କିଏଭ୍,୯ା୧- ଇରାନ ରାଜଧାନୀ ତେହେରାନ ନିକଟରେ ୟୁକ୍ରେନର ଯାତ୍ରୀବାହୀ ବିମାନ ଦୁର୍ଘଟଣାଗ୍ରସ୍ତ ହୋଇ ୧୭୬ ଜଣଙ୍କ ମୃତ୍ୟୁ ଘଟିବା ପରେ ଅନେକ ପ୍ରଶ୍ନବାଚୀ ସୃଷ୍ଟି ହୋଇଛି। କୌଣସି ମିଶାଇଲ ଆକ୍ରମଣରେ ଏହା ଖସି ପଡ଼ିଥିବା ଆଶଙ୍କା ପ୍ରକାଶ ପାଇଥିବାବେଳେ ବିମାନ ଦୁର୍ଘଟଣାର ପ୍ରକୃତ କାରଣ ଖୋଜିବା ପାଇଁ ତନାଘନା ଆରମ୍ଭ ହୋଇଛି। କାରଣ ଏହି ବିମାନ ଉଡ଼ାଣର କିଛି ସମୟ ପରେ ଦୁର୍ଘଟଣାଗ୍ରସ୍ତ ହୋଇଥିଲା। ଦୁର୍ଘଟଣା ପୂର୍ବରୁ ବିମାନଟି ଏୟାରପୋର୍ଟ ଆଡ଼କୁ ଫେରିଆସିଥିଲା ବୋଲି ଇରାନର ଅଧିକାରୀମାନେ କହିଛନ୍ତି। ବିମାନର ଦୁଇ ଡାଟା ରେକର୍ଡର (ବ୍ଲାକ୍ବକ୍ସ) ମିଳିଛି। କିନ୍ତୁ ତାହା ନଷ୍ଟ ହୋଇଯାଇଥିବା କୁହାଯାଉଛି। ଇରାକରେ ଥିବା ଆମେରିକାର ଦୁଇଟି ସେନାଘାଟି ଉପରେ ଇରାନ ମିଶାଇଲ ମାଡ଼ କରିବାର କିଛି ଘଣ୍ଟା ପରେ ଏହି ଦୁର୍ଘଟଣା ଘଟିଥିବାରୁ ଆକ୍ରମଣରେ ବିମାନ ଖସିପଡ଼ିଥିବା ଆଶଙ୍କାକୁ ମଧ୍ୟ ଏଡ଼ାଇ ଦିଆଯାଇପାରୁନାହିଁ।
ବୋଇଙ୍ଗ୍ ୭୩୭-୮୦୦ ବୁଧବାର ସକାଳ ୬ଟା ୧୨ ମିନିଟରେ ତେହେରାନର ଇମାମ ଖୋମେନି ଅନ୍ତର୍ଜାତୀୟ ବିମାନବନ୍ଦରରୁ ୟୁକ୍ରେନ ରାଜଧାନୀ କିଏଭ୍ ଅଭିମୁଖେ ଯାତ୍ରା ପାଇଁ ବାହାରିଥିଲା। ହେଲେ ଉଡ଼ାଣ ଆରମ୍ଭ କରିବାର ମାତ୍ର ୨ ମିନିଟ ପରେ ରାଡାର ବାହାରକୁ ଚାଲିଯାଇଥିଲା। କଣ୍ଟ୍ରୋଲ ରୁମ୍ ସହ ଯୋଗାଯୋଗ ବିଚ୍ଛିନ୍ନ ହେବାର କିଛି ସମୟ ପରେ ୪୫ କି.ମି. ଦୂର ଶାହରିଆର କାଉଣ୍ଟିସ୍ଥିତ ଖଲଜ୍ର ଏକ ଚାଷଜମିରେ ବିମାନ ଖସିପଡ଼ିଥିଲା। ଫଳରେ ବିମାନରେ ନିଆଁ ଲାଗିଯାଇଥିଲା। ଏଥିଯୋଗୁ ସେଥିରେ ଥିବା ସମସ୍ତ ୧୭୬ ଯାତ୍ରୀଙ୍କ ଜୀବନ ଚାଲିଯାଇଥିଲା। ୟୁକ୍ରେନ ଇଣ୍ଟରନ୍ୟାଶନାଲ ଏୟାରଲାଇନ୍ସ (ୟୁଆଇଏ)ର ଏହି ଘରୋଇ ବିମାନ କାହିଁକି ଓ କିପରି ଦୁର୍ଘଟଣାଗ୍ରସ୍ତ ହେଲା ତାକୁ ନେଇ ତଦନ୍ତ ଆରମ୍ଭ ହୋଇଛି। ଏକ ମିଶାଇଲ ମାଡ଼ରେ ଏହା ଖସିପଡ଼ିଥିବା ଆଶଙ୍କା କରି ତଦନ୍ତକାରୀମାନେ ଅନୁଧ୍ୟାନ କରିବେ। ଏନେଇ ୟୁକ୍ରେନର ଜଣେ ବରିଷ୍ଠ ଅଧିକାରୀ ଗୁରୁବାର ସୂଚନା ଦେଇଛନ୍ତି। ଦୁର୍ଘଟଣା ପଛରେ ଅନ୍ୟ କିଛି କାରଣ ଥିବା ସମ୍ଭାବନାକୁ ତଦନ୍ତକାରୀମାନେ ଏଡ଼ାଇ ଦେଇନାହାନ୍ତି।
ୟୁକ୍ରେନର ଜାତୀୟ ନିରାପତ୍ତା ଓ ପ୍ରତିରକ୍ଷା ପରିଷଦ ସଚିବ ଓଲେକ୍ସି ଡାନିଲୋଭ କହିଛନ୍ତି, ଭୂପୃଷ୍ଠରୁ ଆକାଶମାର୍ଗରେ ଆକ୍ରମଣ କରିପାରୁଥିବା ରୁଷିଆ ନିର୍ମିତ ଟୋର ମିଶାଇଲ୍ ସିଷ୍ଟମ୍ର ଭଗ୍ନାବଶେଷ ବିମାନ ଦୁର୍ଘଟଣାସ୍ଥଳ ନିକଟରୁ ମିଳିଛି। ଉକ୍ତ କ୍ଷେପଣାସ୍ତ୍ରକୁ ଇରାନ ବ୍ୟବହାର କରୁଥିଲା ବୋଲି ତଦନ୍ତକାରୀମାନେ ଜାଣିବାକୁ ପାଇଛନ୍ତି। ଦୁର୍ଘଟଣାସ୍ଥଳ ନିକଟରେ ରକେଟର ଅବଶିଷ୍ଟ ଭଗ୍ନାବଶେଷ ତଲାସି ଲାଗି ତଦନ୍ତକାରୀଙ୍କୁ ଅନୁମତି ପ୍ରଦାନ ନିମନ୍ତେ ଇରାନ ସହିତ ୟୁକ୍ରେନ ଆଲୋଚନା କରୁଛି। ଇରାନବାସୀ ମଧ୍ୟ ଅନ୍ତର୍ଜାତୀୟ ବେସାମରିକ ବିମାନ ଚଳାଚଳ ସଙ୍ଗଠନ ଜରିଆରେ ଆମେରିକାର ଜାତୀୟ ପରିବହନ ନିରାପତ୍ତା ବୋର୍ଡ (ଏନ୍ଟିଏସ୍ବି)କୁ ତଦନ୍ତରେ ସହଯୋଗ କରିବା ପାଇଁ ନିମନ୍ତ୍ରଣ କରିଛନ୍ତି। ଏନ୍ଟିଏସ୍ବି ତଦନ୍ତ ଆଗକୁ ବଢ଼ାଇବା ପାଇଁ ପରରାଷ୍ଟ୍ର ବିଭାଗ ନିକଟରେ ପହଞ୍ଚତ୍ଛି। ଇରାନ ବିରୋଧରେ କଟକଣା ଜାରି ହୋଇଥିବାରୁ ରପ୍ତାନି ଲାଇସେନ୍ସ ବିନା ସେମାନଙ୍କ ସହ ଯୋଗାଯୋଗରେ ବାଧା ସୃଷ୍ଟି ହୋଇଛି ବୋଲି ଅଧିକାରୀମାନେ ପ୍ରକାଶ କରିଛନ୍ତି। ଆତଙ୍କବାଦୀ ଆକ୍ରମଣ, ଡ୍ରୋନ ଭଳି କୌଣସି ଉଡ଼ନ୍ତା ଯାନ ସହ ଧକ୍କା କିମ୍ବା ଇଞ୍ଜିନ ବିସ୍ଫୋରଣ ଯୋଗୁ ବିମାନ ଦୁର୍ଘଟଣା ହୋଇଥାଇପାରେ ବୋଲି ଆଶଙ୍କା କରାଯାଉଛି। ତେଣୁ ସେହି ସବୁ ଦିଗଗୁଡ଼ିକୁ ନେଇ ମଧ୍ୟ ତଦନ୍ତ କରାଯାଉଛି ବୋଲି ନିଜ ଫେସ୍ବୁକ୍ ପେଜ୍ରେ ଡାନିଲୋଭ ଉଲ୍ଳେଖ କରିଛନ୍ତି। ଅନେକ ନିରପେକ୍ଷ ବିମାନ ଚଳାଚଳ ବିଶେଷଜ୍ଞ ଦୁର୍ଘଟଣାସ୍ଥଳ ପରିଦର୍ଶନ କରି ଓ ଏକ ଭିଡିଓରୁ ଜାଣିବାକୁ ପାଇଛନ୍ତି ଯେ, ବୋଇଙ୍ଗ ୭୩୭-୮୦୦ ଆକାଶରେ ହିଁ ଖଣ୍ଡବିଖଣ୍ଡିତ ହୋଇଯାଇଥିଲା।
ୟୁକ୍ରେନରୁ ଏକ ୪୫ ଜଣିଆ ବିଶେଷଜ୍ଞ ଓ ତଲାସି ତଥା ଉଦ୍ଧାରକାରୀ ଦଳ ଗୁରୁବାର ତେହେରାନରେ ପହଞ୍ଚତ୍ଛନ୍ତି। ସେମାନେ ତଦନ୍ତରେ ସାମିଲ ହେବା ସହ ମୃତହେଦଗୁଡ଼ିକୁ ଚିହ୍ନଟ କରି ୟୁକ୍ରେନକୁ ପଠାଇବା ବ୍ୟବସ୍ଥା କରୁଛନ୍ତି। ୧୭୬ ମୃତକଙ୍କ ମଧ୍ୟରେ ୯ ବିମାନ କର୍ମଚାରୀଙ୍କ ସମେତ ୧୧ ଜଣ ଥିଲେ ୟୁକ୍ରେନ ବାସିନ୍ଦା। ଡାନିଲୋଭ କହିଛନ୍ତି, ତାଙ୍କ ଟିମ୍ ଦୁର୍ଘଟଣାସ୍ଥଳରେ ରୁଷିଆ ନିର୍ମିତ ମିଶାଇଲର ଭଗ୍ନାବଶେଷ ଖୋଜିବାକୁ ଚାହୁଁଛି। ଏକ କ୍ଲୋଜ୍ଡ-ଶର୍କିଟ ଟିଭି କ୍ୟାମେରାରେ ଉଠାଯାଇଥିବା ଦୁର୍ଘଟଣା ବେଳର ଦୃଶ୍ୟର ଭିଡିଓ ଟୁଇଟର୍ରେ ପୋଷ୍ଟ କରାଯାଇଛି। ବିମାନ ଆକାଶରେ ଉଡ଼ୁଥିବାବେଳେ ସେଥିରୁ ଗୋଲାପୀ ରଙ୍ଗର ଉଜ୍ୱଳ ନିଆଁ ଦେଖିବାକୁ ମିଳିଥିଲା ଓ ପରେ ଜଳନ୍ତା ଭଗ୍ନାବଶେଷ ଏକ ବିସ୍ତୃତ ଅଞ୍ଚଳରେ ବିଛାଡ଼ି ହୋଇ ପଡ଼ିଥିଲା। ଏହି ଭିଡିଓକୁ ଇରାନର ସରକାରୀ ଚ୍ୟାନେଲ ପୋଷ୍ଟ କରିଛି।
