ବାଲିଆ, ୨୧।୨: ବିରିଡି ବ୍ଲକ ହାଜିପୁର ପଞ୍ଚାୟତ କାର୍ଯ୍ୟାଳୟ ଆଗରେ ପ୍ରସ୍ତାବିତ ବର୍ଜ୍ୟବସ୍ତୁ ପୁନରୁଦ୍ଧାର ପାଇଁ ସ୍ଥାୟୀ କେନ୍ଦ୍ର ନିର୍ମାଣକୁ ଗୋପାଳ ସାହିର ଜନସାଧାରଣ ବିରୋଧ କରିବା ସହ ଏ ନେଇ ଜିଲାପାଳଙ୍କୁ ଲିଖିତ ଅଭିଯୋଗ ପତ୍ର ପ୍ରଦାନ କରିଛନ୍ତି। ପ୍ରସ୍ତାବିତ ବର୍ଜ୍ୟବସ୍ତୁ ପୁନରୁଦ୍ଧାର କେନ୍ଦ୍ରକୁ ଅନ୍ୟ କୌଣସି ସ୍ଥାନରେ କରିବାକୁ ସାହିବାସିନ୍ଦା ଅଭିଯୋଗ ପତ୍ରରେ ଦର୍ଶାଇଛନ୍ତି। ଗ୍ରାମର ପୀତାମ୍ବର ବେହେରା, ପ୍ରମୋଦ ବେହେରା, ପଦ୍ମଲୋଚନ ବେହେରା, ଅକ୍ଷୟ କୁମାର ଦାସ, କାହ୍ନୁ ଚରଣ ବେହେରା, ରାମଚନ୍ଦ୍ର ବେହେରା, ସୁଦର୍ଶନ ଦାସ, ସରୋଜ କୁମାର ବେହେରା, ପଦ୍ମନାଭ ଦାସ, ଲକ୍ଷ୍ମୀଧର ଦାସ, ଭାଗ୍ୟଧର ଦାସ, ଗୌରାଙ୍ଗ ଦାସ ପ୍ରମୁଖ କହିଛନ୍ତି ଯେ, ହାଜିପୁର ଗ୍ରାମ ଗୋପଳସାହିର ପ୍ରବେଶ ପଥରେ ପଞ୍ଚାୟତ କାର୍ଯ୍ୟାଳୟ ରହିଛି। ଏହାର ସମ୍ମୁଖ ଭାଗରେ ଅଳିଆ ଆବର୍ଜନା ଗଚ୍ଛିତ ରଖିବା ପାଇଁ ବ୍ୟବସ୍ଥା କରାଗଲେ, ସେଥିରୁ ନିର୍ଗତ ଦୁର୍ଗନ୍ଧ ଗ୍ରାମବାସୀଙ୍କୁ ଅତିଷ୍ଠ କରିବ। ତେଣୁ ପ୍ରସ୍ତାବିତ ସ୍ଥାନରେ ଏହି କେନ୍ଦ୍ର କରା ନ ଯାଇ ଅନ୍ୟତ୍ର କରାଯାଉ ବୋଲି କହିଛନ୍ତି। ଏ ସମ୍ପର୍କରେ ସରପଞ୍ଚ ବିମଲ ସେଠୀଙ୍କୁ ପଚାରିବାରେ, ପଞ୍ଚାୟତରେ ଖୋଲା ସ୍ଥାନ ଥିଲେ ମଧ୍ୟ ତାହା ଅଧିକ ଦୂର ଓ ସେହି ସ୍ଥାନକୁ ବିଦ୍ୟୁତ ସଂଯୋଗ ନାହିଁ। ଅନ୍ୟପଟେ ସବୁ ଦୃଷ୍ଟିରୁ ସୁବିଧା ପାଇଁ ବର୍ଜ୍ୟବସ୍ତୁ ପୁନରୁଦ୍ଧାର ପାଇଁ ସ୍ଥାୟୀ କେନ୍ଦ୍ର ନିର୍ମାଣ କରିବାକୁ ଉକ୍ତ ସ୍ଥାନ ବଛାଯାଇଛି। ଏହାଦ୍ୱାରା ଜନସାଧାରଣଙ୍କର କୌଣସି ଅସୁବିଧା ହେବନାହିଁ ବୋଲି ସେ କହିଛନ୍ତି।
