ନୂଆଦିଲ୍ଲୀ,୧୨।୪: ବର୍ତ୍ତମାନର ଲକ୍ଡାଉନ ସମୟରେ ଲୋକଙ୍କ ନିକଟରେ ନିରନ୍ତର ଏଲ୍ପିଜି ଯୋଗାଣ ଦିଗରେ ଦେଶର ତୈଳ ବିପଣନ କମ୍ପାନୀଗୁଡ଼ିକ ଫୋକସ ରଖିଛନ୍ତି। ରାଜ୍ୟ ସରକାର ଓ ସ୍ଥାନୀୟ ପ୍ରତିନିଧିଙ୍କ ନିର୍ଦ୍ଦେଶ ଅନୁଯାୟୀ ଏଲ୍ପିଜି ଯୋଗାଣ ସାଧାରଣ ଭାବେ ଚାଲିଛି। ଏଲ୍ପିଜି ଅତ୍ୟାବଶ୍ୟକ ସାମଗ୍ରୀ ହୋଇଥିବାରୁ ଏହାକୁ ତାଲାବନ୍ଦରୁ ବାଦ୍ ଦିଆଯାଇଛି। ଘର ପାଖକୁ ନିରନ୍ତର ଏଲ୍ପିଜି ଯୋଗାଣ ଲାଗି କର୍ମଚାରୀମାନେ ନିରନ୍ତର କାର୍ଯ୍ୟ କରୁଛନ୍ତି। ଲକ୍ଡାଉନ ସମୟରେ ଯଥେଷ୍ଟ ପରିମାଣର ଏଲ୍ପିଜି ଉପଲବ୍ଧ ରହିଛି। ଏହାର କୌଣସି ଅଭାବ ନାହିଁ। ଏଣୁ ଏନେଇ କୌଣସି ଗୁଜବରେ ବିଶ୍ୱାସ ନ କରି ଆତଙ୍କିତ ହୋଇ କିଣିବାଠାରୁ ଦୂରେଇ ରହିବାକୁ କମ୍ପାନୀଗୁଡ଼ିକ ଉପଭୋକ୍ତାଙ୍କୁ ନିବେଦନ କରିଛନ୍ତି। ବିତରକଙ୍କ ପାଖରେ ଲୋକମାନେ ଆତଙ୍କିତ ହୋଇ ଗହଳି କରୁଥିବାର ଦେଖାଯାଇଛି। ପ୍ରଧାନମନ୍ତ୍ରୀ ଗରିବ କଲ୍ୟାଣ ଯୋଜନାରେ ସହାୟତା ପାଇବାକୁ ଥିବା ହିତାଧିକାରୀ ସାମାଜିକ ଦୂରତା ନିୟମକୁ ଭାଙ୍ଗି ବିତରକଙ୍କ ପାଖରେ ଭିଡ଼ ଜମାଉଛନ୍ତି। ବିତରକଙ୍କ ପାଖକୁ ନ ଆସି ଘରେ ଥାଇ ଏସ୍ଏମ୍ଏସ୍ କିମ୍ବା ଆଇଭିଆର୍ସି ମାଧ୍ୟମରେ ଲୋକମାନେ ବୁକିଂ କରିପାରିବେ ବୋଲି କମ୍ପାନୀଗୁଡିକ ସୂଚନା ଦେଇଛନ୍ତି। ଜଣେ ଉଜ୍ଜ୍ୱଳା ଉପଭୋକ୍ତା ମାସକୁ ଗୋଟିଏ ସିଲିଣ୍ଡର ପାଇପାରିବେ। ଗୋଟିଏ ରିଫିଲ୍ ପାଇବାର ୧୫ ଦିନ ପରେ ଅନ୍ୟଟିକୁ ରିଫିଲ୍ କରାଇପାରିବେ। ଉଜ୍ଜ୍ୱଳାରେ ୮ କୋଟି ହିତାଧିକାରୀଙ୍କ ବ୍ୟାଙ୍କ ଆକାଉଣ୍ଟକୁ ଏପ୍ରିଲ ୨୦୨୦ର ଆଗୁଆ ଖୁଚୁରା ବିକ୍ରି ଦର ସ୍ଥାନାନ୍ତର କରାଯିବ। ଏହା କେବଳ ଏଲ୍ପିଜି କିଣିବା ପାଇଁ ଉଦ୍ଦିଷ୍ଟ। ଉଜ୍ଜ୍ୱଳା ହିତାଧିକାରୀଙ୍କୁ ଆଗାମୀ ୩ ମାସ ପର୍ଯ୍ୟନ୍ତ ମାଗଣା ଗ୍ୟାସ୍ ପ୍ରଦାନ ନେଇ ସରକାର ଘୋଷଣା କରିଛନ୍ତି।
