ଗୋପାଳପୁର,୪ା୨-ଗଞ୍ଜାମ ଜିଲା ଗୋଳନ୍ଥରା ଥାନା ପାଲୁର ହିଲ୍୍ସ୍ଥିତ ନିଷ୍ଟ କଲେଜରେ ଛାତ୍ର ଅଶାନ୍ତି ଲାଗି ରହିଛି। ଏଥିପାଇଁ ପ୍ରଶାସନିକ ବିବାଦକୁ ଦାୟୀ କରାଯାଇଥିବା ଅଭିଯୋଗ ହୋଇଛି। ଗତ ତିନିଦିନ ହେଲା ଛାତ୍ରୀଛାତ୍ର ଓ କର୍ମଚାରୀଙ୍କ ମଧ୍ୟରେ ଅଶାନ୍ତି ଦେଖାଦେଇଛି। କଲେଜ ରେଜିଷ୍ଟ୍ରାରଙ୍କୁ ବାହାର କରିଦେବା ଏବଂ ଡାଇରେକ୍ଟର ଓ ଚେୟାରମ୍ୟାନଙ୍କ କଥାରେ ତାଳମେଳ ରହୁ ନ ଥିବାରୁ ଏହାର ପ୍ରତିବାଦରେ ସୋମବାର ଛାତ୍ରୀଛାତ୍ର ହୋହଲ୍ଲା କରିବା ସହ କର୍ମଚାରୀମାନେ ଏହାର ପ୍ରତିବାଦ କରି କଲେଜ ସମ୍ମୁଖରେ ଧାରଣାରେ ବସିଥିଲେ।
ଛାତ୍ରୀଛାତ୍ରଙ୍କ କହିବାନୁସାରେ, ଗତ ଏକ ବର୍ଷ ତଳେ ଟ୍ରଷ୍ଟି କମିଟି ଦ୍ବାରା ରେଜିଷ୍ଟ୍ରାର ଭାବେ କ୍ଷୀରୋଦ କୁମାର ମହାପାତ୍ର ଚୟନ ହୋଇଥିଲେ। ସେ କଲେଜରେ ବିଭିନ୍ନ ସଂସ୍କାରମୂଳକ କାର୍ଯ୍ୟ କରି ଉନ୍ନତ ଧରଣର ପାଠପଢ଼ା, ଖାଦ୍ୟ ଆଦି ସୁବିଧା ଏବଂ ଆର୍ଥିକ କାରବାରରେ ସଂସ୍କାର ଆଣିଥିଲେ।
ଏଥିସହ କର୍ମଚାରୀଙ୍କୁ ମଧ୍ୟ ସମସ୍ତ ପ୍ରକାର ସୁବିଧା ଦେଇଥିଲେ। ଗତ ଜାନୁୟାରୀ ୩ ତାରିଖରେ ବିନା କାରଣରେ କଲେଜ ନିର୍ଦ୍ଦେଶକ ତାଙ୍କୁ ବାହାର କରି ଦେଇଥିଲେ । ଏହାପରେ ଡାଇରେକ୍ଟର ଓ ଚେୟାରମ୍ୟାନଙ୍କ ମଧ୍ୟରେ ମତଭେଦ ହୋଇଥିଲା। ଏହାକୁ ସମାଧାନ କରିବା ପାଇଁ ଚେୟାରମ୍ୟାନ ବାରମ୍ବାର ଡାଇରେକ୍ଟରଙ୍କୁ ବୈଠକ କରିବାକୁ ଡ଼ାକିଥିଲେ ମଧ୍ୟ ସେ ଆସୁ ନ ଥିଲେ। ପ୍ରତିବର୍ଷ ସଂକଳ୍ପ କାର୍ଯ୍ୟକ୍ରମ ପାଇଁ ୮ ରୁ ୧୦ ଲକ୍ଷ ଟଙ୍କା ବ୍ୟୟ କରାଯାଉଥିବା ବେଳେ ଚଳିତ ବର୍ଷ ୨ ଲକ୍ଷ ଟଙ୍କାରେ କରାଯିବା ଏବଂ ତାହାକୁ ଇନ୍ଡୋରରେ କରିବା ପାଇଁ ବିଜ୍ଞପ୍ତି ପ୍ରକାଶ ପାଇଥିଲା। ଏହାକୁ ନେଇ ଛାତ୍ରୀଛାତ୍ରଙ୍କ ମଧ୍ୟରେ ଅଶାନ୍ତି ଲାଗି ରହିଛି। ନିଷ୍ଟକୁ ବିଶ୍ବବିଦ୍ୟାଳୟ କରିବା ପାଇଁ ଚେୟାରମ୍ୟାନ ସବୁ ପ୍ରକାର କାର୍ଯ୍ୟକ୍ରମ ହାତକୁ ନେଇଥିବା ବେଳେ ଏକ ଟିମ୍ କଲେଜ ପରିଦର୍ଶନରେ ଆସିଥିଲେ । ତେବେ ଏହାକୁ ଡାଇରେକ୍ଟର କୌଣସି ପ୍ରକାର ସହଯୋଗ କରି ନ ଥିବା ଛାତ୍ରୀଛାତ୍ରମାନେ ଅଭିଯୋଗ କରିଛନ୍ତି ା
ସୂଚନାଥାଉକି, ୧୯୯୬ ରେ ନିଷ୍ଟ କଲେଜ ଆରମ୍ଭ ହୋଇଥିଲା।
ଡାଇରେକ୍ଟର ଭାବେ ସଂଗ୍ରାମ ମୁଦୁଲି ଓ ଚେୟାରମ୍ୟାନ ଭାବେ ଜ୍ବାଇଁ ସୁକାନ୍ତ କୁମାର ମହାପାତ୍ର ରହିଥିଲେ । ଏହା କିଛିବର୍ଷ ଚାଲିବା ପରେ ଟ୍ରଷ୍ଟିରେ ମତଭେଦ ଆରମ୍ଭ ହେବା ଫଳରେ ଚେୟାରମ୍ୟାନ ପଦବୀରୁ ସୁକାନ୍ତଙ୍କୁ ବାଦ ଦିଆଯାଇଥିଲା । ପରବର୍ତ୍ତୀ ସମୟରେ ସୁକାନ୍ତ ସୁପ୍ରିମକୋର୍ଟରେ ମକଦ୍ଦମା କରି ବିଜୟୀ ହୋଇଥିଲେ । ହେଲେ ଡ଼ାଇରେକ୍ଟର ସଂଗ୍ରାମ ଚେୟାରମ୍ୟାନ ସୁକାନ୍ତଙ୍କୁ କୌଣସି ପ୍ରକାର ସହଯୋଗ କରୁ ନ ଥିବା ଅଭିଯୋଗ ହୋଇଛି ା
ଏ ସମ୍ପର୍କରେ କଲେଜ ଚେୟାରମ୍ୟାନ ସୁକାନ୍ତଙ୍କ ସହ ଯୋଗାଯୋଗ କରିବାରୁ, ବର୍ତ୍ତମାନ ବୈଠକ ଚାଲିିଛି । ଘଟଣା ସମ୍ପର୍କରେ ମୁଁ କିଛି କହିପାରିିବି ନାହିଁ। ପରବର୍ତ୍ତୀ ସମୟରେ କହିବି ବୋଲି କହିଥିଲେ। ଅପରପକ୍ଷରେ ଡାଇରେକ୍ଟର ସଂଗ୍ରାମ ମୁଦୁଲିଙ୍କ ମୋବାଇଲ ଫୋନ ନମ୍ବର ୯୪୩୭୦୧୧୧୬୫ ରେ ଯୋଗାଯୋଗ କରିବାରୁ ସେ ଉଠାଇ ନ ଥିଲେ । ଫଳରେ ତାଙ୍କଠାରୁ କୌଣସି ଉତ୍ତର ମିଳିପାରିନାହିଁ । ଅନ୍ୟପଟେ ଘଟଣାକୁ ଦୃଷ୍ଟିରେ ରଖି ନିଷ୍ଟ ପ୍ରଶାସନିକ ଅଧିକାରୀ ଡ. ସୁରେଶ ପଟ୍ଟନାୟକ ୧୫ ଦିନ ଛୁଟି ଘୋଷଣା କରିଛନ୍ତିି ା
