ବ୍ରହ୍ମପୁର ଅଫିସ,୧୫ା୧-ବିସ୍ମୟ ସୃଷ୍ଟି କଲେ ଆଇଟିଆଇ ଛାତ୍ର। ପରିବେଶ ପ୍ରଦୂଷଣ ରୋକିବା, ପ୍ରାକୃତିକ ତୈଳଜାତ ଦ୍ରବ୍ୟର ଅପଚୟ ରୋକିବାକୁ ନିର୍ମାଣ କଲେ ‘ଇ-ସାଇକେଲ’। ସାଇକେଲରେ ୧୨ ଭୋଲ୍ଟର ୨ ବ୍ୟାଟେରି, ୨୪ ୱାର୍ଟର ଗୋଟିଏ ଡିସି ମିଟର ଖଞ୍ଜାଯାଇ ଏହାକୁ ପ୍ରସ୍ତୁତ କରାଯାଇଛି। ଏହି ସାଇକେଲର ସ୍ବତନ୍ତ୍ରତା ହେଉଛି ଏଥିରେ ଲାଗିଥିବା ବ୍ୟାଟେରିକୁ ଥରେ ଚାର୍ଜ କଲେ ଏହା ୨୪ ରୁ ୨୫ କିଲୋମିଟର ପର୍ଯ୍ୟନ୍ତ ଯିବାର କ୍ଷମତା ରହିଛି। ଏହାର ସର୍ବାଧିକ ବେଗ ୩୦ ରୁ ୩୫ କିଲୋମିଟର ରହିଛି। ତେବେ ବଜାରରେ ମିଳୁଥିବା ଇ-ସାଇକେଲଠାରୁ ଏହା ଯଥେଷ୍ଟ କମ ଖର୍ଚ୍ଚରେ ପ୍ରସ୍ତୁତ ହୋଇପାରିବ। ଏହି ସାଇକେଲକୁ ଆଇଟିଆଇ ଫିଟର ଟ୍ରେଡ୍ ଦ୍ୱିତୀୟ ବର୍ଷର ୩ ଜଣ ଛାତ୍ର ଅଦିତ୍ୟ ବେହେରା, ଟି. ଶ୍ରୀନିବାସ ରାଓ ଏବଂ ନାରାୟଣ ସେଠୀ ପ୍ରସ୍ତୁତ କରିଛନ୍ତି। ଏହି ସାଇକେଲ ନିର୍ମାଣ ପାଇଁ ୬ ହଜାର ଟଙ୍କା ଖର୍ଚ୍ଚ ହୋଇଥିବା ବେଳେ ମାତ୍ର ଗୋଟିଏ ଦିନରେ ଛାତ୍ରମାନେ ଏହାକୁ ପ୍ରସ୍ତୁତ କରିଛନ୍ତି। ମଙ୍ଗଳବାର ଆଇଟିଆଇ ପରିସରରେ ଏହି ଇ-ସାଇକେଲକୁ ଆଇଜର ନିର୍ଦ୍ଦେଶକ କେ.ଭି.ଆର. ଚାରୀ ଉଦ୍ଘାଟନ କରିଥିଲେ। ସ୍ବଳ୍ପ ଖର୍ଚ୍ଚରେ ଏହା ପ୍ରସ୍ତୁତ କରାଯାଇ ପାରୁଥିବାରୁ ଆଗାମୀ ଦିନରେ ସହରରେ ପରିବେଶ ପ୍ରଦୂଷଣ ସହ ତୈଳିକ ପଦାର୍ଥର ସଂରକ୍ଷଣ କରାଇବାରେ ମଧ୍ୟ ଯଥେଷ୍ଟ ସହାୟକ ହୋଇପାରିବ ବୋଲି ଆଇଜର ନିର୍ଦ୍ଦେଶକ କହିଥିଲେ। ଯେକୌଣସି ସାଇକେଲ ଆରୋହୀ ଆବଶ୍ୟକ ସାମଗ୍ରୀ ସହ ଆଇଟିଆଇରେ ପହଞ୍ଚିଲେ ଅନୁଷ୍ଠାନର ଛାତ୍ରମାନେ ମାଗଣାରେ ଇ-ସାଇକେଲ ପ୍ରସ୍ତୁତ କରି ସେମାନଙ୍କୁ ଯୋଗାଇବେ ବୋଲି ଅନୁଷ୍ଠାନର ଅଧ୍ୟକ୍ଷ ଡ. ରଜତ କୁମାର ପାଣିଗ୍ରାହୀ କହିଛନ୍ତି।
