ନୂଆଦିଲ୍ଲୀ,୧୨ା୬(ଆଇଏଏନ୍ଏସ୍): ପ୍ରଧାନମନ୍ତ୍ରୀଙ୍କ ପ୍ରଧାନ ସଚିବ ନୃପେନ୍ଦ୍ର ମିଶ୍ର ଓ ଅତିରିକ୍ତ ପ୍ରଧାନ ସଚିବ ପ୍ରମୋଦ କୁମାର ମିଶ୍ରଙ୍କ କାର୍ଯ୍ୟକାଳ ୫ ବର୍ଷ ବୃଦ୍ଧି କରାଯାଇଛି। ଏହାସହ ଭାରତୀୟ ପ୍ରଶାସନିକ ସେବା (ଆଇଏଏସ୍)ର ଦୁଇ ଅବସରପ୍ରାପ୍ତ ଅଧିକାରୀଙ୍କୁ କ୍ୟାବିନେଟ ମନ୍ତ୍ରୀ ପାହ୍ୟା ଦିଆଯାଇଛି। ମେ ୩୧ରୁ ଏହା କାର୍ଯ୍ୟକାରୀ ହେବ ବୋଲି ଜଣାପଡ଼ିଛି।
ସମ୍ପର୍କିତ କ୍ୟାବିନେଟ କମିଟି ମଙ୍ଗଳବାର ୧୯୪୫ ମାର୍ଚ୍ଚ ୮ରେ ଜନ୍ମିତ ନୃପେନ୍ଦ୍ର ମିଶ୍ର ଏବଂ ୧୯୪୮ ଅଗଷ୍ଟ ୧୧ରେ ଜନ୍ମଗ୍ରହଣ କରିଥିବା ପି.କେ. ମିଶ୍ରଙ୍କ କାର୍ଯ୍ୟକାଳ ବୃଦ୍ଧି କରିଛି। ମୋଦି ସରକାରଙ୍କ ପ୍ରଥମ ପାଳି ୨୦୧୪ ମେ ୨୮ରେ ନୃପେନ୍ଦ୍ର (ଉତ୍ତରପ୍ରଦେଶ କ୍ୟାଡର ୧୯୬୭ ବ୍ୟାଚ୍ ଆଇଏଏସ୍ ଅଧିକାରୀ)ଙ୍କୁ ପ୍ରଧାନମନ୍ତ୍ରୀଙ୍କ ପ୍ରଧାନ ସଚିବ କରାଯାଇଥିଲା। ସେହିପରି ୨୦୧୪ ଜୁନ୍ ୯ରେ ଅତିରିକ୍ତ ପ୍ରଧାନ ସଚିବ ଭାବେ ପି.କେ. ମିଶ୍ର (ଗୁଜରାଟ କ୍ୟାଡର ୧୯୭୨ ବ୍ୟାଚ୍ ଆଇଏଏସ୍ ଅଧିକାରୀ)ଙ୍କୁ ନିଯୁକ୍ତି ଦିଆଯାଇଥିଲା। ପ୍ରକାଶ ଯେ, ଏହାପୂର୍ବରୁ ଏନ୍ଏସ୍ଏ ଅଜିତ୍ ଡୋଭାଲଙ୍କ କାର୍ଯ୍ୟକାଳ ୫ ବର୍ଷ ବୃଦ୍ଧି କରାଯାଇ ତାଙ୍କୁ କ୍ୟାବିନେଟ ପାହ୍ୟା ଦିଆଯାଇଛି।
