ବ୍ରହ୍ମପୁର ଅଫିସ,୨୩ା୧- ସଦର ଥାନା ସୁକୁଣ୍ଡା ମଶାଣିପଦର ସାହିରେ ବୁଧବାର ପରକୀୟା ପ୍ରୀତିରୁ ଏକ ହତ୍ୟାକାଣ୍ଡ ଘଟିଛି। ମୃତକ ହେଲେ ପ୍ରଫୁଲ୍ଲ ସାହୁ (୩୨)। ପୋଲିସ ମୃତ ପ୍ରଫୁଲ୍ଲଙ୍କ ଦାଦା ପୁଅ ଭାଇ ମହେନ୍ଦ୍ରଙ୍କ ଅଭିଯୋଗ କ୍ରମେ ଏକ ହତ୍ୟା ମାମଲା (ନଂ.୧୯/୨୦) ରୁଜୁକରି ତଦନ୍ତ ଆରମ୍ଭ କରିଛି। ପ୍ରଫଲ୍ଲଙ୍କୁ ତାଙ୍କ ସ୍ତ୍ରୀ ପ୍ରେମିକ ସହ ମିଶି ହତ୍ୟା କରିଥିବା ତଦନ୍ତରୁ ଜଣାପଡିଛି। ମୃତକଙ୍କ ସ୍ତ୍ରୀ ମିତା ସାହୁ (୨୫) ଓ ତାଙ୍କ ପ୍ରେମିକ ଭବାନୀପାଟଣାର ସରୋଜ ମହାରଣା (୩୧)ଙ୍କୁ ଗିରଫ କରାଯାଇଥିବା ସଦର ଏସ୍ଡ଼ିପିଓ ଜୟନ୍ତ ମହାପାତ୍ର ସୂଚନା ଦେଇଛନ୍ତି। ଘଟଣାରୁ ପ୍ରକାଶ, ସ୍ତ୍ରୀ ମିତା ଥାନାରେ କରିଥିବା ଅଭିଯୋଗ ଅନୁଯାୟୀ, ସ୍ବାମୀ ପ୍ରଫୁଲ୍ଲ ଜଣେ ଠିକାଦାର। ମୁଁ ଓ ମୋ ୫ ବର୍ଷର ପୁଅ ଓ ୪ ବର୍ଷର ଝିଅ ସହ ଆମେ ସୁକୁଣ୍ଡାରେ ରହୁଥିଲୁ। ମଙ୍ଗଳବାର ରାତି ପ୍ରାୟ ୮ଟାରେ ସ୍ବାମୀ କାମସାରି ନିଶାସକ୍ତ ଅବସ୍ଥାରେ ଘରକୁ ଫେରିଥିଲେ। ମୋ ସହ ଝଗଡା କରି ଘର କାନ୍ଥରେ ମୁଣ୍ଡ ପିଟିଦେଇଥିଲେ। ଗୁରୁତର ଅବସ୍ଥାରେ ତାଙ୍କୁ ଏମ୍କେସିଜି ମେଡିକାଲରେ ଭର୍ତ୍ତି କରାଯାଇଥିଲା। ସେଠାରେ ଡାକ୍ତର ମୃତ ଘୋଷଣା କରିଥିଲେ। ପୋଲିସ ପ୍ରଥମେ ମିତାଙ୍କ ଅଭିଯୋଗ କ୍ରମେ ନଂ.୪/୨୦ରେ ଏକ ଅପମୃତ୍ୟୁ ମାମଲା ରୁଜୁ କରିଥିଲା। ପ୍ରଫୁଲ୍ଲଙ୍କୁ ଯୋଜନାବଦ୍ଧ ଭାବେ ହତ୍ୟା କରାଯାଇଥିବା ଭାଇ ମହେନ୍ଦ୍ର ବୁଧବାର ଥାନାରେ ଅଭିଯୋଗ କରିଥିଲେ। ପଚରାଉଚରା ପରେ ପ୍ରଫୁଲ୍ଲଙ୍କୁ ତଣ୍ଟି ଚିପି ହତ୍ୟା କରାଯାଇଥିବା ନେଇ ପୋଲିସ ଡାକ୍ତରଙ୍କଠାରୁ ସୂଚନା ପାଇଥିଲା। ମିତାଙ୍କ ଉପରେ ପୋଲିସର ସନ୍ଦେହ ହୋଇଥିଲା। ମିତାଙ୍କୁ ପଚାରିବାରୁ ସେ କେତେବେଳେ ତାଙ୍କ ସ୍ବାମୀ ଘର ଭିତରେ ମୁଣ୍ଡ ପିଟିଦେବାରୁ ପ୍ରଚୁର ରକ୍ତସ୍ରାବ ହୋଇଥିବା କହୁଥିଲାବେଳେ ଆଉ କେତେବେଳେ ମଦ ପିଇ ଆସି ବାନ୍ତି କରିଥିଲେ ବୋଲି କହିଥିଲେ। କଥାରେ ତାଳମେଳ ନ ରହିବାରୁ ତାଙ୍କ ଉପରେ ସନ୍ଦେହ ଦୃଢୀଭୂତ ହୋଇଥିଲା। ଅନ୍ୟପଟେ ଘର ଭିତରେ କୌଣସି ସ୍ଥାନରେ ରକ୍ତ ପଡିଥିବା ପୋଲିସ ଦେଖିବାକୁ ପାଇ ନ ଥିଲା। ପାରିପାର୍ଶ୍ୱିକ ସ୍ଥିତିରୁ ପ୍ରଫୁଲ୍ଲଙ୍କୁ ହତ୍ୟା କରାଯାଇଥିବା ପୋଲିସ ଅନୁମାନ କରୁଛି। ଏଣୁ ମିତା ଓ ତାଙ୍କ ପ୍ରେମିକ ସରୋଜ ମହାରଣାଙ୍କୁ ଗିରଫ କରାଯାଇଥିବାବେଳେ ଗୁରୁବାର ସେମାନଙ୍କୁ କୋର୍ଟ ଚାଲାଣ କରାଯିବ ବୋଲି ଏସ୍ଡ଼ିପିଓ ମହାପାତ୍ର କହିଛନ୍ତି।
