ପାରାଦୀପ, ୨୧।୨ (ସ୍ବ.ପ୍ର.): ପାରାଦୀପ ବନ୍ଦରରେ ବିଦେଶୀ ନାବିକଙ୍କ ସ୍ବାସ୍ଥ୍ୟ ଯାଞ୍ଚ ପାଇଁ ପ୍ରଥମକରି ପୋର୍ଟ ହେଲ୍ଥ ୟୁନିଟ୍ ଆରମ୍ଭ ହୋଇଛି। ଏ ନେଇ ଗୁରୁବାର ପିଏଚ୍ଓ (ପୋର୍ଟ ହେଲ୍ଥ ଅର୍ଗାନାଇଜେଶନ୍) ଓ ପିପିଟି (ପାରାଦୀପ ପୋର୍ଟ ଟ୍ରଷ୍ଟ) ମଧ୍ୟରେ ଚୁକ୍ତି ସ୍ବାକ୍ଷରିତ ହୋଇଛି। କେନ୍ଦ୍ରୀୟ ସ୍ବାସ୍ଥ୍ୟ ମନ୍ତ୍ରଣାଳୟର ଆଞ୍ଚଳିକ ନିର୍ଦ୍ଦେଶକ ଡା. ସୁଶାନ୍ତ କୁମାର କର ଓ ବନ୍ଦର ସମ୍ପାଦକ ଅଧିକାରୀ ବିଶ୍ୱଜିତ୍ ମିଶ୍ର ଏଥିରେ ଦସ୍ତଖତ କରିଥିଲେ। ବନ୍ଦର ଅଧ୍ୟକ୍ଷ ରିଙ୍କେଶ ରାୟ ଓ ପୋର୍ଟ ମେଡିକାଲ ସିଏମ୍ଓ ଡା. ପ୍ରହ୍ଲାଦ ପଣ୍ଡାଙ୍କ ଉପସ୍ଥିତିରେ ଚୁକ୍ତି ସ୍ବାକ୍ଷରିତ ହୋଇଥିଲା। ଏହି ସ୍ବାସ୍ଥ୍ୟକେନ୍ଦ୍ର ମଧୁବନ ଭୂୟଁା ଛକଠାରେ ଥିବା ପ୍ରାଥମିକ ସ୍ବାସ୍ଥ୍ୟକେନ୍ଦ୍ରକୁ ନବୀକରଣ କରାଯାଇ ସେହିଠାରେ ପରିଚାଳନା କରାଯିବ। ଏଥିରେ ୪ କକ୍ଷ ରହିଛି। ପୋର୍ଟ ହେଲ୍ଥ ଅଫିସର ଏବେ ପ୍ରତ୍ୟେକ ଜାହାଜ ଲାଗିବା ପରେ ତା’ ମଧ୍ୟକୁ ଯାଇ ସେଥିରେ ଥିବା ନାବିକଙ୍କ ସ୍ବାସ୍ଥ୍ୟ ଯାଞ୍ଚ କରିବେ। ଏଥିସହ ସେମାନଙ୍କ ଖାଦ୍ୟ, ଆବର୍ଜନା ସ୍ଥଳ ଦେଖିବେ। ପଣ୍ୟରେ ବେଳେବେଳେ କିଛି ମୃତ ପଶୁପକ୍ଷୀ ଆସିଥାନ୍ତି, ତାକୁ ମଧ୍ୟ ଯାଞ୍ଚ କରିବେ। ଏଥିସହ ବନ୍ଦରାଞ୍ଚଳରେ ଥିବା ହୋଟେଲଗୁଡ଼ିକର ଖାଦ୍ୟ ଯାଞ୍ଚ କରିବେ। କାରଣ ବିଦେଶୀ ନାବିକମାନେ ବେଳେବେଳେ ସ୍ଥଳଭାଗକୁ ଆସିବାବେଳେ ହୋଟେଲରେ ଖାଇଥାନ୍ତି। ସେମାନଙ୍କ ସୁରକ୍ଷା ପାଇଁ ଏସବୁ ଯାଞ୍ଚ କରାଯିବ। ଯଦି କୌଣସି ବିଦେଶୀ ନାଗରିକଙ୍କ ସ୍ବାସ୍ଥ୍ୟ ଖରାପ ଥାଏ, ତା’ ହେଲେ ତାଙ୍କୁ ଏହି ନୂତନ ସ୍ବାସ୍ଥ୍ୟକେନ୍ଦ୍ରରେ ଚିକିତ୍ସା କରାଯିବ ବୋଲି ଡା. କର ସୂଚନା ଦେଇଛନ୍ତି। ଇଣ୍ଟରନ୍ୟାଶନାଲ ହେଲ୍ଥ ରେଗୁଲେଶନ ୨୦୦୫ ଅନୁସାରେ ଏହା କରାଯିବା ଅତ୍ୟନ୍ତ ଆବଶ୍ୟକ ଥିଲା ବୋଲି ଅଧ୍ୟକ୍ଷ ରାୟ କହିଛନ୍ତି। ଏହି ଅବସରରେ ଅଧ୍ୟକ୍ଷ ରାୟ ଅନ୍ୟ ଏକ ବଡ଼ ଘୋଷଣା କରିଥିଲେ। ଚଳିତ ଆର୍ଥିକ ବର୍ଷର ଗୁରୁବାର ସୁଦ୍ଧା ପାରାଦୀପ ବନ୍ଦର ତୃତୀୟ ବର୍ଷ ପାଇଁ ୯୯ ମିଲିୟନ୍ ମେଟ୍ରିକ ଟନ୍ ପଣ୍ୟ କାରବାର କରିଛି। ଆଉ ୩ ଦିନ ଭିତରେ ୧୦୦ ଏମ୍ଏମ୍ଟି ଅତିକ୍ରମ କରିବ। ବର୍ଷ ଶେଷ (ମାର୍ଚ୍ଚ ୩୧) ସୁଦ୍ଧା ୧୨୦ ଏମ୍ଏମ୍ଟି କାରବାର ହେବ ବୋଲି ଆଶା କରାଯାଉଛି ବୋଲି ଅଧ୍ୟକ୍ଷ ରାୟ କହିଥିଲେ। ଦେଶର ୧୨ଟି ବୃହତ୍ ବନ୍ଦର କ୍ଷେତ୍ରରେ ପାରାଦୀପ ବନ୍ଦର ଲଗାତାର ୩ ବର୍ଷ ହେଲା ଏହି ସଫଳତା ପାଇଛି। ଅନ୍ୟ କେତେକ ବନ୍ଦରରେ ପଣ୍ୟ କାରବାର ସ୍ଥିତି ନକାରାତ୍ମକ ଥିବାବେଳେ ପାରାଦୀପ ବନ୍ଦର କିନ୍ତୁ ୧୦୦ ଏମ୍ଏମ୍ଟି ଅତିକ୍ରମ କରିବା ଐତିହାସିକ ସଫଳତା ବୋଲି ଅଧ୍ୟକ୍ଷ କହିଛନ୍ତି।
