ଉଦଳା, ୨୧ା୬(ଡି.ଏନ୍.ଏ.)-ସବୁଦିନ ପରି ସେଦିନ ମଧ୍ୟ ସିଏ କାମରେ ଯାଇଥିଲେ। ସନ୍ଧ୍ୟା ହେଲା ବେଳକୁ ସ୍ତ୍ରୀ ଏବଂ ଛୋଟ ଝିଅ ଚାହିଁ ରହିଥିଲେ ଫେରିବା ବାଟକୁ। ହେଲେ ଆସିଲା ତାଙ୍କୁ ଦୁର୍ଘଟଣା ଖବର। ଦୁର୍ଘଟଣା ଖବର ପାଇବା ପରେ ପୁରା ପରିବାର ଅସ୍ତବ୍ୟସ୍ତ ହୋଇପଡିଥିଲେ ସତ। ହେଲେ ମନରେ ଆଶା ଥିଲା କିଛି ଦିନ ପରେ ସେ ସୁସ୍ଥ ହେବେ ଏବଂ ପୂର୍ବ ଭଳି ସବୁକିଛି ଠିକଠାକ୍ ଚାଲିବ। ହେଲେ କିଏ ଜାଣିଥିଲା ବିଧିର ବିଧାନ କିଛି ଅଲଗା ହିଁ ଥିଲା। ସେହି ଦୁର୍ଘଟଣା ହିଁ ବଦଳାଇଦେଲା ଜୀବନର ଗତିପଥ। ହସଖୁସିରେ ବଞ୍ଚୁଥିବା ମଣିଷ ଆଖିରେ ଛାଡିଗଲା କେବଳ ଲୁହ। ଗୋଟିଏ ଦୁର୍ଘଟଣା ଆଜି ତାଙ୍କୁ ପଙ୍ଗୁ କରି ଦେଇଛି। ଚାରି ବର୍ଷ ହେବ ଏବେ ସେ ବିଛଣାରେ। ନା କଥା କହିପାରୁଛନ୍ତି, ନା ଚାଲିବୁଲି ପାରୁଛନ୍ତି। ଏକମାତ୍ର ଛୋଟ ଝିଅର ମୁହଁକୁ ଚାହିଁ ଦିନ କାଟୁଛନ୍ତି ସ୍ତ୍ରୀ ମମତା ପ୍ରଧାନ।
ଉଦଳା ଏନଏସି ଅନ୍ତର୍ଗତ ୫ ନଂ. ୱାର୍ଡରେ ବଳରାମ ପ୍ରଧାନଙ୍କ ଘର। ବାହାଘର ପରଠାରୁ ଆଜକୁ ୭ ବର୍ଷ ହେଲା ସ୍ତ୍ରୀ ମମତା ଓ ଶାଶୁ, ଶ୍ୱଶୁରଙ୍କ ସହିତ ସେ ଉଦଳାରେ ରହି ଆସୁଛନ୍ତି। ଉଦଳାରେ ଏକ ଡ୍ରେସ୍ ଦୋକାନରେ ସେ କାମ କରୁଥିଲେ। ହେଲେ ୨୦୧୬ ମସିହାରେ ହୋଇଥିବା ଦୁର୍ଘଟଣା ବଦଳାଇ ଦେଲା ତାଙ୍କ ଜୀବନର ଗତିପଥ। ଦୋକାନର ମାଲ୍ ଆଣିବା ନିମନ୍ତେ ୨୦୧୬ ଏପ୍ରିଲ୍ ମାସରେ ବଳରାମ ବାଲେଶ୍ୱର ଯାଇଥିଲେ। ସେଠାରୁ ଫେରିବା ସମୟରେ ସେ ସଡ଼କ ଦୁର୍ଘଟଣାର ସମ୍ମୁଖୀନ ହୋଇଥିଲେ। ବାଲେଶ୍ୱର ଏବଂ ପରେ କଟକ ବଡ ଡାକ୍ତରଖାନାରେ ଚିକିତ୍ସିତ ହୋଇଥିଲେ ମଧ୍ୟ ନା ଆଉ କଥା କହିପାରୁଛନ୍ତି ନା ଚଲାବୁଲା। ଏବେ ସେ ଶଯ୍ୟାଶାୟୀ। ସକାଳଠାରୁ ରାତି ପର୍ଯ୍ୟନ୍ତ ସେହି ଗୋଟିଏ ଚେୟାରରେ ସେ ବସି ରୁହନ୍ତି। ନାକରେ ଲାଗିଥିବା ନଳୀ ସହାୟତାରେ ତାଙ୍କୁ ତରଳ ଖାଦ୍ୟ ଦିଆଯାଉଥିବା ବେଳେ ସେହିଠାରେ ହିଁ ଝାଡା ପରିସ୍ରା କରିଥାନ୍ତି। ମମତାଙ୍କ ପାଖରେ ଯାହା ସମ୍ବଳ ଥିଲା ତାହା ଖର୍ଚ୍ଚ କରି ସାରିଥିବାରୁ ଏବେ ସ୍ବାମୀଙ୍କ ଅଧିକ ଚିକିତ୍ସା କରାଇବା ତାଙ୍କ ପକ୍ଷେ ସମ୍ଭବ ନୁହେଁ । ମମତା ସିଲେଇ କରୁଥିବା ବେଳେ ଶ୍ୱଶୁର ବିକର୍ତ୍ତନ ସାମଲ ଏକ ଘରୋଇ ବିଦ୍ୟାଳୟରେ ପିଲାଙ୍କ ବସ୍ ଚଲାନ୍ତି। ସେହିଥିରେ ଯାହା ରୋଜଗାର ହୁଏ ଦୁଃଖକଷ୍ଟରେ ପରିବାର ଚାଲିଛି। ଲକ୍ଡାଉନ୍ ପାଇଁ ସବୁ ବନ୍ଦ ହୋଇପଡ଼ିଛି। ଘର ଚଳାଇବା ଏବେ କଷ୍ଟକର ହୋଇଛି। ସ୍ବାମୀଙ୍କ ଚିକିତ୍ସା ନିମନ୍ତେ ସରକାରୀ ସହାୟତାକୁ ଚାହିଁ ବସିଛନ୍ତି ପରିବାର ଲୋକେ। ଏସମ୍ପର୍କରେ ବଡସାହି ବିଡିଓ ଦିଲ୍ଲୀପ କୁମାର ମହାରଣାଙ୍କୁ ପଚାରିବାରୁ ପୂରା ଘଟଣା ଶୁଣିବା ପରେ ସରକାରୀସ୍ତରରେ ଭତ୍ତା ଏବଂ ଘର ଖୁବଶୀଘ୍ର ବଳରାମଙ୍କୁ ଯୋଗାଇ ଦିଆଯିବ ବୋଲି ସେ କହିଛନ୍ତି।
