ନାମଫଳକକୁ କେନ୍ଦ୍ରକରି ଗୋଷ୍ଠୀ ସଂଘର୍ଷ: ୪ଗୁରୁତର
6:13 pmJune 18, 2020

ଖୋର୍ଦ୍ଧା ଅଫିସ,୧୮ା୭: ଖୋର୍ଦ୍ଧ ଜିଲା ବାଘମାରୀ ଥାନା ଅନ୍ତର୍ଗତ କୋଟପିଲା ଗ୍ରାମ ଛକରେ ଥିବା ନାମଫଳକକୁ କେନ୍ଦ୍ରକରି ଗୁରୁବାର ଗୋଷ୍ଠୀ ମଧ୍ୟରେ ସଂଘର୍ଷ ହୋଇଛି। ଏଥିରେ କୋଟପିଲା ଗ୍ରାମର ୪ଜଣ ଗୁରୁତର ହୋଇଛନ୍ତି। ସେମାନେ ହେଲେ ଅରୁପ କୁମାର ଭୋଇ(୩୩), ଦିଲୀପ କୁମାର ରଥ(୩୫), ହରିହର ତ୍ରିପାଠୀ(୨୦) ଏବଂ ସୁବାସ ଲେଙ୍କା(୨୪)। ଖବର ପାଇ ପୋଲିସ ଘଟଣାସ୍ଥଳରେ ପହଞ୍ଚି ଆହତମାନଙ୍କୁ ଉଦ୍ଧାରକରି ଜିଲା ମୁଖ୍ୟ ଚିକିତ୍ସାଳୟରେ ତ୍ତର୍ତ୍ତି କରିଛି।
ପ୍ରକାଶ ଯେ, କୋଟିପିଲା ଗ୍ରାମ ଛକରେ ପୁର୍ତ୍ତ ବିଭାଗ ପକ୍ଷରୁ ନାମଫଳକ ଲଗାଯାଇଛି। ଏହି ନାମଫଳକକୁ ନେଇ ଓସ୍ତପୁର ଗ୍ରାମର କେତେଜଣ ଯୁବକ ବିରୋଧ କରିଥିଲେ। ଏହି ସୂଚନା ଫଳକରୁ କୋଟପିଲା ଗ୍ରାମ ନାମ ହଟାଇ ଓସ୍ତପୁର ଗ୍ରାମକୁ ରାସ୍ତା ବୋଲି ଲେଖିବାକୁ ନେଇ କିଛି ଦିନ ତଳେ ଦୁଇ ଗ୍ରାମ ମଧ୍ୟରେ ମୁହାଁମୁହିଁ ହୋଇଥିଲେ। ବୁଧବାର ପୂର୍ବାହ୍ନ ଗ୍ରାମ ଛକରେ କୋଟପିଲା ଗ୍ରାମର ଏକ ଯୁବ ଗୋଷ୍ଠୀ ଚାହା ଦୋକାନରେ ବସି ଖଟି କରୁଥିବା ବେଳେ ହଠାତ୍‌ ଓସ୍ତପୁର ଗ୍ରାମର ୧୫ରୁ ଊର୍ଦ୍ଧ୍ୱ ଯୁବକ ତାଙ୍କୁ ଅତର୍କିତ ଭାବେ ଆକ୍ରମଣ କରିଥିଲେ ବୋଲି ଅଭିଯୋଗରେ ଦର୍ଶାଯାଇଛି। ଆଇନଶୃଙ୍ଖଳା ଦୃଷ୍ଟିରୁ କୋଟପିଲା ଗ୍ରାମରେ ପୋଲିସ ମୁତୟନ ରହିଛି। ଆହତମାନଙ୍କ ଅଭିଯୋଗକୁ ଭିତ୍ତିକରି ପୋଲିସ ଘଟଣାର ତଦନ୍ତ ଆରମ୍ଭ କରିଛି।