ହାଟଡିହି, ୧୩।୧୨(ଡି.ଏନ.ଏ.): କେନ୍ଦୁଝର ଜିଲା ନନ୍ଦିପଦା ଥାନା ଛେନାପଦି ବଜାରରୁ ପ୍ରଫୁଲ୍ଲ ପଣ୍ଡାଙ୍କ ୧୨ ବର୍ଷର ପୁଅ ପଙ୍କଜ ଗୁରୁବାର ରାତିରେ ନିଖୋଜ ହୋଇଯାଇଥିଲେ। ଏନେଇ ତାଙ୍କ ପରିବାର ପକ୍ଷରୁ ଥାନାରେ ଅଭିଯୋଗ ହୋଇଥିଲା। ଥାନାଧୀକାରୀ ରଣଜିତ୍ ପଟ୍ଟନାୟକ, ଏସଆଇ ଅରୁପ ସାମଲ ଅନ୍ୟ ପୋଲିସ କର୍ମଚାରୀମାନେ ମିଳିତ ଭାବେ ଏକ ଟିମ୍ ଗଠନ କରି ଗତ ଗୁରୁବାର ସନ୍ଧ୍ୟାରୁ ବିଭିନ୍ନ ସ୍ଥାନରେ ଖୋଜାଖୋଜି କରିଥିଲେ। ଶେଷରେ ଭୁବନେଶ୍ୱର ୬ନଂ ପ୍ଲାଟଫର୍ମ ଅଞ୍ଚଳରୁ ପଙ୍କଜଙ୍କୁ ରାତି ୧ଟାବେଳେ ଉଦ୍ଧାର କରାଯାଇଛି। ଛାତ୍ରଟି କାନ୍ଦୁଥିବାବେଳେ ସେ କୌଣସି କଥା ପ୍ରକାଶ କରିପାରୁନାହିଁ। ସ୍ଥାନୀୟ ଅଟୋ ସଂଘର କର୍ମକର୍ତ୍ତାମାନେ ଥାନାଧୀକାରୀଙ୍କୁ ଛାତ୍ରଙ୍କ ଉଦ୍ଧାର ଦିଗରେ ସହଯୋଗ କରିଥିଲେ। ୨୪ ଘଣ୍ଟା ନପୂରୁଣୁ ନୂତନ ଭାବେ ଥାନାଧୀକାରୀ ଦାୟିତ୍ୱ ନେଇଥିବା ରଣଜିତ୍ ପଟ୍ଟନାୟକଙ୍କ ଏଭଳି ପଦକ୍ଷେପକୁ ସ୍ଥାନୀୟ ଅଞ୍ଚଳରେ ପ୍ରଶଂସା କରାଯାଇଛି।
