ନିକୋସିଆ,୧୨।୧(ଏଏଫ୍ପି)- ଇରାନର ଏକମାତ୍ର ମହିଳା ଅଲିମ୍ପିକ ପଦକ ହାସଲକାରୀ ଆଥଲେଟ୍ କିମିଆ ଅଲିଜାଦେ ଦେଶ ଛାଡି ଚାଲିଯାଇଛନ୍ତି। ଶନିବାର ଏ ନେଇ ସେ ଘୋଷଣା କରିଛନ୍ତି। ସ୍ଥାୟୀ ଭାବେ ଦେଶଛାଡି ଚାଲିଯାଇଥିବା ସେ ସ୍ପଷ୍ଟ କରିଛନ୍ତି। ୨୦୧୬ ରିଓ ଅଲିମ୍ପିକ୍ସରେ ସେ ଟାଏକୋଣ୍ଡୋରେ ବ୍ରୋଞ୍ଜ ପଦକ ହାସଲ କରିଥିଲେ। ସରକାର ଦୋମୁହାଁ ନୀତି ଓ ଆଥଲେଟ୍ମାନଙ୍କୁ ଅପମାନିତ ତଥା ଅପଦସ୍ଥ କରାଯାଉଥିବାରୁ ସେ ଦେଶ ଛାଡି ଚାଲିଯିବାର ଏହି କଠୋର ନିଷ୍ପତ୍ତି ନେଇଛନ୍ତି ବୋଲି କହିଛନ୍ତି। ଇନ୍ଷ୍ଟାଗ୍ରାମ୍ରେ ସେ ବିଷୟରେ ଘୋଷଣା କରିଛନ୍ତି। ଇରାନର ରାଜନୈତିକ ପରସ୍ଥିତି ଏବେ ଜଟିଳ ହୋଇଛି ଓ ଏଥିରେ କପଟତା ଚରମସୀମାରେ ପହଞ୍ଚଛି। ଟାଏକୋଣ୍ଡୋ, ସୁରକ୍ଷା, ଖୁସି ଓ ସୁସ୍ଥ ଜୀବନଯାପନକୁ ଏବେ ଗୁରୁତ୍ୱ ଦେଉଛି। ତେଣୁ ମୋତେ ଶେଷରେ ଏହି ନିଷ୍ପତ୍ତି ନେବାକୁ ହେଲା ବୋଲି ସେ କହିଛନ୍ତି।
ଇରାନରେ ମୋ ସହିତ ୧୦ ଲକ୍ଷ ମହିଳା ଅବହେଳିତ ହେଉଛନ୍ତି। ଦୀର୍ଘ ବର୍ଷ ଧରି ଖେଳି ଆସୁଥିଲେ ମଧ୍ୟ ମହିଳାଙ୍କୁ ଏଠି ଉଚିତ୍ ସମ୍ମାନ ଦିଆଯାଉ ନାହିଁ ବୋଲି ସେ ଉଲ୍ଲେଖ କରିଛନ୍ତି। ଇସଲାମିକ୍ ମୌଳବାଦୀଙ୍କ ଅନୁଯାୟୀ ମୋତେ ପୋଷାକ ପରିଧାନ କରିବାକୁ ପଡୁଛି। ଇରାନର ସବୁ ମହିଳାଙ୍କୁ ତାଙ୍କ ଇଛା ଅନୁସାରେ ବଞ୍ଚିବାକୁ ଦିଆଯାଉ ନାହିଁ। ସେମାନେ ଯାହା କହୁଛନ୍ତି ମୋତ ତାହା ବାରମ୍ବାର କରିବାକୁ ପଡୁଛି। ତେଣୁ ଇରାନରେ ମହିଳା ଅବହେଳିତ ହେବାର ସୀମା ପାର କରିଛି ବୋଲି ସେ କହିଛନ୍ତି।
ଗୁରୁବାର ଆଲିଜାଦେ ନିରୁଦ୍ଦିଷ୍ଟ ହୋଇଥିଲେ ଓ ଏହା ସାରା ଦେଶରେ ଚହଳ ସୃଷ୍ଟି କରିଥିଲା। ଆଲିଜାଦେ ନେଦରଲାଣ୍ଡ୍ସ ଚାଲିଥିବା ଜଣାପଡିଛି। ନେଦରଲାଣ୍ଡ୍ସରେ ପ୍ରଶିକ୍ଷଣ ନେଉଥିବା ଆଲିଜାଦେ ୨୦୨୦ ଟୋକିଓ ଅଲିମ୍ପିକ୍ସରେ ଅଂଶଗ୍ରହଣ କରିବାକୁ ଚାହୁଛନ୍ତି। ତେବେ ସେ ଇରାନ ତରଫରୁ ପ୍ରତିନିଧିତ୍ୱ କରିବେ ନାହିଁ ବୋଲି କୁହାଯାଇଛି। ତେବେ ସେ ନିଜର ଭବିଷ୍ୟତ ଯୋଜନା ସମ୍ପର୍କରେ କିଛି ସ୍ପଷ୍ଟ କରିନାହାନ୍ତି। ତେବେ ଯେଉଁଠି ବି ରୁହେ ଇରାନର ଜଣେ ଛୋଟ ପିଲା ହୋଇ ସବୁ ଦିନ ରହିବି ବୋଲି ସେ ଉଲ୍ଲେଖ କରିଛନ୍ତି।
