ଲଣ୍ଡନ, ୧୯।୬- ଚଳିତ ବିଶ୍ୱକପ୍ରେ ଭାରତ ବିପକ୍ଷ ହାଇଭୋଲଟେଜ ମ୍ୟାଚ୍ରେ ପରାସ୍ତ ହେବାପରେ ପାକିସ୍ତାନ କ୍ରିକେଟରଙ୍କୁ ଏବେ ନିଜ ଦେଶରୁ ଚାରିଆଡ଼ୁ ସମାଲୋଚନାର ଶିକାର ହେବାକୁ ପଡ଼ିଛି। ଏପରିକି କେତେକ ପ୍ରଶଂସକ ସୋସିଆଲ ମିଡିଆରେ ଖରାପ ଭାଷା ପ୍ରୟୋଗ କରି ଖେଳାଳିଙ୍କୁ ଗାଳି କରିଥିବାର ରିପୋର୍ଟ ପ୍ରକାଶ ପାଇଛି। ପାକିସ୍ତାନର ବିଭିନ୍ନ ଗଣମାଧ୍ୟମ ମଧ୍ୟ ଖେଳାଳିଙ୍କୁ ସମାଲୋଚନା କରିବାକୁ ପଛାଇ ନାହାନ୍ତି। ଖେଳାଳିଙ୍କ ଫିଟ୍ନେସ ସମସ୍ୟା, ମ୍ୟାଚ୍ ପୂର୍ବଦିନ ପାର୍ଟି କରିବା ଆଦି ବିଷୟକୁ ନେଇ ଖେଳାଳିଙ୍କୁ ଗଣମାଧ୍ୟରେ ପ୍ରବଳ ଭର୍ତ୍ସନା କରାଯାଉଛି। ଭାରତ ବିପକ୍ଷ ମ୍ୟାଚ୍ ପୂର୍ବଦିନ ଦଳର ବରିଷ୍ଠ ଖେଳାଳି ସୋଏବ ମଲିକ ଓ ତାଙ୍କ ସ୍ତ୍ରୀ ସାନିଆ ମିର୍ଜାଙ୍କ ସମେତ କିଛି ସାଥୀ କ୍ରିକେଟର୍ ଶିଶା ବାର୍ରେ ପାର୍ଟି କରିବା ସହ ହୁକ୍କା ନେଇଥିବାର କିଛି ପାକିସ୍ତାନ ଗଣମାଧ୍ୟମ ଦାବି କରିଛନ୍ତି। ଯାହାକୁ ନେଇ ଶେଷରେ ଭେଟେରାନ ସୋଏବ ନିଜର ନୀରବତା ଭାଙ୍ଗିଛନ୍ତି। ସୋଏବ କହିଛନ୍ତି ଯେ, ବାର୍ରେ ପାର୍ଟି କରୁଥିବାର ଯେଉଁ ଭିଡିଓ ସୋସିଆଲ ମିଡିଆରେ ଘୂରିବୁଲୁଛି ଏହା ଜୁନ୍ ୧୫ ପରିବର୍ତ୍ତେ ଜୁନ୍ ୧୩ ତାରିଖର। ଦୀର୍ଘ ୨୦ ବର୍ଷରୁ ଊର୍ଦ୍ଧ୍ୱ ସମୟ ଧରି ପାକିସ୍ତାନ କ୍ରିକେଟର ସେବା କରିବା ପରେ ଦୁଃଖ ଲାଗୁଛି କି ମୋ ବ୍ୟକ୍ତିଗତ ଜୀବନ ବିଷୟରେ ମୋତେ ସ୍ପଷ୍ଟୀକରଣ ଦେବାକୁ ପଡ଼ୁଛି। ସେହିଭଳି କେବେ ଆମର କୋର୍ଟ ଦ୍ୱାରା ପାକିସ୍ତାନ ଗଣମାଧ୍ୟମକୁ ପ୍ରତିବନ୍ଧକ ଲଗାଯିବ ବୋଲି ସୋଏବ ପ୍ରଶ୍ନ କରିଛନ୍ତି। ସାନିଆ ମିର୍ଜାଙ୍କୁ ଏହା ମଧ୍ୟକୁ ନ ଟାଣିବା ପାଇଁ ଏହି ଭେଟେରାନ ଅଲ୍ରାଉଣ୍ଡର ପାକିସ୍ତାନ ଗଣମାଧ୍ୟମ ଓ ପ୍ରଶଂସକଙ୍କୁ ବିନିତ ଅନୁରୋଧ କରିଛନ୍ତି। ‘ଆମମାନଙ୍କ ପରିବାରକୁ ସମ୍ମାନ ଜଣାନ୍ତୁ ଏବଂ ସେମାନଙ୍କୁ ଅଯଥା ଏହି ଚର୍ଚ୍ଚାକୁ ଟାଣିବା ଉଚିତ୍ ନୁହେଁ। ଏପରି କରିବା ଭଲ ନୁହେଁ’ ବୋଲି ମଲିକ ଟୁଇଟର୍ରେ ଉଲ୍ଲେଖ କରିଛନ୍ତି।
