ଫୁଲବାଣୀ ଅଫିସ, ୧୯ା୩: କରୋନା ସଂକ୍ରମଣକୁ ପ୍ରତିହତ କରିବା ପାଇଁ କନ୍ଧମାଳ ଜିଲା ପ୍ରଶାସନ ମଙ୍ଗଳବାରଠାରୁ ଧାରା ୧୪୪ ଜାରି କରିଛି। ପ୍ରଚାର ଗାଡିରେ ମାଇକ ମାଧ୍ୟମରେ ଏହି ଧାରା କ’ଣ, ଜିଲା ପ୍ରଶାସନ କି ନିଷ୍ପତ୍ତିି ନେଇଛି ଏବଂ ଏହାକୁ ଅବମାନନା କଲେ କ’ଣ କାର୍ଯ୍ୟାନୁଷ୍ଠାନ ନିଆଯିବ ତାହା ଉପରେ ସଚେତନ କରାଯାଇଛି। ମଙ୍ଗଳବାର ରାତି ପ୍ରାୟ ୮ଟାରେ ଆଦର୍ଶ ଥାନା ପୋଲିସ ବଜାର ବୁଲି ଅତ୍ୟାଶ୍ୟକୀୟ ଜିନିଷ ବିକ୍ରି ହେଉଥିବା ଦୋକାନକୁ ଛାଡି ଅନ୍ୟ ସବୁ ଦୋକାନ ବଜାର ବନ୍ଦ କରିଥିଲା। ହେଲେ ବୁଧବାର ସକାଳୁ ପୁଣି ଦୋକାନ ଖୋଲିଥିଲା ଓ ଲୋକେ କିଣାବିକା ପାଇଁ ଭିଡ଼ ଜମାଉଥିବା ଦେଖାଯାଇଥିଲା। ତେବେ ପୋଲିସ ଏହି ଦୋକାନୀମାନଙ୍କ ବିରୋଧରେ କାର୍ଯ୍ୟାାନୁଷ୍ଠାନ ନେବାକୁ ସଜବାଜ ହେଉଛି।
ବୁଧବାର ଫୁଲବାଣୀ ସାପ୍ତାହିକ ହାଟ ଥିଲା। ସକାଳୁ ପୋଲିସ ଏବଂ ପୌର ପରିଷଦର କମକର୍ତ୍ତା ସେଠାକୁ ଯାଇ ଲୋକଙ୍କୁ ଗହଳି କରିବାକୁ ଦେଇ ନ ଥିଲେ। କରୋନା ସଂକ୍ରମଣ ଭୟ ଥିବାରୁ କିଣାବିକା ବେଳେ ୫ ଜଣରୁ ଯେପରି ଅଧିକ ଲୋକ ଏକତ୍ରିତ ନ ହେବେ ସେଥିପ୍ରତି ଦୃଷ୍ଟି ଦେବାକୁ ପରାମର୍ଶ ଦେଇଥିଲେ। ଧାରା ୧୪୪ ଲାଗି ଥିବାରୁ ହାଟକୁ କମ୍ ଚାଷୀ ପରିବା ବିକ୍ରି କରିବାକୁ ଆସିଥିବା ପରିଲକ୍ଷିତ ହୋଇଥିଲା। ପରେ ଧୀରେ ଧୀରେ ସହରର ସମସ୍ତ ଦୋକାନ ବଜାର ଖୋଲିବାକୁ ଲାଗିଲା। ଅପରାହ୍ନ ପ୍ରାୟ ସାଢ଼େ ୧ଟାରେ ପୋଲିସର ଏକ ଟିମ୍ ବଜାରକୁ ଆସି ଦୋକାନ ଦୋକାନ ବୁଲି ବନ୍ଦ କରିଥିଲା। ସେମାନେ ଯିବାପରେ କିଛି ଦୋକାନୀ ପୁଣି ଦୋକାନ ଖୋଲିଥିଲେ। ଏ ନେଇ ଆଦର୍ଶ ଥାନାଧିକାରୀ ନରେଶ କୁମାର ସାହୁ କହିଛନ୍ତି, ଦୋକାନ ବନ୍ଦ କରିବା ପାଇଁ ଆମେ ଦୋକାନୀମାନଙ୍କୁ କହିଥିଲୁ। ବାରଣ ସତ୍ତ୍ୱେ ଯେଉଁମାନେ ଦୋକାନ ଖୋଲିଥିଲେ, ସେମାନଙ୍କ ଲିଷ୍ଟ କରାଯାଉଛି। ନିୟମ ଅନୁସାରେ କାର୍ଯ୍ୟାନୁଷ୍ଠାନ ନିଆଯିବ
ବୋଲି ପ୍ରକାଶ କରିଛନ୍ତି।
