ଶେରଗଡ଼,୨୧ା୫(ଡି.ଏନ୍.ଏ.)- ଗଞ୍ଜାମ ଜିଲା ଶେରଗଡ଼ ବ୍ଲକ ଠୁରୁବୁରାଇ ଉଚ୍ଚ ବିଦ୍ୟାଳୟରେ ହୋଇଥିବା ସଙ୍ଗରୋଧ କେନ୍ଦ୍ରରେ ବୁଧବାର ବାସିଖାଦ୍ୟ ଦିଆଯାଇଥିବାରୁ ଅନ୍ତେବାସୀମାନେ ପାଚେରୀ ଡେଇଁ ରାସ୍ତା ଅବରୋଧ କରିଥିଲେ। ଖବରପାଇ ପ୍ରଶାସନ ଓ ପୋଲିସ ପହଞ୍ଚି ବୁଝାଶୁଝା କରିବା ପରେ ପରିସ୍ଥିତି ଶାନ୍ତ ପଡିଛି। ଠୁରୁବୁରାଇ ଉଚ୍ଚ ବିଦ୍ୟାଳୟ ସଙ୍ଗରୋଧ କେନ୍ଦ୍ରରେ ୧୧୫ ପ୍ରବାସୀ ରହୁଛନ୍ତି। ମେନୁ ଅନୁଯାୟୀ ବୁଧବାର ମଧ୍ୟାହ୍ନଭୋଜନରେ ଅନ୍ତେବାସୀଙ୍କୁ ଭାତ ଓ ଅଣ୍ଡା ତରକାରି ଦିଆଯାଇଥିଲା। ଯେଉଁମାନେ ଆମିଷ ନ ଖାଇବେ ସେମାନଙ୍କ ପାଇଁ ସୋୟାବିନ୍ ତରକାରି ହୋଇଥିଲା। ମାତ୍ର ଖାଦ୍ୟ ପରଷା ଯିବା ବେଳେ ବାସିଭାତ ଦିଆଯାଇଥିବାରୁ ଅନ୍ତେବାସୀଙ୍କ ମଧ୍ୟରେ ଉତ୍ତେଜନା ପ୍ରକାଶ ପାଇଥିଲା। ଏହା ପ୍ରତିବାଦରେ ସମସ୍ତ ଅନ୍ତେବାସୀ ପାଚେରି ଡେଇଁ ବିଦ୍ୟାଳୟ ସମ୍ମୁଖ ରାସ୍ତାକୁ ଅବରୋଧ କରିଥିଲେ। ଫଳରେ ହିଞ୍ଜିଳି-କଙ୍କୋରଡା ରାସ୍ତାରେ ପ୍ରାୟ ୧ ଘଣ୍ଟା ପର୍ଯ୍ୟନ୍ତ ଯାନବାହନ ଚଳାଚଳ ବନ୍ଦ ହୋଇଯାଇଥିଲା। ଖବରପାଇ ଶେରଗଡ଼ ବିଡିଓ ସୁରଞ୍ଜନ କୁମାର ସାହୁ, ତହସିଲଦାର ଦୟାସିନ୍ଧୁ ପରିଡା ଓ ହିଞ୍ଜିଳିକାଟୁ ପୋଲିସ ଘଟଣାସ୍ଥଳରେ ପହଞ୍ଚତ୍ଥିଲେ। ମଙ୍ଗଳବାର ରାତିର ବଳକା ଭାତକୁ ଆଉଥରେ ରାନ୍ଧି ଦିଆଯାଇଥିବା ଅନ୍ତେବାସୀ ଅଭିଯୋଗ କରି ବିଡିଓଙ୍କୁ ତାହା ଦେଖାଇଥିଲେ। ବୁଝାଶୁଝା ପରେ ଅନ୍ତେବାସୀମାନେ ରାସ୍ତାରୁ ଉଠି କ୍ୱାରାଣ୍ଟାଇନ୍ ସେଣ୍ଟରକୁ ଯାଇଥିଲେ। ବିଡିଓ ଓ ତହସିଲଦାରଙ୍କ ନିର୍ଦ୍ଦେଶକ୍ରମେ ସେମାନଙ୍କୁ ପୁଣି ଥରେ ଭାତ ରାନ୍ଧି ଦିଆଯାଇଥିଲା।
