ଅନୁଗୋଳ ଅଫିସ, ୨୧।୪
ଲକ୍ଡାଉନ୍ ଯୋଗୁ ଅନୁଗୋଳ ଜିଲାର ସମସ୍ତ ବିଦେଶୀ ମଦ ଦୋକାନରେ ତାଲା ପଡ଼ିଛି। ତଥାପି ଚୋରା ବଜାରରେ ଖୋଲାମେଲାରେ ବିକ୍ରି ହେଉଛି ମଦ। ଚାହିଦା ଏତେ ଯେ ଚୋରା ବେପାରୀମାନେ ଦର ପ୍ରାୟ ୩ ଗୁଣା କରିଦେଇଛନ୍ତି। ଦୈନିକ ଏପରି ଲକ୍ଷ ଲକ୍ଷ ଟଙ୍କାର ଚୋରା କାରବାର ହେଉଥିବାବେଳେ ଅବକାରୀ ବିଭାଗ ଏଥିପ୍ରତି ଆଦୌ ଦୃଷ୍ଟି ନ ଦେଇ କେବଳ ଦେଶୀ, ମହୁଲି ମଦ ଜବତ କରିବାକୁ ଧାଉଁଥିବା ସହରରେ ଚର୍ଚ୍ଚା ହେଉଛି।
ସହରବାସୀଙ୍କ କହିବା ଅନୁଯାୟୀ, କରୋନା କଟକଣାକୁ ଅନୁଗୋଳର ଚୋରା ବିଦେଶୀ ମଦ ବେପାରୀମାନେ ଖାତିର କରୁନାହାନ୍ତି। ପୂର୍ବରୁ ବହୁ ଢାବା, ହୋଟେଲ ଓ ପାନ ଦୋକାନରେ ଏସବୁ କାରବାର ଚାଲୁଥିଲା। କିନ୍ତୁ ଏବେ ସେସବୁ ବନ୍ଦ ରହିଥିବାରୁ ଚୋରା ବେପାରୀମାନେ ଘରେ ରଖି ବିଦେଶୀ ମଦ ବିକ୍ରି କରୁଛନ୍ତି। ଦିନକୁ ଦିନ ବଢ଼ୁଥିବା ଚାହିଦାକୁ ଦେଖି ଦର ମଧ୍ୟ ଧାର୍ଯ୍ୟ କରୁଛନ୍ତି। ଯେଉଁ ବିଦେଶୀ ମଦ ବୋତଲ ମୂଲ୍ୟ ୧୨୫୦ ଟଙ୍କା ଥିଲା ତାହା ବର୍ତ୍ତମାନ ୪ ହଜାରରେ ବିକ୍ରି କରାଯାଉଛି। ନିୟମିତ ଗ୍ରାହକ ବା ଚିହ୍ନା ମୁହଁ ହେଲେ କିଛିଟା ରିହାତି ଦିଆଯାଉଛି। ସେହିପରି ବିୟର ଗୋଟାକ ୪ଶହ ଟଙ୍କାରେ ଗ୍ରାହକଙ୍କୁ ଦିଆଯାଉଛି। ଅନୁଗୋଳ ସହର ସହ ଜିଲାର ବିଭିନ୍ନ ସ୍ଥାନରେ ଚୋରା ବେପାରୀମାନେ ସକ୍ରିୟ ରହିଥିବାରୁ ଦୈନିକ ଗାଡ଼ି ଗାଡ଼ି ଚୋରା ବିଦେଶୀ ମଦ ବିକ୍ରି ହେଉଥିବା କୁହାଯାଉଛି। ଏହି ଚୋରା କାରବାର କିପରି ରୋକାଯାଇପାରିବ ସେଥିପ୍ରତି ଅବକାରୀ ବିଭାଗ ଆଦୌ ଧ୍ୟାନ ନ ଦେଇ ଗଁା ଓ ଜଙ୍ଗଲ ମଧ୍ୟରେ ରନ୍ଧା ଯାଉଥିବା ଦେଶୀ ମଦ, ମହୁଲି ଆଦି ଜବତ କରିବାକୁ ଗୁରୁତ୍ୱ ଦେଉଥିବା ଚର୍ଚ୍ଚାର ବିଷୟ ହୋଇଛି। ତେବେ ଏ ନେଇ ଅବକାରୀ ଏସ୍ପି ସୁରେଶ ଚନ୍ଦ୍ର ନାୟକଙ୍କ ସହ ଯୋଗଯୋଗ ହୋଇପାରି ନ ଥିବାରୁ ତାଙ୍କ ମତାମତ ମିଳିପାରି ନାହିଁ।
