା ମିଳିତ ଜନଶୁଣାଣିରେ ଦାବିପତ୍ର ଦେବାର ୧୦୦ଦିନ ବିତିଯାଇଥିଲେ ମଧ୍ୟ କୌଣସି କାର୍ଯ୍ୟାନୁଷ୍ଠାନ ଗ୍ରହଣ କରାଯାଇନାହିଁ। ଉକ୍ତ ଗ୍ରାମର ୧୫୦ରୁ ଊର୍ଦ୍ଧ୍ୱ ପରିବାର ଅସୁବିଧାର ସମ୍ମୁଖୀନ ହେଉଛନ୍ତି। ବଡ଼ଖୁଆ ପୋଖରୀ ଜଳକୁ ବ୍ୟବହାର କରି ଗ୍ରାମବାସୀ ଜଣ୍ଡିସ୍ରେ ଆକ୍ରାନ୍ତ ହେଉଛନ୍ତି। ପାନୀୟ ଜଳର ଘୋର ସମସ୍ୟା ଦେଖାଦେଇଛି। ପୋଖରୀ ପୁନରୁଦ୍ଧାର ଓ ବିଶୁଦ୍ଧ ପାନୀୟଜଳ ଯୋଗାଇ ଦେବା ଲାଗି ପଦକ୍ଷେପ ଗ୍ରହଣ କରା ନ ଗଲେ ୧୫ଦିନ ମଧ୍ୟରେ ଆନ୍ଦୋଳନକୁ ବିଭିନ୍ନ ଉପାୟରେ ବ୍ୟାପକ କରାଯିବ ବୋଲି ଅଞ୍ଚଳବାସୀ ଦିଲୀପ କୁମାର ସେନ, ଶାନ୍ତନୁ କୁମାର ମାଝି, ଅଜିତ କୁମାର ମିଶ୍ର, ଅଲିଭା ଓଝା, ସୁସ୍ମିତା ମାଝି, ସରସ୍ବତୀ ଜେନା, ଖଇରୁନ୍ ବିବି, ସୁଲୋଚନା ମାଝି, ରଫ୍ ଖାତୁନ, ଦୁର୍ଯ୍ୟୋଧନ ତରାଇ, ଅଶୋକ ମାଝି, ବାସନ୍ତୀ ପଣ୍ଡା, ବେଲ ମୁର୍ମୁ, ଟିପିରି ହେମ୍ବ୍ରମ, ପ୍ରଭାସିନୀ ଖଟୁଆ, ବୁଲି ମାଝି, ନିନି ଦଳାଇ, ନମିତା ଖଟୁଆ ପ୍ରମୁଖ ପ୍ରକାଶ କରିଛନ୍ତି। ଅତିରିକ୍ତ ଜିଲାପାଳଙ୍କୁ ଦାବିପତ୍ର ପ୍ରଦାନ ବେଳେ ସଙ୍ଗଠନ ସଭାପତି ବିସ୍ମିତ ରଞ୍ଜନ ଦାସ, ସମ୍ପାଦକ ରଣଜିତ କୁମାର ପୃଷ୍ଟି, ସଂଯୋଜକ ରାକେଶ କୁମାର ଶିଅଳ, ରାଜେଶ ପାଣ୍ଡିଆ, ଅଜୟ କୁମାର ନାୟକ ଓ ଯୋଗେନ୍ଦ୍ର ନାଥ ପାଢ଼ୀ ପ୍ରମୁଖ ଉପସ୍ଥିତ ଥିଲେ।
