ଜୟପୁର,୨୯ା୫(ଡି.ଏନ୍.ଏ.)-ଚାଷୀଙ୍କ ଅମଳ ରବିଧାନ କ୍ରୟ ପାଇଁ ରାଜ୍ୟରେ ବିଭିନ୍ନ ସ୍ଥାନରେ ମଣ୍ଡି ଆରମ୍ଭ ହୋଇଛି। ମାତ୍ର ଚାଷୀଙ୍କ ଅମଳ ଧାନ ନିମ୍ନମାନର ଆଳ ଦେଖାଇ କୁଇଣ୍ଟାଲ ପିଛା ୬ରୁ ୭ କେଜି ଅଧିକ ଧାନ ଦେବାକୁ ଦାବି କରାଯାଉଛି ା ଏଥିରେ ସ୍ଥାନୀୟ ମିଲ୍ ମାଲିକ, ମଧ୍ୟସ୍ଥ, ଜଣେ ଯୋଗାଣ ବିଭାଗ ଅଧିକାରୀ, ଲୋକ ପ୍ରତିନିଧି ସାମିଲହୋଇ ମିଳିତ ଭାବେ ଚାଷୀଙ୍କୁ ଶୋଷୁଛନ୍ତି। ତୁରନ୍ତ ଏହାର କ୍ରାଇମବ୍ରାଞ୍ଚ ତଦନ୍ତ କରାଯିବା ସହିତ ସମ୍ପୃକ୍ତ ଦୋଷୀଙ୍କ ବିରୋଧରେ କାର୍ଯ୍ୟାନୁଷ୍ଠାନ ଗ୍ରହଣ କରିବାକୁ ବିଜେଡି ପକ୍ଷରୁ ଦାବି କରାଯାଇଛି। ଶୁକ୍ରବାର ବିଜେଡି ନେତ୍ରୀ ଡା. ଇନ୍ଦିରା ନନ୍ଦଙ୍କ ନେତୃତ୍ୱରେ ରମାକାନ୍ତ ରାଉଳ, ବିନୋଦ ପାତ୍ର, ବାଲିଙ୍କି ରାଓ, ଶିବ ପଟ୍ଟନାୟକ ପ୍ରମୁଖ ଏକ ଖବରଦାତା ସମ୍ମିଳନୀରେ ଏହା ଦାବି କରିଛନ୍ତି ା ଚଳିତ ବର୍ଷ ରବିଧାନ ଶୁଖିଲା ରହିବା ସହ ଉନ୍ନତ ମାନରେ ହୋଇଥିଲେ ସୁଦ୍ଧା ନିମ୍ନମାନ ଦର୍ଶାଇ ଚାଷୀଙ୍କୁ କୁଇଣ୍ଟାଲ ପିଛା ୬ରୁ ୭ କିଲୋ ଧାନ ଦେବାକୁ ଚାପ ପକାଉଛନ୍ତି ା ଫଳରେ ଚାଷୀ ଏହାକୁ ବିରୋଧ କରିଛି। ଏହାଦ୍ୱାରା ଅଧିକାଂଶ ମଣ୍ଡିରେ ଅଚଳାବସ୍ଥା ସୃଷ୍ଟି ହୋଇଛି। ସେହିପରି କେବଳ ଜୟପୁର, ବୋରିଗୁମ୍ମା, କୋଟପାଡ ଅଞ୍ଚଳର ଟ୍ରକ୍ଗୁଡ଼ିକକୁ ଧାନ ଚାଲାଣରେ ନିୟୋଜିତ କରାଯାଇ କଷ୍ଟମ ମିଲିଂ ଧାନ ବୋଝେଇ କରାଯାଉ ା ବାହାର ଜିଲାର ଟ୍ରକ୍ଗୁଡିକକୁ ସୁଯୋଗ ଦେଲେ ବିଜେଡି ପକ୍ଷରୁ ବିରୋଧ କରାଯିବ ବୋଲି କୁହଯାଇଛି। ଏନେଇ ଜିଲା ପ୍ରଶାସନ ଦୃଢ଼ କାର୍ଯ୍ୟାନୁଷ୍ଠାନ ଗ୍ରହଣ କରିବା ସହିତ ମଣ୍ଡିରେ କାଟ୍ନି ଛଟ୍ନି ବନ୍ଦ କରିବାକୁ ସେମାନେ ଦାବି କରିଛନ୍ତି ା ଏହାର କ୍ରାଇମବ୍ରାଞ୍ଚ ତଦନ୍ତ ନ ହେଲେ ବିଜେଡି ଆନ୍ଦୋଳନକୁ ଓହ୍ଲାଇବ ବୋଲି ଚେତାବନୀ ଦିଆଯାଇଛି ା
